14
Be bɑ yɑkiɑn womu
1 Yen biruwɑ nɑ mɛɛrɑ mɑ nɑ Yɑ̃ɑ kinɛ kpɛm te wɑ tɑ yɔ̃ Siɔnin guuru wɔllɔ. Tɔnu nɔrɔbun subɑ wunɑɑ weeru kɑ nnɛ (144.000) bɑ kɑ nùn wɑ̃ɑ mi, be bɑ win yĩsiru kɑ win Bɑɑbɑn yĩsiru yoruɑ ben sirinɔ. 2 Mɑ nɑ nɔɔ gɑgu nuɑ wɔllun di nge surun bɑkɑrun wurenu, nge guru gbɑ̃rɑ bɑkɑbu. Nɔɔ ge nɑ nuɑ gɑ sɑ̃ɑwɑ nge ni mɔrɔku sowobɑ soomɔn swĩi. 3 Bɑ yɔ̃ sinɑ kitɑrun wuswɑɑɔ, mi hunde konibɑ nnɛ ye kɑ guro guro be, bɑ wɑ̃ɑ. Bɑ womu kpɔɔ mɔ̀ ge goo kun kpɛ̃ u giɑ mɑ n kun mɔ tɔnu nɔrɔbun subɑ wunɑɑ weeru kɑ nnɛ be bɑ yɑkiɑ hɑnduniɑn di.
4 Tɔn be, bɑ sɑ̃ɑ be bɑ tii nɛnuɑ dɛɛrɑru sɔɔ, bɑ ǹ kurɔ dɑmɑru koore. Bɑ Yɑ̃ɑ kinɛ kpɛm te swĩiwɑ bɑɑmɑ kpuro mi tɑ dɔɔ. Bɑ bu yɑkiɑwɑ sɑɑ tɔmbun suunu sɔɔn di bɑ n kɑ sɑ̃ɑ nge yɑ̃ku gbiikii te bɑ Gusunɔ kɑ Yɑ̃ɑ kinɛ kpɛm te kuɑ. 5 Goo kun weesu nɔɔre ben nɔɔn di, bɑ sɑ̃ɑwɑ tɑɑrɛ sɑrirugibu.
Wɔllun gɔrɑdobɑ itɑ
6 Yerɑ nɑ kpɑm wɔllun gɔrɑdo goo wɑ u yɔ̃ɔwɑ sere sere Gusunɔ wɔllɔ, wi u koo Lɑbɑɑri geɑ ye yɑ ku rɑ kpe kpɑrɑ hɑnduniɑgibun mi, tem bɑɑmɛre kɑ bweseru bɑɑtere kɑ bɑrum bɑɑmɛre kɑ tɔmbu kpuron mi. 7 U nɔɔgiru suɑ u nɛɛ, i Gusunɔ nɑsio kpɑ i nùn bɛɛrɛ wɛ̃, domi sɑɑ yɑ turɑ u kɑ tɔmbu kpuro siri. I nùn sɑ̃ɑwɔ wi u wɔllu kɑ tem tɑkɑ kuɑ kɑ nim wɔ̃ku kɑ bwii.
8 Wɔllun gɔrɑdo yiruse u gbiikoo swĩi u nɛɛ, Bɑbiloni, wuu bɔkɔ ge, gɑ wɔrumɑ, gɑ wɔrumɑ, ge, ge gɑ tɔmbu kpuro tilɑsi kuɑ bɑ kɑ gen dɑɑ bɛrɛtɛkɛ bɑkɑn tɑm nɔrɑ.
9 Gɔrɑdo itɑse u gbiikobu yiru ye swĩi, mɑ u nɔɔgiru suɑ u nɛɛ, bɑɑwure wi u gbeeku yɑɑ ye sɑ̃ɑmɔ kɑ yen weenɑsiɑ, mɑ u yen yĩsiru mɔ win sirirɔ ǹ kun mɛ win nɔmuɔ, 10 wiyɑ u koo mɑɑ Gusunɔn mɔrun tɑm nɔ mɛ u koo wisi kɑ mɛn dɑm win mɔrun nɔrɑ sɔɔ. Bɑɑwure wi u mɔ̀ nge mɛ, u koo tɔ̃yɑ wɑ dɔ̃ɔ kɑ sɔ̃ɔ bisu sɔɔ, gɔrɑdo dɛɛrobu kɑ Yɑ̃ɑ kinɛ kpɛm ten wuswɑɑɔ. 11 Dɔ̃ɔ wi u nùn tɔ̃yɑ mɔ̀ win wiisu su ko su n seemɔwɑ wɔllɔ kɑ bɑɑdommɑɔ. Bɑ ǹ ko bɑ n mɑɑ wɛ̃rɑbu mɔ bururu kɑ yokɑ, be bɑ gbeeku yɑɑ ye sɑ̃wɑ kɑ yen weenɑsiɑ, kɑ be bɑ yen yĩsirun yĩreru mɔ.
12 Gɑri yi sɔɔ, n weenɛ nɑɑnɛ dokeobu bu tɛmɑnɑ, be bɑ Gusunɔn woodɑ mɛm nɔɔwɑ mɑ bɑ Yesu nɑɑnɛ kuɑ.
13 Yen biru nɑ kpɑm nɔɔ gɑgu nuɑ wɔllun di gɑ nɛɛ, n yeni yoruo, doo nɔɔrugibɑ be bɑ gbimɔ sɑɑ tɛ̃n di Yinnin nɑɑnɛ dokebu sɔɔ. Gusunɔn Hunde gerumɔ u mɔ̀, mɛyɑ ni, bɑ koo wɛ̃rɑ, domi ben sɔm geerun ɑre koo bu swĩi.
Hɑnduniɑn gɛ̃ɛbu
14 Yen biru nɑ mɛɛrɑ mɑ nɑ guru wii kpikiru wɑ, goo sɔ̃ mi nge tɔnun bii. Yɛ̃ro sinɑ furɔ wurɑguu doke win wirɔ, mɑ u kɔmbɔ nɛni ge gɑ nɔɔ do. 15 Wɔllun gɔrɑdo goo u yɑrɑ sɑ̃ɑ yerun di, mɑ u wi u sɔ̃ guru wiru wɔllɔ nɔɔgiru suɑ u nɛɛ, ɑ wunɛn kɔmbɔ suo ɑ gɛ̃, domi gɛ̃ɛbun sɑnɑm mu turɑ, hɑnduniɑ yɑ ye bu kɑ gɛ̃. 16 Yerɑ wi u sɔ̃ guru wiru wɔllɔ u win kɔmbɔ doke hɑnduniɑ sɔɔ, mɑ u ye gɑ̃.
17 Gɔrɑdo goo kpɑm yɑrɑ sɑ̃ɑ yerun di te tɑ wɑ̃ɑ wɔllɔ, win tii mɑɑ kɔmbɔ nɛni ge gɑ nɔɔ do.
18 Gɔrɑdo goo mɑɑ yɑrimɑ sɑɑ yɑ̃ku yerun di, wi u dɑm mɔ dɔ̃ɔn wɔllɔ. U gbɑ̃rɑ tɑ̃ɑ tɑ̃ɑ u wi u kɔmbɔ nɔɔ durorɔ nɛni sɔ̃ɔwɑ u nɛɛ, ɑ wunɛn kɔmbɔ dokeo kpɑ ɑ hɑnduniɑn dɑ̃ɑ bii ni bɑ mɔ̀ resɛm sɔri, domi nu ye. 19 Gɔrɑdo wi, u win kɔmbɔ doke mɑ u dɑ̃ɑ binu sɔrɑ. Mɑ u nu wisi Gusunɔn mɔru bɑkɑn dɑ̃ɑ bii gɑmɑ yerɔ. 20 Bɑ resɛm dɑ̃ɑ bii ni gɑmɑ nin gɑmɑ yerɔ wuun biruɔ. Mɑ dɑ̃ɑ bii gɑmɑ yee ten min di yɛm mu kokɑ mu tɛriɑ sere kilo goobɑ wunɔbu (300), mɑ mɛn dukum mɑɑ turɑ sere dumin toro gɛndɛɔ.