5
Tire kureru
kɑ Yɑ̃ɑ kinɛ kpɛndu
1 Wee nɑ wɑ wi u sɔ̃ sinɑ kitɑ ten wɔllɔ u tire kureru gɑru nɛni win nɔm geuɔ. Bɑ tire te yoruɑwɑ biru kɑ wuswɑɑ, mɑ bɑ tu yĩrenu nɔɔbɑ yiru koosi. 2 Mɑ nɑ wɔllun gɔrɑdo dɑmgii goo wɑ u gbɑ̃rɑ kɑ dɑm u nɛɛ, wɑrɑ yiiko mɔ u kɑ yĩre ni kusiɑ kpɑ u tire kure te wukiɑ.
3 Adɑmɑ goo sɑri wi u wɑ̃ɑ wɔllɔ ǹ kun mɛ temɔ ǹ kun mɛ tem sɔɔwɔ wi u kpĩɑ u tire kure te wukiɑ u mɛɛrɑ ten sɔɔwɔ. 4 Nɑ swĩ gem gem yèn sɔ̃ goo sɑri wi u yiiko mɔ u kɑ tire kure te wukiɑ u ten sɔɔ mɛɛri. 5 Yerɑ guro guro ben turo mɑn sɔ̃ɔwɑ u nɛɛ, n ku swĩ. Wee, gbee sunɔ ge gɑ yɑrɑ Yudɑn bweserun di, ge gɑ sɑ̃ɑ nge kpii kpɑɑru Dɑfidin yɛnuɔ, gɑ tɑbu di, gɑ koo kpĩ gu yĩrenu nɔɔbɑ yiru ye kusiɑ kpɑ gu tire te wukiɑ.
6 Nɑ mɛɛrɑ mɑ nɑ Yɑ̃ɑ kinɛ kpɛndu wɑ tɑ yɔ̃ sinɑ kitɑrun suunu sɔɔ, mɑ hunde koni nnɛ kɑ guro guro be, bɑ tu sikerenɛ. Yɑ̃ɑ kinɛ kpɛm te, tɑ sɑ̃ɑre bɑ kɑ tu yɑ̃kuru koore, tɑ kɔbɑ nɔɔbɑ yiru mɔ kɑ mɑɑ nɔni nɔɔbɑ yiru yi yi sɑ̃ɑ Gusunɔn hundebɑ nɔɔbɑ yiru, be u gɔrɑ hɑnduniɑ kpuro sɔɔ. 7 Yɑ̃ɑ kinɛ kpɛm te, tɑ dɑ win mi wi u sɔ̃ sinɑ kitɑrɔ, mɑ tɑ tire kure te mwɑ win nɔm geun di. 8 Ye tɑ kuɑ mɛ, yerɑ hunde koni nnɛ ye kɑ guro gurobu yɛndɑ nnɛ ye, bɑ kpunɑ Yɑ̃ɑ kinɛ kpɛm ten wuswɑɑɔ. Ben bɑɑwure u mɔrɔku mɔ kɑ wurɑn bweebu mì sɔɔ turɑre wɑ̃ɑ ye yɑ sɑ̃ɑ nɑɑnɛ dokeobun kɑnɑnu. 9 Mɑ bɑ wom kpɔɔ kuɑ bɑ mɔ̀,
wunɑ ɑ yiiko mɔ ɑ kɑ tire kure te mwɑ
kpɑ ɑ yĩre ni kusiɑ.
Domi bɑ rɑɑ kɑ nun yɑ̃kuru kuɑ.
Mɑ ɑ Gusunɔn tɔmbu yɑkiɑ kɑ wunɛn yɛm
sɑɑ bweseru bɑɑtere kɑ bɑrum bɑɑmɛre
kɑ tɔmbu kpuro kɑ tem bɑɑmɛren min di.
10 A bu mɛnnɑ ɑ kuɑ ben sunɔ,
ɑ bu kuɑ Gusunɔ bɛsɛn Yinnin yɑ̃ku kowobu.
Bɑ koo bɑndu di hɑnduniɑ kpuro sɔɔ.
11 Nɑ kpɑm mɛɛrɑ mɑ nɑ wɔllun gɔrɑdo dɑbirun nɔɔ nuɑ, ben geerɑ turɑ nɔrɔn nɔrɔn subɑ nɔrɔbu. Bɑ sinɑ kitɑ te kɑ mɑɑ hunde koni nnɛ ye kɑ guro guro be sikerenɛ. 12 Bɑ nɔɔgiru suɑ bɑ mɔ̀,
Yɑ̃ɑ kinɛ kpɛm te bɑ rɑɑ kɑ yɑ̃kuru kuɑ,
tɑ turɑ bu kɑ tu yiiko wɛ̃,
kɑ dukiɑ, kɑ yɛ̃ru, kɑ dɑm,
kɑ bɛɛrɛ, kɑ girimɑ, kɑ siɑrɑbu.
13 Mɑ nɑ nuɑ tɑkɑ koorɑ kpuro, ye yɑ wɑ̃ɑ wɔllɔ kɑ temɔ, kɑ tem sɔɔwɔ, kɑ nim wɔ̃ku sɔɔ, ye yɑ wɑ̃ɑ hɑnduniɑ sɔɔ kpuro gesi yɑ nɔɔgiru sue yɑ mɔ̀,
wi u sɔ̃ sinɑ kitɑrɔ kɑ Yɑ̃ɑ kinɛ kpɛm te,
beyɑ bɑ siɑrɑbu kɑ bɛɛrɛ kɑ yiiko kɑ sinɑndu mɔ
sere kɑ bɑɑdommɑɔ.
14 Mɑ hunde koni nnɛ ye, yɑ wurɑ yɑ nɛɛ, ɑmi. Mɑ guro guro be, bɑ kpunɑ bɑ sɑ̃ɑru kuɑ.