3
Yinnin wurɑmɑrun
nɔɔ mwɛɛru
1 Nɛn kĩnɑsibu, tire teni tɑ sɑ̃ɑwɑ tireru yiruse te nɑ bɛɛ yoruɑmmɛ. Ten bɑɑtere sɔɔ nɑ kɑsu n bɛɛn bwisi gee yɑmiɑ kɑ sɔ̃ɔsi te nɑ bɛɛ yɑɑyɑsiɑmɔ. 2 Nɑ kĩ i Gusunɔn sɔmɔ dɛɛrobun gɑri yɑɑyɑ yi bɑ rɑɑ geruɑ, kɑ mɑɑ Yinni Fɑɑbɑ kowon woodɑ ye gɔrobɑ bɛɛ sɔ̃ɔsi. 3 Gbiikɑɑ, i n yɛ̃ mɑ sɑnɑm dɑ̃ɑkim sɔɔ, tɔmbɑ koo yɑrimɑ bɑ n sĩimɔ kɑ ben tiin gɔ̃ru kĩru. Bɑ koo bɛɛ yɑɑkoru ko 4 kpɑ bu gere bu nɛɛ, Yesu u nɔɔ mwɛɛru kuɑ mɑ u koo nɑ, nge n ǹ mɛ. Ǹ n mɛn nɑ, mɑnɑ u wɑ̃ɑ. Domi sɑɑ mìn di bɛsɛn sikɑdobɑ bɑ gu, bɑɑyere yɑ wɑ̃ɑwɑ nge toren di. 5 Bɑ yeni duɑri sobun sɔ̃, mɑ gɑsɔ gɑriyɑ Gusunɔ u geruɑ u kɑ wɔllu kɑ tem tɑkɑ kuɑ. U tem wunɑ nim sɔɔn di, mɑ u mu mɔmɑ kɑ nim. 6 Nim mɛyɑ u derɑ mu hɑnduniɑ yerukɑɑ kɑm koosiɑ, kɑ mɛn yibu bɑkɑru. 7 Kɑ gɑri tee yiyɑ bɑ mɑɑ kɑ tɛ̃n wɔllu kɑ tem yii dɔ̃ɔn sɔ̃, sere tɔ̃ɔ te Gusunɔ u koo be bɑ ǹ win bɛɛrɛ yɛ̃ siri, kpɑ u bu kɑm koosiɑ.
8 Adɑmɑ nɛn kĩnɑsibu, i ku mɑɑ de i gɑ̃ɑ tee nini duɑri mɑ Yinni Gusunɔn mi, sɔ̃ɔ teerɑ sɑ̃ɑwɑ nge wɔ̃ɔ nɔrɔbu, wɔ̃ɔ nɔrɔbu yɑ mɑɑ sɑ̃ɑ nge sɔ̃ɔ teeru. 9 Gɑbɑ tɑmɑɑ Yinni u tɛɛmɔ u kɑ win nɔɔ mwɛɛru yibiɑ. Adɑmɑ u ǹ tɛɛmɔ. Ǹ n sɑ̃ɑre u tɛɛmɔ, u kɑ bɛɛ suuru sɑ̃ɑwɑ domi u ǹ kĩ bɑɑ tɔn turo u kɑm ko. U kĩwɑ tɔmbu kpuro bu gɔ̃ru gɔsiɑ.
10 Kɑ mɛ, Yinnin tɔ̃rɑ koo nɑwɑ nge gbɛnɔ. Tɔ̃ɔ te sɔɔrɑ wɔllɑ koo doonɑ kɑ wure bɑkɑnu. Ye yɑ wɑ̃ɑ wom dirum sɔɔ yɑ koo yɑndɑ kɑ yɑm susu bɑkɑru, kpɑ tem mu dɔ̃ɔ mwɑɑrɑ kɑ gɑ̃ɑ ni nu wɑ̃ɑ mɛ sɔɔ. 11 Yèn sɔ̃ gɑ̃ɑ ni kpuro nu koo kɑm ko nge mɛ, i yɛ̃ sɑ̃ɑ sɑ̃ɑ nge mɛ n weenɛ bɛɛn sɑnum mu n dɛɛre kpɑ i n Gusunɔn bɛɛrɛ yɛ̃. 12 Kpɑ i n win tɔ̃ru mɑrɑ i n kookɑri mɔ̀ tu kɑ nɑ fuuku. Tɔ̃ɔ te sɔɔrɑ dɔ̃ɔ koo wɔllu kɑm koosiɑ, kpɑ ye yɑ wɑ̃ɑ hɑnduniɑ sɔɔ yu yɑndɑ kɑ dɔ̃ɔn yɑm susuru. 13 Adɑmɑ Gusunɔ u wɔn kpɑɑru kɑ tem kpɑm nɔɔ mwɛɛru kuɑ mi gem ko n wɑ̃ɑ. Yerɑ sɑ mɑrɑ.
14 Yen sɑɑbu kĩnɑsibu, nge mɛ i tɔ̃ɔ te mɑrɑ, i kookɑri koowo u kɑ bɛɛ deemɑ bɔri yɛndu sɔɔ kpɑ i kun disinu kɑ torɑru mɔ. 15 Bɛsɛn Yinni ù n tɛmɑnɛ, ɑyerɑ u sun derie su kɑ fɑɑbɑ wɑ, nge mɛ bɛsɛn kĩnɑsi Pɔlu u mɑɑ bɛɛ yoruɑ kɑ bwisi yi Gusunɔ u nùn kɑ̃. 16 Yerɑ u yoruɑ tirenu kpuro sɔɔ mi u gɑri yi geruɑ. Win tirenu sɔɔ gɑm kɑ gɑm wɑ̃ɑ mi n tubusiɑnu sɛ̃, mɑ yɛ̃ru sɑrirugibu be bɑ ǹ yɔ̃ dim dim, bɑ gɑri yi gɔsikiɑmɔ, nge mɛ bɑ rɑ ko kɑ Gusunɔn gɑri gɛɛ. Nge mɛyɑ bɑ kɑ ben tii kɑm kobu gɑwemɔ.