2
Keu koosio weesugibu
(I mɑɑ mɛɛrio Yudu -4-13)
1 Adɑmɑ sɔmɔ weesugibɑ rɑɑ wɑ̃ɑ tɔn ben suunu sɔɔ. Mɛyɑ mɑɑ keu koosio weesugibɑ koo kurɑmɑ bɛɛn suunu sɔɔ. Bɑ koo kɑ sɔ̃ɔsi weesuginu nɑ kɑ bwisi, ni nu rɑ tɔmbu kɑm koosie kpɑ bu Yinni wi u bu yɑkiɑ yinɑ. Nge mɛyɑ bɑ koo tii kɑm kobu sure suɑru sɔɔ. 2 Tɔn dɑbirɑ koo ben dɑɑ bɛrɛtɛkɛ swĩi, kpɑ ben sɔ̃, gɑbu bu gem swɑɑ wɔmɛ. 3 Keu koosio weesugii ben binɛn sɔ̃, bɑ koo bɛɛ tɑki di kɑ ben gɑri yi bɑ bwisikɑ bɑ sekɑ. Adɑmɑ sɑɑ tɛɛbun di ben siri kowo sɔɔru sɑ̃ɑ u kɑ bu siri. Wi u koo mɑɑ bu kɑm koosiɑ u ǹ dò.
4 Domi Gusunɔ u ǹ wɔllun gɔrɑdobɑ deri be bɑ rɑɑ torɑ, ɑdɑmɑ u bu sure gɔriɔ mi bɑ bu nɛni wɔru sɔɔ yɑm wɔ̃kurɔ sere siribun tɔ̃ru. 5 U ǹ mɑɑ yeruku tɔmbu deri ɑdɑmɑ u Nɔwɛ fɑɑbɑ kuɑ wi u gem kpɑrɑ kɑ kpɑm tɔmbu nɔɔbɑ yiru gɑbu ye u kɑ derɑ nim yibu bɑkɑrɑ nɑ tɑ hɑnduniɑn tɔmbu wukiri be bɑ ǹ win bɛɛrɛ yɛ̃. 6 U wuu si bɑ sokumɔ Sodomu kɑ Gomɔrɑ tɑɑrɛ wɛ̃ mɑ u su kɑm koosiɑ kɑ dɔ̃ɔ. Nge mɛyɑ su kuɑ yĩreru tɔn kɔ̃so be bɑ koo rɑ nɑn sɔ̃. 7 Mɑ u tɔn geo wi bɑ mɔ̀ Lɔtu yɑrɑ wi u rɑ n nuki sɑnkire tɔn kɔ̃so ben dɑɑ bɛrɛtɛkɛn sɔ̃. 8 Domi durɔ wi, u sɑ̃ɑ tɔn geo tɔn ben suunu sɔɔ. Yɑm sɑ̃reru bɑɑteren kɔ̃sɑ ye u wɑɑmɔ kɑ ye u nɔɔmɔ yɑ win gɔ̃ru dɛɛrɔ tɔ̃yɑ mɔ̀. 9 Ǹ n mɛn nɑ Gusunɔ u yɛ̃ mɛ u koo kɑ be bɑ win bɛɛrɛ yɛ̃ yɑrɑ sɑɑ lɑɑkɑri mɛɛribun di. U mɑɑ yɛ̃ mɛ u koo tɔn kɔ̃sobu yi u kɑ bu wɑhɑlɑ ko siribun sɑnɑm, 10 n mɑm nɛɛre be bɑ ben wɑsin kĩru kɑnkɑm mɔ̀ mɑ bɑ Gusunɔn yiiko gɛmɑ.
Keu koosio weesugii be, bɑ sɑ̃ɑwɑ wɔbiɑgibu kɑ tii suobu, bɑ ǹ mɑɑ bɛrum mɔ bu kɑ wɔllun yiikogibu wɔmɛ. 11 Bɑɑ Gusunɔn gɔrɑdobɑ, be bɑ bu dɑm kɑ yiiko kere gem gem, bɑ ǹ wɔllun yiikogibu tɑɑrɛ wɛ̃ɛmɔ kɑ wɔmburu Yinni Gusunɔn wuswɑɑɔ. 12 Adɑmɑ mɑrumɑrɑ tɔn be, bɑ kɑ yeni mɔ̀ nge yɛɛ yi yi wɑ̃ɑ bu kɑ mwɑ bu gon sɔ̃. Ye bɑ kun tubɑ yerɑ bɑ wɔmmɔ. Bɑ koo mɑɑ kɑm kowɑ nge yɛɛ yi. 13 Kɔ̃sɑ ye bɑ gɑbu kuɑ, yerɑ bɑ koo bu kɔsie. Bɑ rɑ n nuku dobu mɔ bɑ̀ n ben wɑsin kĩnu kɑnkɑm mɔ̀ sɔ̃ɔ sɔɔ gbɑ̃ɑrɑ. Bɑ sɑ̃ɑ nge too yɑ̃kuru, sɑnɑm mɛ bɑ dimɔ kɑ bɛɛ sɑnnu kɑ ben ɑkɑnu, mɑ bɑ yɛ̃ɛrimɔ ben tɑki ye bɑ tɔmbu dimɔ sɔɔ. 14 Bɑ rɑ n sɑkɑrɑrun nɔni mɔ, torɑnu ku rɑ bu turi. Bɑ rɑ be bɑ kun yɔ̃ dim dim yinɑ mwɛ. Ben gɔ̃ru gɑ binɛn dɔɔnɛ mɔ. Gusunɔ u bu bɔ̃rusi. 15 Bɑ swɑɑ geɑ deri mɑ bɑ kɔ̃ɔrɑ. Bɑ Bɑlɑmu, Beorun biin swɑɑ swĩi wi u kɔ̃sɑn kobun ɑre kĩɑ. 16 Adɑmɑ Gusunɔ u nùn gerusi win torɑrun sɔ̃. Geemɑ kɛtɛku ge gɑ ku rɑ gɑri ko gɑ kɑ nùn gɑri kuɑ nge tɔnu mɑ gɑ Gusunɔn sɔmɔ win wiirɑ kookoosu yɔ̃rɑsiɑ.
17 Tɔn be, bɑ sɑ̃ɑwɑ bwii nim sɑribɑ kɑ bukɔ ge woo gɑ bɔrikiɑmɔ. Gusunɔ u bu yɑm wɔ̃kuru yiiye tɑ kpɑ̃. 18 Bɑ woo kɑnɑ gɑri gerumɔ yi yi ǹ wiru mɔ. Bɑ tɔnun gɔ̃run binɛ kɑnkɑm dendimɔ bu kɑ gɑbu yinɑ mwɑ be bɑ kisirɑmɑ sɑɑ be bɑ toren min di. 19 Bɑ bu tii mɔru nɔɔ mwɛɛru kuɑmmɛ, ɑdɑmɑ ben tii bɑ sɑ̃ɑwɑ ye yɑ kɑ bu kɑm koore dɔɔn yobu. Domi bɑɑwure sɑ̃ɑwɑ ye yɑ nùn kɑmiɑn yoo. 20 Geemɑ, tɔmbu bɑ̀ n hɑnduniɑn dɑɑ bɛrɛtɛkɛ kisirɑri yèn sɔ̃ bɑ bɛsɛn Yinni Fɑɑbɑ kowo Yesu Kirisi giɑ, mɑ bɑ kpɑm derɑ yɑ bu mwɑ yɑ kɑmiɑ nɔn mɛɛruse, ben wɑ̃ɑ gbiikirɑ koo sɑ̃ɑyɑ kɑ sere dɑ̃ɑkiru. 21 N ko n dɑɑ sɑnɔ bɑ kun gem swɑɑ giɑre kɑ sere bu ye giɑ kpɑ bu woodɑ dɛɛrɑ biru kisi ye bɑ bu wɛ̃. 22 Ye n bu deemɑ yɑ sɔ̃ɔsimɔ mɑ mɔn teni tɑ gem gerumɔ te tɑ nɛɛ, <<Bɔ̃ɔ gɑ wurɑ gɑ gen siɑnu dɑbirimɔ, mɑ kurusɔ ge bɑ woburɑ gɑ kpɑm yironu burimɔ.>>