3
Yesun yigbɛ kpɑrobu
1 Gɑri nɑɑnɛgii wee. Goo ù n kĩ u n sɑ̃ɑ Yesun yigbɛ kpɑro, sɔm geerɑ u kĩ. 2 N weenɛwɑ yɛ̃ro u n sɑ̃ɑ tɑɑrɛ sɑrirugii kpɑ u n kurɔ turo dege dege mɔ, yen biru u n mɑɑ sɑ̃ɑ gɑyɑgii kpɑ u n tii yɛ̃ u kun sɑ̃ɑ tɔn bɛrɛtɛkɛ, ɑdɑmɑ u n sɑ̃ɑ sɔbun yɑɑrɛ kowo kɑ mɑɑ wi u koo keu sɔ̃ɔsibu kpĩ. 3 Kpɑ u kun sɑ̃ɑ tɑm nɔro ǹ kun mɛ sɑnnɔ kĩro ɑdɑmɑ u n sɑ̃ɑ suurugii wi u ɑlɑfiɑ kĩ, kpɑ u kun sɑ̃ɑ gobin kĩro. 4 Kpɑ u n sɑ̃ɑ wi u win yɛnu nɔmɑ sikerenɛ mɑm mɑm, kpɑ u win bibu mɛm nɔɔbu kɑ tɔnun bɛɛrɛ wɛ̃ɛbu kpuro sɔ̃ɔsi. 5 Domi tɔnu ù kun yɛ̃ mɛ u koo ko u kɑ win tiin yɛnu nɔmɑ sikerenɑ, ɑmɔnɑ yɛ̃ro wi, u koo kɑ kpĩ u Gusunɔn yigbɛru nɛnɛ. 6 N ǹ mɑɑ weenɛ yɛ̃ro u n sɑ̃ɑ nɑɑnɛ dokeo kpɑo, ye n koo de u n tii gɑ̃ɑmɔ kpɑ u tɑɑrɛ wɑ nge mɛ Setɑm u wɑ. 7 Yen biru n weenɛ be bɑ ǹ nɑɑnɛ doke bɑ n yɛ̃ro win seedɑ geɑ dimɔ, kpɑ bu ku nùn gɛm, kpɑ u ku rɑɑ mɑɑ Setɑm yinɑ wɔri.
Yesun yigbɛ sɔm kowobu
8 Mɛyɑ mɑɑ n ǹ weenɛ Yesun yigbɛ sɔm kowobu bɑ n sɑ̃ɑ be bɑ ǹ bɛɛrɛ mɔ nge nɔsu yirugibu ǹ kun mɛ tɑm yobu ǹ kun mɛ be bɑ kɑ bwisi kɑnkɑm gobi kɑsu, 9 ɑdɑmɑ bɑ n nɑɑnɛ dokebun gem mɛ mu terɑ nɛni kɑ gɔ̃ru dɛɛrɔ. 10 N weenɛ bu mɑɑ ginɑ ben lɑɑkɑri mɛɛri. Bɑ̀ n wɑ bɑ ǹ tɑɑrɛ gɑɑ mɔ kpɑ bu sere ben sɔmburu wɔri. 11 Nge mɛyɑ n mɑɑ weenɛ kurɔbun tii bɑ n sɑ̃ɑ be bɑ koo bɛɛrɛ wɛ̃, kpɑ bɑ kun sɑ̃ɑ tɔn wĩɔbu mɑ n kun mɔ gɑyɑgibu be bɑ nɑɑnɛ mɔ kpuro sɔɔ. 12 Kurɔ tiɑ tiɑwɑ yigbɛ sɔm kowobu bɑ ko n mɔ, kpɑ bɑ n sɑ̃ɑ be bɑ ben bibu kɑ ben tiin yɛnusu nɔmɑ sikerenɛ mɑm mɑm. 13 Sɔm kowo be bɑ ben sɔmburu mɔ̀ kɑ nuku tiɑ bɑ koo ten bɑrukɑ di ben wɑ̃ɑru sɔɔ, kpɑ bɑ n toro sindu mɔ ben nɑɑnɛ dokebu sɔɔ bi Yesu Kirisi sun wɛ̃ɛmɔ.
Asiri bɑkɑ
14 Nɑ yĩiyɔ n nɑ n nun wɑ, ɑdɑmɑ nɑ nun tire teni yoruɑmmɛwɑ, 15 bɑɑ nɑ̀ n tɛɛmɔ, ɑmɛn biru ɑ n kɑ yɛ̃ nge mɛ n weenɛ ɑ n tii kpɑre Gusunɔn tɔmbun suunu sɔɔ be bɑ sɑ̃ɑ Gusunɔ Yinni wɑson yigbɛru. Yigbɛ terɑ tɑ sɑ̃ɑ gem gbere kɑ mɛn mɑro. 16 Kɑ gem, goo sɑri wi u koo kpĩ u bɛsɛn sɑ̃ɑrun ɑsiri yen kpɑ̃ɑru siki.
Gusunɔ u sɔ̃ɔsirɑ tɔnun wɑsi sɔɔ.
Hunde Dɛɛro nùn gem wɛ̃.
Wɔllun gɔrɑdobɑ bɑ mɑɑ nùn wɑ.
Bɑ win gɑri bweseru bɑɑtere wɑɑsu kuɑ.
Mɑ bɑ yi nɑɑnɛ doke hɑnduniɑ sɔɔ.
Mɑ bɑ kpɑm nùn suɑ wɔllɔ u wurɑ win yiiko sɔɔ.