5
Doboniɑ nɑɑnɛ dokeobun sɔ̃
1 A ku durɔ bukuro gerusi kɑ dɑm, ɑdɑmɑ ɑ tɛmɑnɔ ɑ nùn dɑm kɛ̃ nge wunɛn tiin tundo. Mɛyɑ mɑɑ ɑluwɑɑsibɑn tii, ɑ bu koowo nge wunɛn mɑɑbu kɑ wɔnɔbu. 2 Ǹ n mɑɑ kurɔ tɔkɔnun nɑ, ɑ nin bɑɑwure koowo nge wunɛn tiin mɛro, ɑ mɑɑ kurɔ mɔro kpɛmminu ko nge wunɛn sesubu dɑɑ dɛɛrɑ sɔɔ.
3 A gɔminibu bɛɛrɛ wɛ̃ɛyɔ be bɑ sɑ̃ɑ gɔminibu kɑ gem. 4 Adɑmɑ gɔmini goo ù n bibu mɔ ǹ kun mɛ nikurɔminu, n weenɛ bu gbi bu giɑ bu geɑ ko ben tii tiin mɛro bisibu sɔɔ kpɑ bu wɑ bu ben mɔwɔbu geɑ dibu kɔsiɑ, domi yeni yɑ wɑ̃ Gusunɔn mi. 5 Kurɔ wi u sɑ̃ɑ gɔmini kɑ gem wiyɑ wi u ǹ goo mɔ wi u koo nùn nɔɔri. Win yĩiyɔbu wɑ̃ɑwɑ Gusunɔ sɔɔ kpɑ u n kɑnɑru mɔ̀ u n win somiru bikiɑmɔ bururu kɑ yokɑ. 6 Adɑmɑ gɔmini wi u win wɑ̃ɑrun yɛ̃ɛritiɑ tɔnɑ kɑsu u kuɑ gɔri kɔ bɑɑ mɛ u wɑsi. 7 A n bu gɑ̃ɑ ni kpuro sɔ̃ɔmɔ kpɑ goo u ku rɑɑ kɑ bu tɑɑrɛ wɛ̃. 8 Wi u kun win dusibu nɔɔri n ku mɑm ko win yɛnugibu, wiyɑ u nɑɑnɛ dokebu yinɑ, mɑ u nɑɑnɛ doke sɑrirugii dukurɑm kerɑ.
9 A ku gɔmini goo sosi gɔminibun wuuru sɔɔ mɑ n kun mɔ yɛ̃ro u wɔ̃ɔ wɑtɑ mɔ, kpɑ u n sɑ̃ɑ wi u kɑ durɔ turo yɔ̃rɑ, 10 mɑ bɑ win sɔm geerun seedɑ dimɔ. U n sɑ̃ɑ kurɔ wi u bibu nɛnum yɛ̃, kpɑ u n dɑɑ sɑ̃ɑ sɔbun yɑɑrɛ kowo kɑ mɑɑ wi u nɑɑnɛ dokeobu nɔɔrire kɑ tii kɑwɑbu, kpɑ u n dɑɑ wɑhɑlɑgibu somire, kpɑ u n sɑ̃ɑ wi u rɑ n sɔm geenu bɑɑnire mɔ̀ kɑ kĩru.
11 Adɑmɑ ɑ ku gɔmini kpɛmminu sosi gɔminibun wuuru sɔɔ, domi sɑnɑm mɛ ben kĩrɑ koo bu bɔriɑ bu kɑ Kirisi ɑtɑfiiru ko, bɑ koo kĩɑ bu durɔbu suɑ 12 kpɑ bu ben tii tɑɑrɛ wɛ̃ yèn sɔ̃ bɑ ben nɔɔ mwɛɛ gbiikiru kuɑ kɑm. 13 Yèn sɔ̃ bɑ ǹ gɑru mɔ̀ bɑ koo se bɑ n yɛnusu duurimɔ. N ǹ mɑm ye tɔnɑ, ɑdɑmɑ bɑ ko n dɑ tɔmbu wĩ kpɑ bu gɑri wɔbiɑ wɔri kpɑ bɑ n gɑri swinimɔ. 14 Yenin sɔ̃nɑ nɑ kĩ gɔmini kpɛmminu nu durɔbu suɑ kpɑ bu bibu mɑ, kpɑ bu ben yɛnu nɔni doke kpɑ bu ku rɑɑ bɛsɛn yibɛrɛbɑ ɑyeru deriɑ bu kɑ bɛsɛn kɔ̃sɑ gere. 15 Domi gɔmini ben gɑbɑ gɛrɑ kɔ bɑ Setɑm swĩi. 16 Adɑmɑ nɑɑnɛ dokeo goo ù n gɔminibu mɔ win dusibu sɔɔ, ɑ de u bu somi. A ku de u Yesun yigbɛru sɔmu ni sɔbi kpɑ tu kɑ kpĩ tu gɔmini be bɑ kun goo mɔ somi.
17 Yen biru yigbɛrun guro guro be bɑ hɑniɑ mɔ̀ ben sɔmburu sɔɔ, n weenɛ bu bɛɛrɛ bɑkɑn ɑrufɑɑni di, n ku mɑm ko be bɑ rɑ sunɛ gem gem wɑɑsu kɑ keu sɔ̃ɔsibu sɔɔ. 18 Domi Gusunɔn gɑri yi gerumɔ yi nɛɛ, <<I ku bɛɛn nɑɑ kinɛnu nɔɔ bɔke sɑɑ ye nu sɔmburu mɔ̀ dĩɑnu sɔɔ.>> Yi mɑɑ gerumɔ, <<N weenɛ sɔm kowo u win kɔsiɑru wɑ.>> 19 Bɑ̀ n kɑ nun yigbɛ guro guro goon tɑɑrɛ nɑɑwɑ, ɑ ku gɑri yi wurɑ mɑ n kun mɔ tɔnu yiru ǹ kun mɛ itɑ bɑ yen seedɑ di. 20 A be bɑ torɑ gerusio yigbɛrugibu kpuron nɔni biru kpɑ be bɑ tie bu bɛrum duurɑ.
21 Nɑ wure nɑ nun sɔ̃ɔmɔ Gusunɔ kɑ Yesu Kirisi kɑ win gɔrɑdo be u gɔsɑn wuswɑɑɔ, ɑ sɔ̃ɔsi nini mɛm nɔɔwɔ n kun kɑ goon nɔnu nɑsiɑru. A ku mɑɑ gɑ̃ɑnu ko kpɑɑsirun kĩrun sɔ̃. 22 A ku mɑɑ sɛndɑ ɑ kɑ goo nɔmɑ sɔndi. Mɛyɑ, ɑ ku mɑɑ de ɑ n bɔnu mɔ gɑbun torɑnu sɔɔ. A tii nɛnuɔ dɛɛrɑru sɔɔ.
23 Wee, ɑ kun dɑ mɑɑ nim tɔnɑ nɔ, ɑdɑmɑ ɑ n dɑ tɑm nɔ fiiko wunɛn nukurun ɑlɑfiɑn sɔ̃ yèn sɔ̃ ɑ rɑ bɑre kiri kiri.