13
Gbeeku yɛɛ yiru
1 Yen biruwɑ nɑ gbeeku yɑɑ gɑɑ wɑ yɑ yɑriɔ nim wɔ̃kun di. Yɑ kɔbi wɔkuru mɔ kɑ winu nɔɔbɑ yiru, mɑ sinɑ furɔ gɑ wɑ̃ɑ kɔbi yin bɑɑyeren wɔllɔ, mɑ yĩsi kɔ̃sunu yoruɑ yen winɔ. 2 Gbeeku yɑɑ ye nɑ wɑ yɑ sɑ̃ɑ nge musuku gbeeku, mɑ yen nɑɑsu sɑ̃ɑ nge wɔm gbɑ̃rogisu, yen nɔɔ gɑ mɑɑ sɑ̃ɑ nge gbee sunɔguu. Yɑɑ binti binti te, tɑ ten tiin dɑm gbeeku yɑɑ ye wɛ̃ kɑ mɑɑ ten sinɑ kitɑru kɑ ten yiiko bɑkɑ. 3 Gbeeku yɑɑ yen wii teeru tɑ sɑ̃ɑre tɑ mɛɛrɑ wɑ goo gookum, ɑdɑmɑ mɛɛrɑ ye, yɑ bɛkurɑ. Hɑnduniɑgibu kpuro bɑ ye mɛɛrɑ kɑ gidi, mɑ bɑ ye swĩi. 4 Tɔmbu kpuro bɑ yɑɑ binti binti te sɑ̃wɑ yèn sɔ̃ tɑ ten yiiko gbeeku yɑɑ ye wɛ̃. Bɑ mɑɑ gbeeku yɑɑ ye sɑ̃wɑ bɑ mɔ̀, wɑrɑ sɑ̃ɑ nge gbeeku yɑɑ yeni. Wɑrɑ koo kpĩ u kɑ ye tɑbu ko.
5 Bɑ derɑ gbeeku yɑɑ ye, yu woo kɑnɑ gɑri kɑ gɑri kɑm gere, bɑ mɑɑ ye yiiko kɑ̃ yu kɑ yegiru ko suru weeru, kɑ yiru. 6 Yerɑ yɑ yen nɔɔ wukiɑ yɑ Gusunɔ gɑri kɑm gerusim wɔri kɑ mɑɑ win yĩsiru, kɑ win wɑ̃ɑ yeru, kɑ be bɑ wɑ̃ɑ wɔllɔ. 7 Bɑ ye swɑɑ kɑ̃ yu kɑ nɑɑnɛ dokeobu tɑbu ko kpɑ yu bu tɑbu di. Bɑ mɑɑ ye yiiko wɛ̃ bweseru bɑɑteren wɔllɔ, kɑ tɔmbu kpuro kɑ bɑrum bɑɑmɛre kɑ tem bɑɑmɛre. 8 Bèn yĩsinu bɑ ǹ yoruɑ bu sere hɑnduniɑ tore, wɑ̃ɑrun tireru sɔɔ te tɑ sɑ̃ɑ Yɑ̃ɑ kinɛ kpɛndugiru te bɑ kɑ yɑ̃kuru kuɑ, beyɑ bɑ koo gbeeku yɑɑ ye sɑ̃.
9 Ǹ n mɛn nɑ, bɑɑwure wi u swɑɑ mɔ, u nɔɔwɔ. 10 Wi bɑ koo pirisɔm mwɑ, pirisɔmwɑ bɑ koo nùn mwɑ. Wi bɑ koo go kɑ tɑkobi, tɑkobiwɑ bɑ koo kɑ nùn go. Sɑɑ ye sɔɔ, n weenɛ nɑɑnɛ dokeobu bɑ n tɛmɑnɛ ben nɑɑnɛ dokebu sɔɔ.
11 Yen biruwɑ, nɑ kpɑm gbeeku yɑɑ gɑɑ wɑ yɑ yɑriɔ tem sɔɔn di. Yɑ kɔbi yiru mɔ nge yɑ̃ɑ kinɛ kpɛndun kɔbi, mɑ yɑ gɑri mɔ̀ nge yɑɑ binti bintiru. 12 Yɑɑ gbiikɑɑ yɑ derɑ yɑ yen yiiko dendimɔ yen nɔni biru. Yɑ tem kɑ mɛn tɔmbu tilɑsi kuɑ bu kɑ yɑɑ gbiikɑɑ ye sɑ̃ ye bɑ rɑɑ mɛɛrɑ kuɑ goo gookum, mɑ yɑ bɛkurɑ. 13 Yɑɑ yiruse yeni yɑ mɑɑmɑɑki dɑbinu kuɑ, sere yɑ derɑ dɔ̃ɔ u sɑrɑmɑ wɔllun di temɔ tɔmbun wuswɑɑɔ. 14 Yɑ hɑnduniɑn tɔmbu nɔni wɔ̃kuɑ kɑ mɑɑmɑɑki yèn yiiko bɑ ye wɛ̃ yu ko yɑɑ gbiikɑɑ yen nɔni biru. Yɑ hɑnduniɑgibu sɔ̃ɔmɔ bu yɑɑ gbiikɑɑ yen weenɑsiɑ koowo ye bɑ rɑɑ kɑ tɑkobi mɛɛrɑ kuɑ, mɑ yɑ kun gu. 15 Yɑɑ dɑ̃ɑkɑ ye, yɑ yiiko wɑ yu kɑ yɑɑ gbiikɑɑn weenɑsiɑ ye wɛ̃siɑ wɑ̃ɑrugiru wɛ̃ yu kɑ kpĩ yu gɑri ko nge tɔnu, kpɑ yu be bɑ yinɑ bu ye sɑ̃ kpuro go. 16 Mɑ yɑɑ ye, yɑ tɔmbu kpuro tilɑsi kuɑ, dɑmgibu kɑ bwɛ̃ɛbwɛ̃ɛbu, gobigibu kɑ sɑ̃ɑrobu, yobu kɑ tii mɔwɔbu bu kɑ bu yĩreru kuɑ ben nɔm geuɔ ǹ kun mɛ ben sirinɔ. 17 Goo sɑri wi u koo kpĩ u dwe ǹ kun mɛ u dɔrɑ mɑ n kun mɔ kɑ gbeeku yɑɑ yen yĩreru te tɑ sɑ̃ɑ yen yĩsiru, ǹ kun mɛ yen yĩsirun dɑmbɑ.
18 Ye yɑ bwisi bikiɑmɔ wee. Bɑɑwure wi u bwisi mɔ u koo kpĩ u gbeeku yɑɑ yen dɑmbɑn tubusiɑnu giɑ. Domi dɑmbɑ ye, yɑ sɑ̃ɑwɑ tɔnu goon dɑmbɑ. Yeyɑ nɑtɑ kɑ wɑtɑ kɑ nɔɔbɑ tiɑ (666).