4
Sɑ̃ɑ te tɑ wɑ̃ɑ Gusunɔ wɔllɔ
1 Yen biru nɛ Yohɑnu nɑ mɛɛrɑ nɑ wɑ kɔnnɔ gɑgu gɑ kɛniɑre Gusunɔ wɔllɔ.
Mɑ nɑ mɑɑ nɔɔ ge nuɑ ge gɑ sɑ̃ɑ nge kɑ̃ɑkɑ̃ɑgi ge gɑ rɑɑ gbiɑ gɑ kɑ mɑn gɑri kuɑ. Gɑ kpɑm nɛɛ, n yɔɔmɑ mi kpɑ u mɑn sɔ̃ɔsi ye yɑ koo nɑ ɑmɛn biru. 2 Mii mii Hunde Dɛɛro derɑ nɑ kɑ̃sɑ. Wee, nɑ sinɑ kitɑru wɑ Gusunɔ wɔllɔ, goo u sɔ̃ te sɔɔ. 3 Wi u sɔ̃ mi, win wuswɑɑ bɑllimɔ nge ni nu nɔni bwese bwesekɑ mɔ kɑ ni nu nɔni swɑ̃ɑru mɔ. Guru wɑɑ yɑ sinɑ kitɑ te sikerenɛ yɑ bɑllimɔ nge kpee te tɑ nɔni wuru beku mɔ. 4 Mɑ sinɑ kitɑnu yɛndɑ nnɛ nu sinɑ kitɑ te kooro bure. Mɑ guro gurobu yɛndɑ nnɛ bɑ sɔ̃ kitɑ nin wɔllɔ bɑ yɑ̃ɑ kpikinu doke kɑ furɔ wurɑgisu. 5 Yerɑ sɑɑ sinɑ kitɑ ten min di guru mɑɑkinu yɑrimɔ kɑ wurenu kɑ guru gbɑ̃sukunu. Fitilɑkunu nɔɔbɑ yiru ni nu sɔ̃re nu wɑ̃ɑ sinɑ kitɑ ten wuswɑɑɔ. Niyɑ nu sɑ̃ɑ Gusunɔn hundebɑ nɔɔbɑ yiru. 6 Sinɑ kitɑ ten wuswɑɑɔ yɛru gɑgun bweserɑ wɑ̃ɑ mi, ge gɑ kɑ diki weenɛ.
Sinɑ kitɑ ten suunu sɔɔ kɑ ten gɔn gɔnkɑ, hunde konibɑ nnɛ bɑ wɑ̃ɑ mi, bɑ nɔni dɑbinu mɔ biru kɑ wuswɑɑ. 7 Hunde koni gbiikɑɑ yɑ sɑ̃ɑ nge gbee sunɔ, mɑ yiruse sɑ̃ɑ nge nɑɑ buu. Itɑsen wuswɑɑ sɑ̃ɑ nge tɔnugiɑ, mɑ nnɛse yɑ kɑ gunɔ bɑkeru weenɛ te tɑ yɔ̃ɔwɑ. 8 Hunde koni nnɛ yen bɑɑyere yɑ kɑsɑ nɔɔbɑ tiɑ tiɑ mɔ, mɑ yi nɔni mɔ yɑm kpuro tɔɔwɔ kɑ sɔɔwɔ. Bɑ rɑ n womu mɔ̀ kpeetim sɑri sɔ̃ɔ sɔɔ kɑ wɔ̃kuru bɑ n mɔ̀,
Dɛɛro! Dɛɛro! Dɛɛro!
Mɛyɑ Yinni Gusunɔ Dɑm kpurogii u sɑ̃ɑ,
wi u rɑɑ wɑ̃ɑ, wi u wɑ̃ɑ, wi u mɑɑ sisi.
9 Sɑnɑm mɛ hunde koni be, bɑ yiiko kɑ bɛɛrɛ kɑ tɑkɑrun womusu nùn kuɑmmɛ wi u wɑ̃ɑ kɑ bɑɑdommɑɔ, mɑ u sɔ̃ sinɑ kitɑ ten wɔllɔ, 10 sɑnɑm mɛyɑ guro gurobu yɛndɑ nnɛ ye, bɑ nùn kpunɑmmɛ bɑ nùn sɑ̃ɑmɔ. Bɑ mɑɑ ben furɔsu pwetirimɔ bɑ kɑsi mɔ̀ sinɑ kitɑ ten wuswɑɑɔ bɑ mɔ̀,
11 Gusunɔ bɛsɛn Yinni, wunɑ ɑ dɑm kɑ yiiko mɔ,
wunɑ sɑ ko bɛɛrɛ wɛ̃.
Domi wunɑ ɑ gɑ̃ɑnu kpuro tɑkɑ kuɑ.
Wunɛn kĩrun sɑɑbuwɑ nu kɑ wɑ̃ɑ nu wɑsi.
Ten sɑɑbuwɑ nu mɑɑ kɑ tɑkɑ koorɑ.