2
Kɑnɑrun gɑri
1 Yen sɔ̃nɑ nɑ bɛɛ kɑnɑmɔ gbiikɑɑ, i n kɑnɑru mɔ̀ tɔmbu kpuron sɔ̃ i n bikiɑmɔ kɑ tii kɑwɑbu, kpɑ i n dɑ mɑɑ Gusunɔ siɑre. 2 Nge mɛyɑ i mɑɑ kɑnɑru koowo tem yɛ̃robun sɔ̃ kɑ sere be bɑ wɑ̃ɑ ɑye dɑmginu sɔɔ kpuro, kpɑ su wɑ su bɛsɛn hɑnduniɑn wɑ̃ɑru di kɑ bɔri yɛndu kɑ ɑlɑfiɑ, sɑ n Gusunɔ bɛɛrɛ wɛ̃ɛmɔ kpɑ sɑ n dɑɑ geɑ mɔ̀. 3 Kɑnɑ ten bweserɑ tɑ wɑ̃ tɑ rɑ mɑɑ Gusunɔ bɛsɛn Fɑɑbɑ kowo wɛ̃re 4 wi u kĩ tɔmbu kpuro bu fɑɑbɑ wɑ, kpɑ bu wɑ bu gem tubu. 5 Domi Gusunɔ turowɑ wɑ̃ɑ, sɑnnɔ yɑkiɑnɔ turowɑ mɑɑ wɑ̃ɑ bɛsɛ kɑ Gusunɔn bɑɑ sɔɔ, wiyɑ Yesu Kirisi wi u kuɑ tɔnu, 6 mɑ u tii wɛ̃ u kuɑ bɑɑwuren ɑbɔru. Seedɑ yerɑ yɑ sɔ̃ɔsirɑ sɑnɑm mɛ yen sɑɑ yɑ turɑ. 7 Yenin sɔ̃nɑ bɑ mɑn gɔsɑ wɑɑsu kowo kɑ gɔro, kpɑ n kɑ tɔn tukobu nɑɑnɛ dokebu kɑ gem keu sɔ̃ɔsi. Geemɑ nɑ gerumɔ nɑ ǹ weesu mɔ̀.
8 Yen sɔ̃nɑ nɑ kĩ bɑɑmɑ mi bɑ kɑnɑru mɔ̀ tɔn durɔbu bu tu ko bɑ n nɔmɑ ye yɑ dɛɛre sue wɔllɔ n kun kɑ mɔru n kun kɑ sikirinɔ.
9 Mɛyɑ mɑɑ nɑ kĩ tɔn kurɔbu bu tii sɔmɛ sɑkɑ sɔɔ kɑ girimɑ kpɑ ben burɑru tɑ kun sɑ̃ɑ tɑrɑ gidigiɑ ǹ kun mɛ wurɑ ǹ kun mɛ goonu, bu ku mɑɑ yɑ̃ɑ gobi bɛkɛginu doke. 10 Adɑmɑ ben burɑ yɑ̃nu nu n sɑ̃ɑ kookoo burɑsu nge mɛ n weenɛ kurɔ be bɑ tii gɑrisi Gusunɔ sɑ̃ɔbu bu ko. 11 A de tɔn kurɔ u giɑ lɑɑkɑri sɔɔ kɑ wii kpĩibu mɑm mɑm. 12 Nɑ ǹ wure tɔn kurɔ u keu sɔ̃ɔsi, ǹ kun mɛ u n sɑ̃ɑ tɔn durɔn wirugii ɑdɑmɑ u n dɑ n mɑɑri. 13 Domi Adɑmuwɑ Gusunɔ u gbiɑ u tɑkɑ kuɑ, yen biru Efɑ. 14 Mɛyɑ n ǹ mɔ Adɑmu Setɑm u nɔni wɔ̃kuɑ, win kurɔwɑ, u nɔni wɔ̃kuɑ mɑ u woodɑ sɑrɑ. 15 Adɑmɑ tɔn kurɔ u koo fɑɑbɑ wɑ ù n bibu mɑrumɔ ù n gesi wɑ̃ɑ nɑɑnɛ dokebu kɑ kĩru kɑ wɑ̃ɑ dɛɛrɑru sɔɔ kɑ tii yɛ̃ru sɑnnu.