10
Wɔllun gɔrɑdo
kɑ tire kure piibu
1 Nɑ mɑɑ kpɑm wɔllun gɔrɑdo dɑmgii goo wɑ u sɑrɑm wee wɔllun di. Guru wirɑ nùn wukiri, guru wɑɑ win wiru tɛ̃ke, win wuswɑɑ bɑllimɔ nge sɔ̃ɔ, mɑ win nɑɑsu sɑ̃ɑre dɔ̃ɔ yɑri. 2 U tire kure piibu gɑgu nɛni gɑ wukiɑre win nɔmuɔ. U win nɔm geun nɔɔ sɔndi nim wɔ̃kun wɔllɔ, mɑ u mɑɑ nɔm dwɑruguu sɔndi temɔ, 3 mɑ u kukurɑ nge gbee sunɔn swĩi. Ye u kukurɑ u kpɑ, yerɑ guru kukiribu nɔɔbɑ yiru yɑ nɔɔrɑ. 4 Ye guru kukiri bi, bu nɔɔrɑ bu kpɑ, mii mii nɑ sɔɔru kpɑ n kɑ gɑri yi yore. Adɑmɑ nɑ nɔɔ gɑgu nuɑ sɑɑ wɔllun di gɑ nɛɛ, ye guru kukiribu nɔɔbɑ yiru ye, yɑ geruɑ ɑ ku ye yore. A gɑri yi nɛnuɔ ɑsiri sɔɔ.
5 Yerɑ gɔrɑdo wi nɑ rɑɑ wɑ u yɔ̃ tem sɔɔ kɑ nimɔ, u win nɔm geu yiiyɑ wɔllɔ, 6 mɑ u bɔ̃ruɑ kɑ Gusunɔn yĩsiru wi u wɑ̃ɑ sere kɑ bɑɑdommɑɔ, wi u wɔllu kɑ ten gɑ̃ɑnu tɑkɑ kuɑ, kɑ tem kɑ mɛn gɑ̃ɑnu kɑ mɑɑ nim wɔ̃ku kɑ gen gɑ̃ɑnu. Gɔrɑdo wi, u geruɑ u nɛɛ, sɑɑ kun mɑɑ dɛnyɑsiɑrɔ. 7 Adɑmɑ sɑnɑm mɛ gɔrɑdo nɔɔbɑ yiruse u koo win kɔbɑ so, sɑnɑm mɛyɑ Gusunɔ u koo win himbɑ ye goo kun yɛ̃ yibiɑ nge mɛ u rɑɑ win sɔmɔbu sɔ̃ɔwɑ.
8 Yen biruwɑ nɔɔ ge nɑ rɑɑ nuɑ wɔllun di gɑ kɑ kpɑm mɑn gɑri kuɑ gɑ nɛɛ, ɑ doo ɑ tire kure piibu ge gɑ wukiɑre mi mwɑ gɔrɑdo win nɔmun di wi u yɔ̃ tem kɑ nim wɔllɔ.
9 Nɑ dɑ gɔrɑdo win mi, nɑ nùn kɑnɑ u mɑn tire kure piibu ge wɛ̃. Mɑ u mɑn sɔ̃ɔwɑ u nɛɛ, n gu mɔɔ n tem n mwɛ. Gɑ koo sosiɑ nɛn nukurɔ, ɑdɑmɑ nɛn nɔɔwɔ gɑ koo dorɑwɑ nge tim.
10 Nɑ tire kure piibu ge mwɑ win nɔmun di, mɑ nɑ gu temɑ. Geemɑ, nɛn nɔɔwɔ gɑ dorɑwɑ nge tim, ɑdɑmɑ ye nɑ gu mwɛ nɑ kpɑ, gɑ sosiɑwɑ dɑkɑ dɑkɑ nɛn nukurɔ.
11 Yerɑ bɑ mɑn sɔ̃ɔwɑ bɑ nɛɛ, kon kpɑm Gusunɔn gɑri gere tɔn dɑbiru kɑ tem dɑbinun sɔ̃, kɑ bwese dɑbiru kɑ mɑɑ sinɑm dɑbinun sɔ̃.