8
Yesu
bɛsɛn yɑ̃ku kowo tɔnwero
1 Tɛ̃ gɑri yin wiru wee. Bɛsɛ sɑ yɑ̃ku kowo tɔnwero win bweseru mɔ wi u sɔ̃ wɔllɔ Gusunɔ dɑm kpurogiin sinɑ turɑrun nɔm geuɔ. 2 U yɑ̃ku kowo tɔnwerorun sɔmburu mɔ̀ ɑye dɛɛrɑru sɔɔ te tɑ sɑ̃ɑ Gusunɔn wɑ̃ɑ yerun tii tii, te Yinni u kuɑ, n ǹ mɔ tɔnu.
3 Bɑ rɑ yɑ̃ku kowo tɔnwero gɔsiwɑ u kɑ Gusunɔ kɛ̃nu wɛ̃ kpɑ u yɑ̃kunu ko. Ǹ n mɛn nɑ, bɛsɛn yɑ̃ku kowo tɔnweron tii u ko n gɑ̃ɑnu mɔwɑ ni u koo kɑ yɑ̃kuru ko. 4 Ù n wɑ̃ɑ hɑnduniɑ sɔɔ, u ǹ ko n mɑm sɑ̃ɑ yɑ̃ku kowo domi yɑ̃ku kowobɑ wɑ̃ɑ be bɑ rɑ yɑ̃kuru ko nge mɛ Mɔwisin woodɑ yɑ yiiremɔ. 5 Yɑ̃ku kowo ben sɔmburu tɑ sɑ̃ɑ te tɑ wɑ̃ɑ wɔllɔn weenɑsiru tɔnɑ kɑ ten yɑɑyɑɑsu, nge mɛ Gusunɔ u Mɔwisi sɔ̃ɔwɑ sɑnɑm mɛ u kĩ u kuu bekurugiru ko, u nɛɛ, <<A de ɑ kuu te ko tɑ n sɑ̃ɑ nge te nɑ nun sɔ̃ɔsi guuru wɔllɔ.>> 6 Adɑmɑ tɛ̃ bɑ Yesu sɔmburu nɔmu sɔndiɑ te tɑ begiru bɛɛrɛ kere, domi u sɑ̃ɑ ɑrukɑwɑni ye yɑ bɛɛrɛ bon swɑɑ sɔmɔ. Bɑ ɑrukɑwɑni ye bɔkuɑwɑ kɑ nɔɔ mwɛɛ ni nu bɛɛrɛ bo.
7 Arukɑwɑni gbiikɑɑ yɑ̀ kun serere mɔ, n ǹ mɑɑ koorɔ gɑɑ yu ye kɔsire ko. 8 Adɑmɑ Gusunɔ u win tɔmbu gerusimɔ ye u nɛɛ,
<<Yinni Gusunɔ u nɛɛ, tɔ̃nu gɑnu sisi
nì sɔɔ kon kɑ Isirelibɑ kɑ Yudɑbɑ ɑrukɑwɑni kpɑɑ bɔke.
9 Adɑmɑ yɑ ǹ ko n sɑ̃ɑ yèn bweseru nɑ rɑɑ kɑ ben bɑɑbɑbɑ bɔkuɑ
dɔmɑ te nɑ bu nɔmu nɛnuɑ nɑ yɑrɑ Egibitin tem di.
Bɑ ǹ kɑ nɛn ɑrukɑwɑni ye yɔ̃re ye nɑ kɑ bu bɔkuɑ.
Yen sɔ̃nɑ nɑ bu ɑtɑfiiru kuɑ.
Yeyɑ Yinni Gusunɔ u geruɑ.
10 U kpɑm nɛɛ, ɑrukɑwɑni kpɑɑ ye wee,
ye kon kɑ Isirelibɑ bɔke ɑmɛn biru.
Kon nɛn woodɑ doke ben bwisikunu sɔɔ.
Kon ye yorusi ben gɔ̃rusɔ.
Kon ko ben Yinni kpɑ bu ko nɛn tɔmbu.
11 Goo sɑri be sɔɔ wi u koo win wuugii ǹ kun mɛ win temgii keu sɔ̃ɔsi u nɛɛ,
u Yinni Gusunɔ gio.
Domi be kpurowɑ bɑ ko n mɑn yɛ̃
sɑɑ bii piimunun di sere kɑ bukurobɔ.
12 Kon bu ben torɑnu suuru kuɑ.
Nɑ ǹ mɑɑ ben torɑnu yɑɑyɑmɔ.>>
13 Sɑnɑm mɛ Gusunɔ u ɑrukɑwɑni kpɑɑn gɑri mɔ̀, yɑ geruɑwɑ u gbiikɑɑ kuɑ gurɑ. Ye yɑ mɑɑ sɑ̃ɑ gurɑ yɑ tɔkɔ mɔ̀ yɑ doonɔ.