6
Yĩrenu
1 Yerɑ nɑ wɑ Yɑ̃ɑ kinɛ kpɛm te, tɑ yĩrenu nɔɔbɑ yiru yen teeru kusiɑ, mɑ nɑ nuɑ hunde koni ben turo gbɑ̃rɑ nge gurɑ u goo sɔ̃ɔwɑ u nɛɛ, ɑ yɑrimɑ. 2 Ye nɑ mɛɛrɑ, yerɑ nɑ dum kɑɑ wɑ. Wi u ye sɔni u tɛndu nɛni, mɑ bɑ nùn sinɑ furɔ dokeɑ. U swɑɑ wɔri nge tɑbu dio wi u dɔɔ u kpɑm tɑbu diimɑ.
3 Yerɑ Yɑ̃ɑ kinɛ kpɛm te, tɑ yĩreru yiruse kusiɑ, mɑ nɑ nuɑ hunde koni ben yiruse u goo sɔ̃ɔwɑ u nɛɛ, ɑ yɑrimɑ. 4 Dumɑ gɑɑ kpɑm yɑrɑ yɑ sɑ̃ɑ dum swɑ̃ɑ. Wi u ye sɔni bɑ nùn dɑm kɑ̃ u kɑ tɑbu yɛ̃bi hɑnduniɑ sɔɔ kpɑ tɔmbu bu kɑ goonɑ. Mɑ bɑ nùn tɑkobi bɑkɑ gɑɑ wɛ̃.
5 Yerɑ Yɑ̃ɑ kinɛ kpɛm te, tɑ yĩreru itɑse kusiɑ, mɑ nɑ nuɑ hunde koni ben itɑse u goo sɔ̃ɔwɑ u nɛɛ, ɑ yɑrimɑ. Nɑ mɛɛrɑ mɑ nɑ dum wɔ̃kɑ wɑ. Wi u ye sɔni u tongoro nɛni win nɔmɑɔ. 6 Mɑ nɑ nɔɔ gɑgu nuɑ gɑ sɑ̃ɑre gɑ wee hunde koni nnɛ yen min di gɑ nɛɛ, ɑlikɑmɑ kilo tiɑn geerɑ sɑ̃ɑ sɔ̃ɔ teerun sɔmburun gobi. Mɛyɑ mɑɑ ɔɔsu kilo itɑn geerɑ nɛ. Adɑmɑ ɑ ku gum kɑ tɑm sɑnku.
7 Yerɑ Yɑ̃ɑ kinɛ kpɛm te, tɑ yĩreru nnɛse kusiɑ. Mɑ nɑ nuɑ hunde koni ben nnɛse u goo sɔ̃ɔwɑ u nɛɛ, ɑ yɑrimɑ. 8 Nɑ mɛɛrɑ mɑ nɑ wɑ dum bɛrɔ wuruwɑ. Wi u ye sɔni, win yĩsirɑ Gɔɔ, mɑ gɔribun wɑ̃ɑ yerɑ nùn swĩi. Beyɑ bɑ yiiko wɛ̃ bu kɑ hɑnduniɑn bɔnu nnɛse go kɑ tɑkobi, kɑ gɔ̃ɔru, kɑ bɑrɑnu, kɑ mɑɑ gbeeku yɛɛ yi yi wɑ̃ɑ tem mɛ sɔɔ.
9 Yen biru Yɑ̃ɑ kinɛ kpɛm te, tɑ yĩreru nɔɔbuse kusiɑ. Mɑ nɑ tɔmbun hundebɑ wɑ yɑ̃ku yerun kɔkɔrɔ be bɑ go Gusunɔn gɑri kɑ seedɑ ye bɑ din sɔ̃. 10 Tɔmbun hunde beyɑ bɑ gbɑ̃rɑ bɑ nɛɛ, Yinni dɛɛro, gemgii, sere sɑɑ yerɑ̀ ɑ mɑrɑ ɑ kɑ hɑnduniɑn tɔmbu siri kpɑ ɑ bu sɛɛyɑsiɑ yèn sɔ̃ bɑ sun go.
11 Bɑ ben bɑɑwure yɑbe kpikiru sebusiɑ, mɑ bɑ bu sɔ̃ɔwɑ bu wɛ̃ro fiiko ginɑ sere ben sɔm kowosibu kɑ begibun geeru tu kɑ yibu be n tie bu go, nge mɛ bɑ mɑɑ be go.
12 Nɑ kpɑm mɛɛrɑ sɑnɑm mɛ Yɑ̃ɑ kinɛ kpɛm te, tɑ yĩreru nɔɔbɑ tiɑse kusiɑ. Mɑ tem mu yĩirɑ kɑ dɑm, mɑ sɔ̃ɔ tĩrɑ niki niki nge beku wɔ̃ku sinumgiru, mɑ suru swɛ̃rɑ kom kom nge yɛm. 13 Kperi mɑɑ wɔrukumɔ temɔ nge mɛ gɑndun bii birenu rɑ dɛrure sɑnɑm mɛ woo dɑmguu gɑ tu sirɑmɔ. 14 Mɑ wɔllɑ kururɑ nge tireru mɑ guuru bɑɑtere kɑ tem bureru bɑɑtere nu sin yenu kɔsɑ. 15 Sɑnɑm mɛyɑ hɑnduniɑn sinɑmbu kɑ tem yɛ̃robu kɑ tɑbu sinɑmbu kɑ ɑtɑsiribɑ kɑ dɑmgibu, tɔmbu kpuro gesi, yobu kɑ tii mɔwɔbu, bɑ tii beruɑ kpee wɔrusɔ kɑ kpee bɑɑbɑ sɔɔ. 16 Bɑ guunu kɑ kpenu nɔɔgiru mɔ̀ bɑ mɔ̀, i sun sɛ̃sikio, i bere sɑɑ win wuswɑɑn di wi u sɔ̃ sinɑ kitɑrɔ kɑ sere Yɑ̃ɑ kinɛ kpɛm ten mɔrun di. 17 Domi ben mɔrun tɔ̃ɔ bembere te, tɑ tunumɑ. Wɑrɑ u koo kpĩ u yɔ̃rɑ u tu mɑ.