TIRERU YIRUSE
TE PIƐƐ U YORUA
1
Tɔbiribu
1 Bɛɛ be Yesu Kirisi bɛsɛn Yinni kɑ bɛsɛn Fɑɑbɑ kowo geegii u nɑɑnɛ dokebu wɛ̃ nge bɛsɛ, nɛ Simɔɔ Piɛɛ, win yoo kɑ win gɔro, nɛnɑ nɑ bɛɛ tire te yoruɑmmɛ. 2 Durom kɑ ɑlɑfiɑ n bɛɛ sosiɑ yèn sɔ̃ i Gusunɔ yɛ̃ kɑ mɑɑ Yesu bɛsɛn Yinni.
Yesugiin dɑɑ
3 Win sinɑru tɑ sun kpuro wɛ̃ yèn bukɑtɑ sɑ mɔ sɑ n kɑ wɑ̃ɑru mɔ sɑ n Gusunɔ sɑ̃ɑmɔ, kpɑ sɑ n nùn giɑmɔ wi, wi u sun sokɑ kɑ win yiiko kɑ win tɔn geeru. 4 Nge mɛyɑ u sun nɔɔ mwɛɛ bɑkɑ bɛɛrɛginu kuɑ kpɑ i n kɑ bɔnu mɔ win dɑɑ sɔɔ, sɑnɑm mɛ i sɑnkirɑnu suuri ni nu wɑ̃ɑ hɑnduniɑ sɔɔ binɛn sɔ̃. 5 Yen sɔ̃, i kookɑri koowo i kɑ bɛɛn nɑɑnɛ dokebu sɔɔ lɑsɑbu geɑ sosi, kpɑ i lɑsɑbu geɑ sɔɔ yɛ̃ru sosi, 6 kpɑ i yɛ̃ru sɔɔ gɑyɑ sosi, kpɑ i gɑyɑ sɔɔ, suuru sosi, kpɑ i suuru sɔɔ Gusunɔn bɛɛrɛ yɛ̃ru sosi, 7 kpɑ i Gusunɔn bɛɛrɛ yɛ̃ru sɔɔ tɔn geeru sosi, kpɑ i tɔn geeru sɔɔ kĩru sosi. 8 Gɑ̃ɑ nini, nù n wɑ̃ɑ bɛɛ sɔɔ mɑ nu sosimɔ nu ǹ derimɔ i ko gɑru koo sɑrirugibu. Bɛɛn sɔmburɑ kun mɑɑ mɔ̀ ɑrufɑɑni sɑrirugiru n wɑ i kɑ bɛsɛn Yinni Yesu Kirisi giɑ sɑ̃ɑ sɑ̃ɑ. 9 Adɑmɑ wìn mi gɑ̃ɑ ni, nu ǹ wɑ̃ɑ, wiyɑ sɑ̃ɑ nge wɔ̃ko, u ku rɑ wɑ sɑruɔ. U mɑɑ duɑri mɑ bɑ nùn dɛɛrɑsiɑ win gɑsɔn durum di.
10 Yen sɔ̃, nɛgibu, i hɑniɑ sosio i kɑ giɑ sɑ̃ɑ sɑ̃ɑ mɑ Gusunɔwɑ u bɛɛ sokɑ mɑ u bɛɛ gɔsɑ, domi ì n kuɑ mɛ, i ǹ sokurɑmɔ kɑ bɑɑdommɑɔ. 11 Nge mɛyɑ bɑ koo de i du kɑ bɛɛrɛ mi bɛsɛn Yinni Fɑɑbɑ kowo Yesu Kirisi u bɑndu dii sere kɑ bɑɑdommɑɔ.
12 Yen sɔ̃nɑ, ko nɑ n dɑ n sɔɔru sɑ̃ɑ n kɑ bɛɛ gɑ̃ɑ ni yɑɑyɑsiɑ bɑɑ mɛ i nu yɛ̃ kɔ, bɑɑ mɛ i mɑɑ yɔ̃ dim dim gem mɛ sɔɔ, mɛ i wurɑ. 13 Adɑmɑ nɑ tɑmɑɑ n weenɛ sɑɑ ye nɑ wɑ̃ɑ hunde sɔɔ, nɑ n dɑ n bɛɛ gɑ̃ɑ ni yɑɑyɑsiɑmɔ kpɑ bɛɛn lɑɑkɑri yɑ n kɑ seewɑ. 14 Domi nɑ yɛ̃ mɑ ǹ n sosi kon wɑsi yini deri nge mɛ bɛsɛn Yinni Yesu Kirisi u mɑn sɔ̃ɔsi. 15 Mɛyɑ kon kookɑri ko kpɑ i kɑ kpĩ i gɑ̃ɑ ni yɑɑyɑ sɑɑ bɑɑyere nɛn doonɑrun biru.
Be bɑ Kirisin yiiko wɑ
16 Kɑ gem, sɑ ǹ sukɑ swĩi ye tɔmbɑ kuɑ kɑ ben bwisi, sɑnɑm mɛ sɑ bɛɛ bɛsɛn Yinni Yesu Kirisin dɑm kɑ win wurɑmɑru giɑsiɑ. Sɑ win kpɑ̃ɑru wɑwɑ kɑ bɛsɛn nɔni. 17 Domi sɑnɑm mɛ Gusunɔ Bɑɑbɑ u nùn bɛɛrɛ kɑ yiiko wɛ̃, u nɔɔ gɑgu nuɑ sɑɑ yiiko bɑkɑgiin min di gɑ nɛɛ, <<Winiwɑ nɛn Bii kĩnɑsi wì sɔɔ nɛn gɔ̃ru dobu kpuro wɑ̃ɑ.>> 18 Bɛsɛn tii sɑ nɔɔ ge nuɑ gɑ nɑ wɔllun di sɑnɑm mɛ sɑ wɑ̃ɑ kɑ wi guu dɛɛrɑ ten wɔllɔ.
19 Nge mɛyɑ Gusunɔn sɔmɔbun gɑri yi sirerɑ. N weenɛ i yi swɑɑ dɑki domi yi sɑ̃ɑwɑ nge fitilɑ ge gɑ bɑllimɔ yɑm wɔ̃kurɔ sere yɑm mu kɑ sɑ̃rɑ kpɑ Yesu wi u sɑ̃ɑ nge yɑm sɑ̃rerun kperɑ yu kɑ bɛɛn gɔ̃rusu bururɑsiɑ. 20 Gbiikɑɑ i de i n yeni yɛ̃ mɑ gɑri yi Gusunɔ u win sɔmɔbu sɔ̃ɔwɑ yin gɛɛ sɑri yi tɔnu u koo kpĩ u tubusiɑ kɑ win tii. 21 Domi Gusunɔn gɑri gɛɛ kun wɑ̃ɑ yi tɔnu u geruɑ kɑ win tiin kĩru. Adɑmɑ tɔmbɑ Gusunɔn gɑri geruɑ nge mɛ Hunde Dɛɛro u bu sɔ̃ɔsi.