Timɔte I 1

TIRE GBIIKII TE PƆLU

U TIMƆTE KUA

Tɔbiribu

^1-2 Timɔte, wunɛ wi ɑ kuɑ nɛn bii yèn sɔ̃ ɑ Yesu nɑɑnɛ doke, Gusunɔ Bɑɑbɑ kɑ Yesu Kirisi bɛsɛn Yinni bu nun durom kɑ wɔnwɔndu kuɑ kpɑ bu nun ɑlɑfiɑ kɛ̃. Nɛ Pɔlu, Yesu Kirisin gɔro nge mɛ Gusunɔ bɛsɛn Fɑɑbɑ kowo kɑ Yesu Kirisi wi u sɑ̃ɑ bɛsɛn yĩiyɔbu, bɑ mɑn yiire, nɑ nun tire teni kuɑmmɛ.

Sɔ̃ɔsi weesugirun kirɔ

³ Tɛ̃, nɑ kĩ ɑ sinɑ Efesuɔ nge mɛ nɑ nun yiire sɑnɑm mɛ nɑ dɔɔ Mɑsedɔni giɑ kpɑ ɑ bu yinɑri be bɑ sɔ̃ɔsi tukunu sɔ̃ɔsimɔ. ⁴ A bu sɔ̃ɔwɔ bu ku rɑɑ ben lɑɑkɑri doke gɑri yi tɔmbɑ sekɑ sɔɔ, kɑ mɑɑ sikɑdobɑn yĩsɑ sɔɔ. Yeyɑ yɑ sikirinɔsu seeyɑmɔ, yɑ ǹ mɑɑ Gusunɔn himbɑ wuswɑɑ dɑɑsiɑmɔ ye tɔnu rɑ gie kɑ nɑɑnɛ dokebu. ⁵ Adɑmɑ nɑ yiire bi mɔ̀wɑ n kɑ bɛɛn kĩru seeyɑ te tɑ wee sɑɑ gɔ̃ru ge gɑ dɛɛren di kɑ lɑɑkɑri tɑɑrɛ sɑrirugiɑn di kɑ mɑɑ nɑɑnɛ doke kpikibun di. ⁶ Wee, gɑbɑ gɛrɑ sɑɑ gɑri yin min di mɑ bɑ kɔ̃ɔrɑ sikirinɔ kɑmgisu sɔɔ. ⁷ Bɑ kĩ bɑ n sɑ̃ɑ Gusunɔn woodɑn keu sɔ̃ɔsiobu, ɑdɑmɑ bɑ ǹ ben tiin gɑrin tubusiɑnu yɛ̃ bɑɑ yi bɑ gerumɔ kɑ nɑɑnɛ bɑkɑ.

⁸ Kɑ mɛ, sɑ yɛ̃ mɑ woodɑ yɑ wɑ̃ tɔnu ù n ye dendimɔ nge mɛ n weenɛ. ⁹ Kpɑ u n yɛ̃ mɑ bɑ ǹ woodɑ kue gemgibun sɔ̃. Bɑ ye kuɑwɑ woodɑ sɑrobu kɑ mɛm nɔɔ sɑrirugibun sɔ̃, kɑ be bɑ ǹ Gusunɔn bɛɛrɛ yɛ̃, kɑ durumgibu, kɑ mɑɑ tɔn be bɑ ǹ Gusunɔ kɑ gɑ̃ɑ dɛɛrɑnun bɛɛrɛ yɛ̃, kɑ sere be bɑ ben tundobu ǹ kun mɛ ben mɛrobu goomɔ, kɑ mɑɑ tɔn gowobu gɑbu, ¹⁰ kɑ mɑɑ sɑkɑrɑ kowobu, kɑ tɔn durɔ be bɑ kɔ̃ɔ mɛnnɑmɔ ben tii tiinɛ, kɑ be bɑ tɔmbu gbɛnimɔ bɑ dɔrɑmɔ, kɑ weesugibu, kɑ be bɑ weesu sɔɔ bɔ̃rumɔn sɔ̃, bɑɑyere kpuro gesi ye yɑ kun sɑ̃ɑ sɔ̃ɔsi geeru. ¹¹ Sɔ̃ɔsi te, tɑ wɑ̃ɑwɑ Lɑbɑɑri geɑ ye bɑ mɑn nɔmɑ bɛriɑ sɔɔ. Gusunɔwɑ yɑ kɑ yɑ̃. Wiyɑ u yiiko mɔ, u mɑɑ sɑ̃ɑ domɑrun nuuru.

Siɑrɑbu

Gusunɔn wɔnwɔndun sɔ̃

¹² Nɑ Yesu Kirisi bɛsɛn Yinni siɑrɑ wi u mɑn dɑm kɑ̃ n kɑ nɛn sɔmburu ko. Nɑ sɑɑbu kuɑ yèn sɔ̃ u mɑn gɑrisi nɑɑnɛgii mɑ u mɑn gɔsɑ win sɔmburu sɔɔ, ¹³ bɑɑ mɛ nɑ rɑ rɑɑ nùn gɑri kɑm gerusi mɑ nɑ nùn nɔni sɔ̃ɔwɑ mɑ nɛn mɔru ku rɑ n tomɑ. Kɑ mɛ, u mɑn wɔnwɔndu kuɑ yèn sɔ̃ nɑ ǹ yɛ̃ ye nɑ mɔ̀, domi nɑ ǹ dɑɑ nɑɑnɛ doke. ¹⁴ Mɑ bɛsɛn Yinnin durom mu bɑndɑ nɛ sɔɔ. U mɑn nɑɑnɛ dokebu kɑ kĩru wɛ̃. ¹⁵ Gɑri nɑɑnɛgii yi yi weenɛ i nɔmɑ gɑ̃ri i mwɑ mɑm mɑm yiyɑ, Yesu Kirisi u nɑ hɑnduniɑ sɔɔ u kɑ durumgibu fɑɑbɑ ko bè sɔɔ nɑ sɑ̃ɑ ben kpoko. ¹⁶ Adɑmɑ yenin sɔ̃nɑ Gusunɔ u mɑn wɔnwɔndu kuɑ, kpɑ Yesu Kirisi u kɑ kpĩ u win suuru nɔru sɑrirugiɑ sɔ̃ɔsi nɛ sɔɔ nɛ wi nɑ sɑ̃ɑ kpoko, kpɑ nɑ n kɑ sɑ̃ɑ yĩreru ben sɔ̃ be bɑ koo nùn nɑɑnɛ doke bu kɑ wɑ̃ɑru te tɑ ku rɑ kpe wɑ. ¹⁷ Tɛ̃, Gusunɔ turo wi, sinɑ boko wi u ko n wɑ̃ɑ kɑ bɑɑdommɑɔ, wi u kun gbimɔ, wi bɑ ǹ kɑ nɔni wɑɑre, wigiɑ bɛɛrɛ kɑ yiiko sere kɑ bɑɑdommɑɔ. Ami.

¹⁸ Timɔte nɛn bii, nɑ nun yiire bini mɔ̀ nge mɛ Gusunɔn sɔmɔbu bɑ rɑɑ geruɑ wunɛn sɔ̃. A de sɔmɔ ben gɑri yi, yi n sɑ̃ɑ wunɛn tɑbu yɑ̃nu kpɑ ɑ kɑ tɑɑ geebu ko ¹⁹ ɑ n nɑɑnɛ doke kpɑ wunɛn gɔ̃ru gɑ kun nun tɑɑrɛ wɛ̃ɛmɔ. Adɑmɑ sibu gɑbu bɑ ǹ gɔ̃ru gen bweseru swɑɑ sue, mɑ bɑ ben nɑɑnɛ dokebu kɑm koosiɑ nge goo nimkuu ge gɑ nim diirɑ. ²⁰ Tɔn be sɔɔrɑ Himɛnɛ kɑ Alesɑndu bɑ wɑ̃ɑ be nɑ Setɑm nɔmu sɔndiɑ bu kɑ giɑ mɑ n ǹ weenɛ bu Gusunɔ gɑri kɑm gerusi.