15
Wɔllun gɔrɑdobɑ
kɑ gbee swɑ̃ɑ dɑ̃ɑkinu
1 Yen biru, nɑ kpɑm yĩreru gɑru wɑ Gusunɔ wɔllɔ, tɑ kpɑ̃ mɑ tɑ bɛrum mɔ. Ye nɑ wɑ wee. Wɔllun gɔrɑdobɑ nɔɔbɑ yiru bɑ gbee swɑ̃ɑnu nɔɔbɑ yiru nɛni. Niyɑ nu sɑ̃ɑ gbee swɑ̃ɑ dɑ̃ɑkinu, domi ni sɔɔrɑ Gusunɔn mɔru yɑ koo kɑ kpe.
2 Yerɑ nɑ gɑ̃ɑnu wɑ ni nu sɑ̃ɑre yɛru dikiguu ge gɑ burinɛ kɑ dɔ̃ɔ. Nɑ mɑɑ tɔn be wɑ be bɑ gbeeku yɑɑ ye kɑ yen weenɑsiɑ, kɑ yen yĩsirun dɑmbɑ tɑbu di. Tɔn be, bɑ yɔ̃ yɛru gen wɔllɔ bɑ mɔrɔkunu nɛni ni Gusunɔ u bu wɛ̃. 3 Bɑ Mɔwisi Gusunɔn sɔm kowon womu mɔ̀ kɑ mɑɑ Yɑ̃ɑ kinɛ kpɛnduguu bɑ mɔ̀,
<<Yinni Gusunɔ dɑm kpurogii,
wunɛn sɔmɑ kpɑ̃, yɑ mɑɑ sɑ̃ɑ mɑɑmɑɑki.
Wunɑ ɑ tem kpuron sinɑ boko.
Wunɛn swɛɛ yi sɑ̃ɑ gem, yi dɛnde.
4 Yinni, wɑrɑ kun wunɛn bɛrum mɔ.
Wɑrɑ koo yinɑ u wunɛn yĩsiru bɛɛrɛ wɛ̃.
Domi wunɛ turowɑ ɑ sɑ̃ɑ dɛɛro.
Tem bɑɑmɛren tɔmbɑ koo nɑ wunɛn mi, bu nun sɑ̃.
Domi bɑɑwure u wunɛn sɔm geenu wɑ.>>
5 Yen biru nɑ mɛɛrɑ nɑ wɑ bɑ sɑ̃ɑ yeru kɛniɑ Gusunɔ wɔllɔ mi win kuu bekurugirɑ wɑ̃ɑ. 6 Wɔllun gɔrɑdobɑ nɔɔbɑ yiru be bɑ gbee swɑ̃ɑnu nɔɔbɑ yiru nɛni mi, bɑ yɑrɑ sɑ̃ɑ yee ten min di. Bɑ yɑ̃ɑ kpikinu sebuɑ ni nu dɛɛre wɑsɑ wɑsɑ mɑ bɑ kpɑki wurɑgii sɛ̃ke ben gɑ̃ɑsɔ. 7 Yerɑ hunde konibɑ nnɛ ben turo u gɔrɑdo nɔɔbɑ yiru ye yoruku wurɑginu nɔɔbɑ yiru wɛ̃ ni nu Gusunɔn mɔru yibɑ. Gusunɔ u sɑ̃ɑwɑ Yinni wi u wɑ̃ɑ sere kɑ bɑɑdommɑɔ. 8 Mɑ sɑ̃ɑ yee te, tɑ wiisu yibɑ Gusunɔn yiiko kɑ win dɑm sɔ̃. Goo kun mɑɑ kpɛ̃ u du mi sere wɔllun gɔrɑdobɑ nɔɔbɑ yirun gbee swɑ̃ɑnu nɔɔbɑ yiru ye, yu kɑ wiru goorɑ.