16
Gusunɔn mɔrun yorukunu
1 Yerɑ nɑ nɔɔgiru gɑru nuɑ sɑɑ sɑ̃ɑ yee ten min di tɑ wɔllun gɔrɑdo be sɔ̃ɔwɑ tɑ nɛɛ, bu doo bu Gusunɔn mɔrun yorukunu nɔɔbɑ yiru wisi hɑnduniɑ sɔɔ.
2 Gɔrɑdo gbiikoo u dɑ mɑ u win yoruku wisi temɔ. Yerɑ bwisi tobi bu wisi nge fɔrɔnu be bɑ gbeeku yɑɑ yen yĩreru mɔ bɑ yen weenɑsiɑ sɑ̃ɑmɔ.
3 Sɑnɑm mɛyɑ gɔrɑdo yiruse u win yoruku wisi nim wɔ̃ku sɔɔ. Nim mɛ, mu gɔsiɑ nge tɔn gorun yɛm, mɑ hunde koni bɑɑyere yɑ gu nim mɛ sɔɔ.
4 Yerɑ gɔrɑdo itɑse u win yoruku wisi dɑɑ bɑkɑnu kɑ bwii sɔɔ, mɑ nim mu gɔsiɑ yɛm. 5 Mɑ nɑ gɔrɑdo winin nɔɔ nuɑ wi u dɑm mɔ nim wɔllɔ, u nɛɛ, Dɛɛro, wunɛ wi ɑ wɑ̃ɑ, ɑ rɑɑ mɑɑ wɑ̃ɑ, wunɑ ɑ sɑ̃ɑ gemgii ɑ kɑ siri mɛsum. 6 Domi bɑ nɑɑnɛ dokeobu kɑ Gusunɔn sɔmɔbun yɛm yɑri, mɑ ɑ bu yɛm wɛ̃ bu nɔ. Mɛyɑ bɑ kɑ weenɛ. 7 Yen biru nɑ nɔɔ gɑgu nuɑ sɑɑ yɑ̃ku yeru min di gɑ nɛɛ, geemɑ Gusunɔ Yinni dɑm kpurogii, wunɛn siribu sɑ̃ɑ gem bu mɑɑ dɛnde.
8 Yerɑ gɔrɑdo nnɛse u win yoruku wisi sɔ̃ɔ wɔllɔ, mɑ sɔ̃ɔ u dɑm wɑ u kɑ tɔmbu dɔ̃ɔ kpɑkiri. 9 Mɑ tɔmbɑ dɔ̃ɔ kpɑkirirɑ yɑm susu bɑkɑrun sɔ̃. Mɑ bɑ Gusunɔn yĩsiru gɑri kɑm gerusi wi u yiiko mɔ gbee swɑ̃ɑ nin wɔllɔ. Adɑmɑ bɑ yinɑ bu gɔ̃ru gɔsiɑ bu nùn bɛɛrɛ wɛ̃.
10 Yerɑ gɔrɑdo nɔɔbuse u win yoruku wisi gbeeku yɑɑ yen sinɑ kitɑru wɔllɔ. Mɑ n kuɑ yɑm wɔ̃kuru ketem yen bɑndun tem sɔɔ. Mɑ tɔmbu bɑ ben yɑri temmɔ wuriribun sɔ̃. 11 Mɑ bɑ Wɔrukoo gɑri kɑm gerusi ben wuriribu kɑ bwisinun sɔ̃. Adɑmɑ bɑ yinɑ bu ben kom kɔ̃sum deri.
12 Yerɑ gɔrɑdo nɔɔbɑ tiɑse u win yoruku wisi dɑɑ bɑkɑru sɔɔ te bɑ mɔ̀ Efɑrɑti, mɑ tɑ gberɑ mɑm mɑm tu kɑ sɔ̃ɔ yɑri yerun sinɑmbu swɑɑ kɛ̃ bu tɔburɑ. 13 Mɑ nɑ wɛrɛkunu itɑ wɑ ni nu tii gɔsiɑ nge surenu, nu yɑrimɔ yɑɑ binti binti ten nɔɔn di kɑ gbeeku yɑɑ yen nɔɔn di kɑ mɑɑ sɔmɔ weesugiin nɔɔn di. 14 Wɛrɛku ni, nu sɑ̃ɑwɑ Setɑm bwɑ̃ɑbu, be bɑ mɑɑmɑɑki mɔ̀, mɑ bɑ dɔɔ hɑnduniɑ kpuron sinɑmbun mi bu kɑ bu mɛnnɑ bu tɑbu ko Gusunɔ Yinni dɑm kpurogiin siribun tɔ̃ru sɔɔ.
15 Mɑ Yesun nɔɔ gɑ nɔɔrɑ u nɛɛ, wee, nɑ sisi nge gbɛnɔ. Doo nɔɔrugiiwɑ wi u swɑɑ mɛɛrɑ mɑ u win yɑ̃nu kpɑrenu sɑ̃ɑ u ku kɑ swɑɑ wɔri tereru kpɑ u sekuru wɑ bɑtumɑ sɔɔ.
16 Yerɑ wɛrɛku ni, nu sinɑmbu kpuro mɛnnɑ gɑm gum mi bɑ rɑ soku kɑ Heberum Aɑmɑgedom.
17 Yen biru, gɔrɑdo nɔɔbɑ yiruse u win yoruku wisi wom dirum sɔɔ. Mɑ nɔɔgiru gɑrɑ nɔɔrɑ sinɑ kitɑrun di sɑ̃ɑ yerɔ tɑ nɛɛ, gɑri kpɑ. 18 Yerɑ guru mɑɑkinu seewɑ kɑ wurenu kɑ guru gbɑ̃sukubu kɑ tem yĩiru bɑkɑbu. Tem yĩiru bin kpɑ̃ɑrɑ bɑndɑ. Bin bweseru tɑ ǹ koore sɑɑ mìn di bɑ tɔnu tɑkɑ kuɑ. 19 Wuu bɔkɔ ge, gɑ kurɑnɑ wɑsi itɑ, mɑ tɔn tukobun wusu su wɔrukɑ. Gusunɔ u Bɑbiloni, wuu bɔkɔ ge yɑɑyɑ mɑ u gu win mɔru bɑkɑn nɔrɑn tɑm wɛ̃ gu nɔ. 20 Tem burenu kpuro nu doonɑ, guunu kun mɑɑ wɑɑrɔ. 21 Yerɑ guru kpee bɑkɑnu, nìn teerɑ kilo weeru turɑ, nu tɔmbu wɔriki wɔllun di. Mɑ bɑ Gusunɔ gɑri kɑm gerusi guru kpee nin nɔni swɑ̃ɑrun sɔ̃ domi nɔni swɑ̃ɑ te, tɑ bɑndɑ.