4
Kookoo si su Gusunɔ wɛ̃re
1 Ye n tie nɛgibu, i giɑ bɛsɛn min di mɛ n weenɛ i n sĩimɔ n kɑ Gusunɔ wɛ̃re, i mɑɑ mɔ̀ mɛ kɔ. Tɛ̃ sɑ yiire sɑ bɛɛ kɑnɑmɔ kɑ Yinni Yesun yĩsiru, i n mɔ̀ mɛ i n dɔɔ. 2 Domi i yɛ̃ yiire bi sɑ bɛɛ wɛ̃ kɑ Yinni Yesun yiiko. 3 Wee, ye Gusunɔ u kĩ bɛɛ sɔɔ, yerɑ i n dɛɛre kpɑ i tii kpĩ mɑm mɑm sɑkɑrɑrun kobu sɔɔ. 4 Kpɑ durɔ bɑɑwure u n yɛ̃ nge mɛ wi kɑ win kurɔ bɑ ko n wɑ̃ɑsinɛ dɛɛrɑru kɑ bɛɛrɛ sɔɔ, 5 n ǹ mɑɑ mɔ kɑ wɑsin binɛn kĩru nge mɛ tɔn tukobu bɑ mɔ̀ be bɑ kun Gusunɔ yɛ̃. 6 Gɑri yini sɔɔ, n ǹ weenɛ goo u win kpɑɑsi torɑri ǹ kun mɛ u nùn tɑki di. Sɑ bɛɛ yenin kirɔ kuɑ kɔ, sɑ bɛɛ sɔ̃ɔwɑ mɑ Yinniwɑ u koo yen mɔru kɔsiɑ. 7 Domi Gusunɔ kun sun sokɑ su kɑ dɑɑ disinugiɑ ko mɑ n kun mɔ sɑ n dɛɛre. 8 Yen sɔ̃, bɑɑwure wi u sɔ̃ɔsi te yinɑ, n ǹ tɔnun gere u yinɑ, Gusunɔn gerewɑ u yinɑ wi u bɛɛ win Hunde Dɛɛro kɑ̃.
9 Ye n sɑ̃ɑ nɑɑnɛ dokeobun kĩɑnɑɑ, n ǹ tilɑsi n kɑ bɛɛ ye yoruɑ. Domi Gusunɔ u bɛɛ sɔ̃ɔsi nge mɛ n weenɛ i n kĩɑnɛ bɛɛn tii tiinɛ sɔɔ. 10 Geemɑ, i mɔ̀ mɛ kɑ nɑɑnɛ dokeobu kpuro be bɑ wɑ̃ɑ Mɑsedɔniɔ. Adɑmɑ nɛgibu, sɑ bɛɛ kɑnɑmɔ, i n mɔ̀ mɛ i n dɔɔ. 11 I kookɑri koowo i n kɑ nɔɔ tiɑ sɑ̃ɑ, kpɑ i n bɛɛn tiin wunɑnɔsu mɔ̀, i n sɔmburu mɔ̀ nge mɛ sɑ rɑɑ bɛɛ yiire. 12 Nge mɛyɑ bɛɛn kookoosu su ko n wɑ̃ be bɑ kun nɑɑnɛ doken mi, kpɑ i kun mɑɑ gɑ̃ɑnu gɑnun yɑ̃ɑru mɔ.
Yinnin nɑɑru
13 Nɛgibu, sɑ kĩ i gem giɑ be bɑ gun sɔ̃, kpɑ i kun nuki sɑnkire nge be bɑ tie be bɑ kun yĩiyɔbu mɔ. 14 Sɑ nɑɑnɛ doke mɑ Yesu u gu, mɑ u kpɑm seewɑ gɔrin di. Yen sɔ̃, sɑ nɑɑnɛ sɑ̃ɑ mɑ, be bɑ Yesu nɑɑnɛ doke bɑ kɑ gu, Gusunɔ u koo kɑ bu wurɑmɑ kɑ wi sɑnnu.
15 Yeniwɑ Yinnin sɔ̃ɔsi bi sɑ bɛɛ sɔ̃ɔmɔ. Bɛsɛ be sɑ ko n wɑ̃ɑ dɔmɑ te Yinni u koo nɑ, sɑ ǹ ko gɔribu gbiiyɑ. 16 Domi u koo de gbɑ̃rɑbu bu nɔɔrɑ kɑ Gusunɔn gɔrɑdo wirugiin nɔɔgiru kɑ win kɔbɑn wurenu, kpɑ Yinnin tii u sɑrɑmɑ sɑɑ wɔllun di. Wigii be bɑ gu bɑ koo gbi bu se. 17 Yen biru bɛsɛ be sɑ tie sɑ wɑsi, bɑ koo sun suɑ kɑ be sɑnnu guru winu sɔɔ, kpɑ su kɑ nùn yinnɑ wom dirum sɔɔ. Mɛyɑ sɑ ko n wɑ̃ɑ kɑ wi sɑnnu kɑ bɑɑdommɑ. 18 Yen sɔ̃, i de i dɑm kɛ̃ɛnɑ kɑ gɑri yini.