6
1 Be bɑ yoru dimɔ n weenɛ bu ben tiin yinnibu bɛɛrɛ wɛ̃ gɑ̃ɑnu kpuro sɔɔ, kpɑ goo u ku rɑɑ kɑ fɛɛ wɑ u Gusunɔn yĩsiru kɑ bɛsɛn sɔ̃ɔsinu gɑri kɑm gerusi. 2 Yoo be bɑ mɑɑ yinni nɑɑnɛ dokeobu mɔ, bu ku rɑɑ bu gɛm bu nɛɛ, bɑ sɑ̃ɑ dusinu Yinni sɔɔ. Adɑmɑ bu de bu yinni be sɑ̃ kɑ girimɑ kpɑ bu ben sɔmɑn ɑrufɑɑni di n kpɑ̃ yèn sɔ̃ bɑ sɑ̃ɑ nɑɑnɛ dokeobu kɑ mɑɑ kĩnɑsibu Yesu sɔɔ.
Sɔ̃ɔsi weesuginu
kɑ ɑrumɑni geɑ
Yeyɑ n weenɛ ɑ wɑɑsu kɑ keu ko. 3 Bɑɑwure wi u sɔ̃ɔsi tukuru gɑru sɔ̃ɔsimɔ mɑ u yinɑ u bɛsɛn Yinni Yesun Kirisin gɑri gemgii nɛnɛ, kɑ mɑɑ sɔ̃ɔsi te tɑ Gusunɔn bɛɛrɛ wɛ̃ɛbu sɔ̃ɔsimɔ, 4 yɛ̃ro u tii suewɑ, u ǹ mɑɑ gɑ̃ɑnu yɛ̃. Adɑmɑ sikirinɔsu kɑ gɑri wɛ̃ɛrinun kĩrɑ u bɑrɔ. Min diyɑ nisinu kɑ sɑnnɔsu kɑ yɑɑ kɑsikibu kɑ tɔn nɑɑnɛ sɑrirɑ wee. 5 Tɔn ben wirɑ sĩirɑ bɑ ǹ mɑɑ gem yɛ̃ mɑ bɑ sikirinɑmɔ nɔru sɑri. Bɑ tɑmɑɑ mɑ Gusunɔn sɑ̃ɑru tɑ koo bu ko ɑrumɑnigibu.
6 Geemɑ, Gusunɔn sɑ̃ɑru tɑ sɑ̃ɑwɑ ɑrumɑni bɑkɑ, ye tɔnu u mɔ yɑ̀ n kɑ nùn nɛrenɑ. 7 Domi sɑ ǹ kɑ gɑ̃ɑnu gɑnu nɛ hɑnduniɑ ye sɔɔ, mɛyɑ sɑ ǹ mɑɑ kɑ gɑ̃ɑnu wiɔ. 8 Ǹ n mɛn nɑ, sɑ̀ n dĩɑnu kɑ yɑ̃nu mɔ n ko n sun turiɑ. 9 Adɑmɑ be bɑ kĩ bɑ n sɑ̃ɑ ɑrumɑnigibu, beyɑ bɑ rɑ wɔri kɔkiribu sɔɔ, kpɑ wiirɑrun kĩru kɑ kĩi gɔburu tu bu yinɑ mwɑ bɑ n kɑ dɔɔ kɑm kobu kɑ kpeerɑsiɑbu sɔɔ. 10 Domi gobin kĩrɑ sɑ̃ɑwɑ kom kɔ̃sum kpuron nuu teeru. Sibu gɑbɑ tu nɑɑ girɑ sere bɑ nɑɑnɛ dokebu gɛɛrɑri bɑ tii kpɛ̃ɛ nuku sɑnkirɑ dɑbinu sɔɔ.
Ye Pɔlu u Timɔte yiire
11 Adɑmɑ wunɛ Gusunɔgii, ɑ yeni kpuro dukɑ suurio kpɑ ɑ gem nɑɑ girɑ kɑ mɑɑ Gusunɔn bɛɛrɛ wɛ̃ɛbu kɑ nɑɑnɛ dokebu kɑ kĩru kɑ tɛmɑnɑbu kɑ sere dɑɑ duudwiɑ. 12 A nɑɑnɛ dokebun tɑɑ geebu koowo kpɑ ɑ wɑ̃ɑru te tɑ ku rɑ kpe ɑre di. Domi wɑ̃ɑ te sɔɔrɑ Gusunɔ nun sokɑ, ten sɔ̃nɑ ɑ mɑɑ nɑɑnɛ dokebun seedɑ geɑ di seedɑgii dɑbinun nɔni biru. 13 Nɑ nun yiiremɔ Gusunɔn wuswɑɑɔ wi u rɑ yɑbu kpuro wɑ̃ɑru wɛ̃, kɑ mɑɑ Yesu Kirisin wuswɑɑɔ wi u seedɑ geɑ di Pɔnsu Pilɑtin wuswɑɑɔ, 14 ɑ woodɑ ye nɛnuɔ kpɑ ɑ n wɑ̃ɑ dɛɛrɑru kɑ tɑɑrɛ sɑriru sɔɔ sere tɔ̃ɔ te bɛsɛn Yinni Yesu Kirisi u koo kurɑmɑ. 15 Gusunɔ, wi u koo de tɔ̃ɔ te, tu sɔ̃ɔsirɑ ten sɑɑ sɔɔ, wi turo dege degewɑ sɑ̃ɑ domɑrugii kɑ yiikogii kɑ sinɑ boko kɑ yinnibun Yinni. 16 Wi turowɑ sɑ̃ɑ wi u kun gbimɔ. U wɑ̃ɑ yɑm bururɑm sɔɔ mɛ goo kun kpɛ̃ u susi. Goo kun nùn wɑɑre, goo u ǹ kpɛ̃ u mɑm nùn wɑ. Wigiɑ bɛɛrɛ kɑ sinɑru te tɑ ku rɑ kpe. Ami.
17 A tem mɛn ɑrumɑnigibun lɑɑkɑri seeyo bu ku woo kɑnɑ bu ku rɑɑ mɑɑ ben yĩiyɔbu yi dukiɑ ye yɑ koo kpe sɔɔ. Adɑmɑ bu bu yiiyo Gusunɔ sɔɔ wi u sun kpuro wɛ̃ɛmɔ kɑ nuku tiɑ bɛsɛn nuku dobun sɔ̃. 18 A bu sɔ̃ɔwɔ bu geɑ ko bu ko ɑrumɑnigibu sɔm geenu sɔɔ, kpɑ bɑ n nuku tiɑ mɔ bɑ n sɔɔru sɑ̃ɑ bu kɑ ben mɔru gɑbu bɔnu ko. 19 Nge mɛyɑ bɑ koo tii ɑrumɑni geɑ beruɑ ye yɑ ǹ sɑnkirɑmɔ siɑn sɔ̃. Sɑnɑm mɛyɑ bɑ koo kpĩ bu wɑ̃ɑ geeru nɑɑmwɛ.
20 Timɔte, ɑ ye bɑ nun nɔmu sɔndiɑ nɛnuɔ n wɑ̃. A dɛsiro sɑɑ hɑnduniɑn gɑri kɑnkɑmgiin di. A ku mɑɑ sikirinɑ kɑ be bɑ tɑmɑɑ bɑ yɛ̃ru mɔ. 21 Ben yɛ̃ɛ te, tɑ derɑ ben gɑbɑ kɔ̃ɔrɑ nɑɑnɛ dokebun swɑɑn di.
Gusunɔn durom mu n kɑ bɛɛ wɑ̃ɑ._