5
1 Nɛgibu, n ǹ tilɑsi su kɑ bɛɛ tɔ̃ru kɑ sɑnɑm yoruɑ mɛ̀ sɔɔ yɑbu yeni yɑ koo koorɑ. 2 Domi bɛɛn tii i yɛ̃ gem kɑ gem mɑ Yinnin tɔ̃ru tɑ koo nɑwɑ nge gbɛnɔ wi u sisi wɔ̃kuru. 3 Sɑnɑm mɛ tɔmbɑ kun kɑ gɛɛ nɑnde bɑ mɔ̀, ɑlɑfiɑ wɑ̃ɑ, sɑɑ yerɑ kpeerɑsiɑbu koo tunumɑ suɑru sɔɔ nge mɛ mɑru wuriribu bu rɑ gurɑgii deemɛ, bɑ ǹ mɑɑ kpiki yeru wɑsi. 4 Adɑmɑ bɛɛ nɛgibu, i ǹ wɑ̃ɑ yɑm wɔ̃kuru sɔɔ, n ǹ mɑɑ weenɛ sɑnɑm mɛ, mu bɛɛ biti mwɑ nge gbɛnɔn nɑɑru. 5 Bɛɛ kpurowɑ i sɑ̃ɑ yɑm bururɑm tɔmbu kɑ mɑɑ sɔ̃ɔ sɔɔgibu. Sɑ ǹ sɑ̃ɑ wɔ̃kurugibu be bɑ wɑ̃ɑ yɑm wɔ̃kuru sɔɔ. 6 Yen sɔ̃, su ku dweeyɑ nge be bɑ tie, ɑdɑmɑ n weenɛ su se su yɔ̃rɑ sɑ n kɑ tii sɛ. 7 Wɔ̃kurɑ tɔmbu bɑ rɑ dweeye, wɔ̃kurɑ tɑm nɔrobu bɑ rɑ mɑɑ tɑm nɔ. 8 Adɑmɑ bɛsɛ be sɑ sɑ̃ɑ sɔ̃ɔ sɔɔgibu, n weenɛ sɑ n tii sɛ. Su nɑɑnɛ dokebu kɑ kĩru sebe nge tɑrɑkpe, su mɑɑ fɑɑbɑn yĩiyɔbu doke nge sii furɔ kɔkɔru. 9 Domi Gusunɔ u ǹ sun sokɑ su kɑ win mɔru wɑ, u sun sokɑwɑ su kɑ fɑɑbɑ wɑ sɑɑ bɛsɛn Yinni Yesu Kirisin min di 10 wi u gu bɛsɛn sɔ̃, kpɑ sɑ n wɑ̃ɑru dimɔ kɑ wi sɑnnu, sɑ̀ n wɑ̃ɑ hunde sɔɔ ǹ kun mɛ bɑɑ sɑ̀ n gu. 11 Yen sɔ̃, i n dɑm kɛ̃ɛnɑmɔ kpɑ i n tɑ̃sisiɑnɑmɔ nge mɛ i mɔ̀ tɛ̃.
Tɔbiribu kɑ kirɔ dɑ̃ɑki
12 Sɑ mɑɑ bɛɛ kɑnɑmɔ nɛgibu, i bu bɛɛrɛ wɛ̃ɛyɔ be bɑ sɔmburu mɔ̀ gem gem bɛɛn suunu sɔɔ, be Yinni u derɑ bɑ bɛɛ kpɑrɑmɔ mɑ bɑ bɛɛ swɑɑ sɔ̃ɔsimɔ. 13 I n ben kĩru mɔ tɑ n kpɑ̃ kɑ bɛɛrɛ ben sɔmburun sɔ̃. I de i n nɔɔ tiɑ sɑ̃ɑ bɛɛn tii tiinɛ sɔɔ.
14 Sɑ bɛɛ kɑnɑmɔ nɛgibu, i mɛm nɔɔ sɑrirugibu kirɔ koowo. I bu dɑm kɛ̃ɛyɔ be bɑ mwiɑ kpɑnɛ. I dɑm sɑrirugibu somiɔ. I kɑ tɔmbu kpuro tɛmɑnɔ. 15 I lɑɑkɑri koowo i ku de goo u win beruse kɔ̃sɑ kɔsiɑ, ɑdɑmɑ i n geɑ kuɑnɑmmɛ kɑ mɑɑ be bɑ tie kpuro.
16 I n nuku dobu mɔ sɑnɑm bɑɑmɛre sɔɔ. 17 I n dɑ n kɑnɑru mɔ̀ sɑɑ bɑɑyere. 18 I n siɑrɑmɔ bɑɑ ǹ n mɛren nɑ. Yeniwɑ Gusunɔ u kĩ i ko bɛɛ kɑ Yesu Kirisin wɑ̃ɑsinɑɑ sɔɔ.
19 I ku Hunde Dɛɛro yinɑri u sɔmburu ko bɛɛ sɔɔ. 20 I ku Gusunɔn sɔmɔbun gɑri gɛm. 21 Adɑmɑ i gɑ̃ɑnu kpuro wɛ̃ɛrio kpɑ i nɛnɛ ni nu sɑ̃ɑ gem. 22 I tii nɛnuɔ kɔ̃sɑ bɑɑyeren di.
23 Kpɑ Gusunɔ, Yinni wi u rɑ ɑlɑfiɑ wɛ̃, u bɛɛ wunɑ i kɑ ko wigibu mɑm mɑm, kpɑ u bɛɛn hunde kɑ bɛɛn bwɛ̃rɑ kɑ bɛɛn wɑsi kpuro bere tɑɑrɛ sɑriru sɔɔ sere kɑ bɛsɛn Yinni Yesu Kirisin wurɑmɑrɔ. 24 Gusunɔ wi u bɛɛ sokɑ u nɑɑnɛ mɔ, u koo mɑɑ ye kpuro ko.
25 Nɛgibu, i n sun kɑnɑru kuɑmmɛ.
26 I bɛsɛgibu kpuro tɔbirio kɑ kĩru.
27 Nɑ bɛɛ yiiremɔ kɑ Yinnin yĩsiru, i bɛsɛgibu kpuro tire teni gɑrio.
28 Kpɑ Yinni Yesu Kirisin durom mu n wɑ̃ɑ kɑ bɛɛ._