11
Seedɑ diobu yiru
1 Yen biru, bɑ mɑn yĩirutiɑ gɑɑ wɛ̃, ye yɑ sɑ̃ɑ nge dɛkɑ mɑ bɑ mɑn sɔ̃ɔwɑ bɑ nɛɛ, n seewo n dɑ n Gusunɔn sɑ̃ɑ yeru yĩire kɑ yɑ̃ku yeru, kpɑ n bu gɑri be bɑ sɑ̃ɑru mɔ̀ mi. 2 Adɑmɑ n ku yen tɔɔ yɑɑrɑ yĩire, domi bɑ ye tɔn tukobu kɑ̃ be bɑ koo wuu dɛɛrɔ tɑɑku sere suru weeru kɑ yiru. 3 U koo de win seedɑ diobu yiru bu win gɑri gere bɑ n sɑɑkibɑ sebuɑ, sere sɔ̃ɔ nɔrɔbu kɑ goobu kɑ wɑtɑ (1.260).
4 Seedɑ diobu yiru ye, bɑ sɑ̃ɑ olifin dɑ̃nu yiru ye, kɑ dɑbunu yiru ni nu yɔ̃ Gusunɔ tem kpuron Yinnin wuswɑɑɔ. 5 Goo ù n kĩ u bu kɔ̃sɑ kuɑ, dɔ̃ɔwɑ rɑ yɑri ben nɔsun di u ben yibɛrɛbɑ kpeerɑsiɑ, nge mɛyɑ wi u kɑsu u bu kɔ̃sɑ kuɑ, u koo kɑ gbi. 6 Bɑ dɑm mɔ bu kɑ wɔllu kɛnɛ, gurɑ yu ku kɑ nɛ sɑɑ ye bɑ Gusunɔn gɑri gerumɔ. Bɑ mɑɑ dɑm mɔ nim wɔllɔ bu kɑ mu gɔsiɑ yɛm. Bɑ mɑɑ kpɑm dɑm mɔ bu kɑ hɑnduniɑ bɑrɑ bwese bwesekɑ kpɛ̃ɛ nge mɛn nɔɔ bɑ kĩ.
7 Sɑnɑm mɛ bɑ koo seedɑ di bu kpe, yerɑ gbeeku yɑɑ ye yɑ yɑrɑ wɔru nɔru sɑriruguu gen min di yɑ koo kɑ bu tɑbu ko, yu bu kɑmiɑ kpɑ yu bu go. 8 Ben gonu ko n kpĩ wuu bɔkɔ gen swɑɑ sɔɔ, wuu mi bɑ ben Yinni dɑ̃ɑ bunɑnɑru kpɑre. Wuu gen yĩsirɑ bɑ weenɑsinɑ kɑ Sodomu, ǹ kun mɛ kɑ Egibiti. 9 Tɔn dɑbinu sɑɑ hɑnduniɑn tɔmbu kpuron min di kɑ bwesenu kpuron di kɑ bɑrum bɑɑmɛren di kɑ sere tem kpuron di bɑ koo ben gonu mɛɛri sɔ̃ɔ itɑ kɑ bɔnu, bɑ ǹ koo wurɑ bu bu sike. 10 Hɑnduniɑn tɔmbun nukurɑ koo dorɑ, bɑ koo tɔ̃ɔ bɑkɑru ko kpɑ bu kɛ̃nu mɔrisiɑnɑ yèn sɔ̃ Gusunɔn sɔmɔbu yiru be bɑ rɑɑ hɑnduniɑgibu tɔ̃yɑ kuɑ mi, bɑ gu. 11 Sɔ̃ɔ itɑ kɑ bɔnu yen biru, Gusunɔ u kpɑm goo ni wɛ̃siɑ wɑ̃ɑrugiru wesiɑ, mɑ nu seewɑ nu yɔ̃rɑ. Bɛrum bɑkɑm tɔn be kpuro mwɑ be bɑ nu wɑ. 12 Yerɑ Gusunɔn sɔmɔbu yiru ye, bɑ nɔɔgiru nuɑ wɔllun di bɑ nɛɛ, i yɔɔmɑ gee. Bɑ yɔɔwɑ wɔllɔ guru wiru sɔɔ sɑnɑm mɛ ben yibɛrɛbɑ bɑ bu mɛɛrɑ. 13 Mii mii mɑ tem yĩirɑ gem gem, mɑ wuu gen bɔnu wɔkuruse yɑ wɔrumɑ. Tɔn be bɑ gu tem yĩiru bi sɔɔ, ben geerɑ sɑ̃ɑ tɔnu nɔrɔbun subɑ nɔɔbɑ yiru (7.000). Tɔn be bɑ tie, mɑ bɑ nɑndɑ gem gem, mɑ bɑ Wɔrukoo bɛɛrɛ wɛ̃.
14 Tɛ̃, gbee swɑ̃ɑ yiruserɑ doonɑ, wee itɑserɑ nɔɔ kɔrumɑ.
Kɔbɑ nɔɔbɑ yiruse
15 Yen biru wɔllun gɔrɑdo nɔɔbɑ yiruse u win kɔbɑ so. Yerɑ nɔɔ dɑmgisu nɔɔrɑ Gusunɔ wɔllɔ su nɛɛ, hɑnduniɑ yenin bɑndɑ kuɑ Gusunɔ bɛsɛn Yinni kɑ win Kirisigiru. U ko n bɑndu dii sere kɑ bɑɑdommɑɔ. 16 Sɑnɑm mɛyɑ guro gurobu yɛndɑ nnɛ ye, be bɑ sɔ̃ ben sinɑ kitɑnu wɔllɔ Gusunɔn wuswɑɑɔ, bɑ kpunɑ bɑ Gusunɔ sɑ̃ɑmɔ 17 bɑ mɔ̀,
Gusunɔ Yinni dɑm kpurogii,
wunɛ wi ɑ wɑ̃ɑ tɛ̃,
ɑ rɑɑ mɑɑ wɑ̃ɑ,
sɑ nun siɑrɑmɔ
yèn sɔ̃ ɑ wunɛn dɑm bɑkɑm dendɑ,
mɑ ɑ wunɛn bɑn dibu toruɑ.
18 Hɑnduniɑgibu bɑ mɔru bɛsirɑ.
Mɑ wunɛn mɔru yɑ tunumɑ.
Sɑɑ yɑ turɑ bu kɑ gɔribu siri.
Sɑɑ mɑɑ turɑ bu kɑ wunɛn sɔmɔbu ɑre wɛ̃,
kɑ be bɑ nun nɑɑnɛ doke
kɑ be bɑ wunɛn yĩsiru nɑsie, bɑkɑ kɑ buu.
Sɑɑ mɑɑ turɑ bu kɑ bu kɑm koosiɑ
be bɑ hɑnduniɑ kɑm mɔ̀.
19 Yerɑ bɑ sɑ̃ɑ yee te tɑ wɑ̃ɑ Gusunɔ wɔllɔ kɛniɑ mɑ woodɑn kpɑkororɑ terɑ win sɑ̃ɑ yee te sɔɔ. Mɑ guru mɑɑkinu wɑ̃ɑ mi, kɑ wurenu, kɑ guru gbɑ̃sukunu kɑ tem yĩirubu, kɑ mɑɑ guru kpee bɑkɑnu.