4
Keu koosio weesugibu
1 Adɑmɑ Gusunɔn Hunde gerumɔ kpɑsɑsɑ mɑ sɑnɑm gɑm sisi mɛ̀ sɔɔ gɑbɑ koo nɑɑnɛ dokebun swɑɑ deri bu hunde koni weesugibu mɛm nɔɔwɑ, kpɑ bu mɑɑ wɛrɛkunun sɔ̃ɔsiru swĩi. 2 Sɔ̃ɔsi te, tɑ weewɑ sɑɑ wee kowobun min di be bɑ tii mɛɛrɑ gɑbu. Tɔn ben gɔ̃ru gɑ gu nge ge bɑ sii sunsu mɑni. 3 Tɔn ben bweserɑ bɑ gerumɔ mɑ n ǹ wɑ̃ tɔmbu bu suɑnɑ, yen biru n ǹ mɑɑ weenɛ bu dĩɑnu kpuro di. Adɑmɑ Gusunɔ u ye kpuro tɑkɑ kuɑwɑ nɑɑnɛ dokeobu be bɑ gem giɑ bu kɑ di kɑ siɑrɑbu sɑnnu. 4 Domi gɑ̃ɑnu bɑɑnire ni Gusunɔ u tɑkɑ kuɑ gɑ̃ɑ geenɑ, gɑ̃ɑnu sɑri ni sɔɔ, ni bɑ koo kɔ̃, ɑdɑmɑ bu gesi ni kpuro mɔɔ kɑ siɑrɑbu. 5 Domi Gusunɔn gɑri kɑ kɑnɑrɑ ni kpuro dɛɛrɑsiɑmɔ.
Yesu Kirisin sɔm kowo geo
6 Wee, ɑ̀ n nɑɑnɛ dokeobu bwisi yini kɛ̃mɔ kɑɑ n sɑ̃ɑwɑ Yesu Kirisin sɔm kowo geo, kɑɑ n mɑɑ wunɛn tiin hunde diisiɑmɔ kɑ nɑɑnɛ dokebu kɑ sɔ̃ɔsi geerun gɑri yi ɑ swĩi. 7 Adɑmɑ ɑ wiirɑ gɑri yinɔ yi tɔmbɑ sekɑ kpɑ ɑ n wunɛn hunde dendimɔ Gusunɔn bɛɛrɛ wɛ̃ɛbu sɔɔ. 8 Geemɑ, wɑsin dendibu ɑrufɑɑni gɑɑ mɔ, ɑdɑmɑ Gusunɔn bɛɛrɛ wɛ̃ɛbu bu ɑrufɑɑni kpuro mɔ yèn sɔ̃ bu gisɔn wɑ̃ɑru kɑ mɑɑ siɑgirun nɔɔ mwɛɛru mɔ. 9 Gɑri nɑɑnɛgiiyɑ mi. N wɑ̃ bu yi nɔmɑ gɑ̃ri mɑm mɑm bu mwɑ. 10 Yen sɔ̃nɑ sɑ sunɑmɔ sɑ sɔmburu mɔ̀, domi sɑ bɛsɛn yĩiyɔbu doke Gusunɔ Yinni wɑso sɔɔ wi u sɑ̃ɑ tɔmbu kpuron Fɑɑbɑ kowo, su mɑm nɛɛre be bɑ nɑɑnɛ doke.
11 A n bu sɔ̃ɔsi te yiiremɔ kpɑ ɑ n bu tu sɔ̃ɔsimɔ. 12 A ku de bɑ n wunɛn ɑluwɑɑsiru gɛmɑ, ɑdɑmɑ ɑ de ɑ n nɑɑnɛ dokeobu kom gen sɔ̃ɔsimɔ wunɛn gɑri gerubu sɔɔ, kɑ wunɛn wɑ̃ɑrun kookoosu sɔɔ, kɑ wunɛn kĩru sɔɔ, kpɑ ɑ n nɑɑnɛ mɔ kɑ mɑɑ gɔ̃ru kpiku. 13 Sere n kɑ tunumɑ, ɑ n tɔmbu Gusunɔn gɑri gɑriɑmmɛ kpɑ ɑ n bu dɑm kɛ̃mɔ kpɑ ɑ n bu keu sɔ̃ɔsimɔ. 14 A ku hunden kɛ̃ru ɑtɑfiiru ko te tɑ wɑ̃ɑ wunɛ sɔɔ, te bɑ nun nɔmu bɛriɑ Gusunɔn sɔmɔbun gɑri sɔɔ sɑnɑm mɛ yigbɛ guro gurobɑ nun nɔmɑ sɔndi wirɔ. 15 A gɑri yini nɔni dokeo, ɑ mɑɑ yi tii wɛ̃ɛyɔ mɑm mɑm, kpɑ tɔmbu kpuro bu wunɛn wuswɑɑ dɑɑbu wɑ. 16 A n tii sɛ, ɑ mɑɑ wunɛn sɔ̃ɔsiru lɑɑkɑri dokeo kpɑ ɑ n tɛmɑnɛ gɑ̃ɑ nini sɔɔ. Domi ɑ̀ n mɔ̀ mɛ, kɑɑ tii fɑɑbɑ ko kɑ mɑɑ be bɑ nun swɑɑ dɑki.