2
1 I de n bɛɛ sɔ̃ nge mɛ nɛn hɑniɑn kpɑ̃ɑrɑ nɛ bɛɛn sɔ̃ kɑ Lodisegibun sɔ̃ kɑ mɑɑ be kpuron sɔ̃ be bɑ ǹ kɑ mɑn nɔni wɑɑre. 2 Nɑ mɔ̀ mɛ, n kɑ bu dɑm kɛ̃ n kpɑ̃, kpɑ ben tii bɑ n gbinnɛ kɑ kĩru, kpɑ ben yɛ̃ru tɑ n sosimɔ sikɑ sɑriru sɔɔ. Nge mɛyɑ bɑ koo kɑ Gusunɔn ɑsiri giɑ ye yɑ sɑ̃ɑ Kirisin tii. 3 Wi sɔɔrɑ bwisi kɑ yɛ̃run dukiɑ kpuro beruɑ.
4 Nɑ bɛɛ yeni sɔ̃ɔmɔwɑ kpɑ goo u ku rɑɑ bɛɛ nɔni wɔ̃ke kɑ nɔɔ dobu. 5 Domi bɑɑ nɛn wɑsin kuseru tɑ̀ kun wɑ̃ɑ bɛɛn mi, kɑ mɛ, nɛn hunde yɑ kɑ bɛɛ wɑ̃ɑ. Nɑ mɑɑ nuku dobu mɔ yèn sɔ̃ i wɑ̃ɑ nɔɔ tiɑ sɔɔ, mɑ bɛɛn nɑɑnɛ dokebu yɔ̃ dim dim Kirisi sɔɔ.
Wɑ̃ɑ te tɑ yibɑ Kirisi sɔɔ
6 Ǹ n mɛn nɑ, nge mɛ i Yinni Yesu Kirisi wurɑ, i n bɛɛn wɑ̃ɑru dimɔ i n gbinnɛ kɑ wi. 7 I de bɛɛn gbini yi n duku wi sɔɔ, kpɑ i n tii nɔɔrimɔ i n kpɛ̃ɑmɔ sɑɑ win min di, kpɑ i n tɑ̃sɑ nɑɑnɛ dokebu sɔɔ nge mɛ bɑ bɛɛ sɔ̃ɔsi, kpɑ siɑrɑbu bu n yibɑ bɛɛn nɔɔ sɔɔ.
8 I n tii sɛ kpɑ goo u ku rɑɑ bɛɛ yinɑ mwɑ kɑ win yɛ̃ru gɑru kɑ tɑki dibu. Sɔ̃ɔsi ten bweseru tɑ nɑɑmɔwɑ sɑɑ tɔmbun deemɑɑn di kɑ mɑɑ hɑnduniɑn bũnu, n ǹ mɔ Kirisin min di. 9 Domi mɛ̀n nɔru Gusunɔ nɛ, yɑ sɔ̃ɔsirɑ Kirisin wɑsi tɔnugii sɔɔ. 10 Mɑ i kpuro mɔ wi sɔɔ bɛɛ kɑ win gbinnɑɑ sɔɔ wi u sɑ̃ɑ wɔllun wirugibu kɑ yiikogibun sinɑ boko.
11 Bɛɛ kɑ win gbinnɑɑ ye sɔɔ, i mɑɑ bɑngo wɑ, ɑdɑmɑ n ǹ mɔ bɑngo ye tɔnu rɑ ko. Yeni yɑ weewɑ Kirisin min di. Yɑ sɑ̃ɑwɑ yɑkiɑbu sɑɑ wɑsi durumgiin dɑm di. 12 Geemɑ, sɑnɑm mɛ bɑ bɛɛ bɑtɛmu kuɑ n sɑ̃ɑre bɑ bɛɛ sikuɑwɑ kɑ Kirisi mɑ bɑ bɛɛ seeyɑ kɑ wi, yèn sɔ̃ i Gusunɔn dɑm bɑkɑm nɑɑnɛ sɑ̃ɑ wi u nùn seeyɑ gɔrin di. 13 Gɑsɔ, i rɑɑ sɑ̃ɑ gɔribu bɛɛn torɑnun sɔ̃ kɑ mɑɑ yèn sɔ̃ i sɑ̃ɑ be bɑ kun bɑngo kue. Adɑmɑ tɛ̃ Gusunɔ u bɛɛ kuɑ wɑsobu kɑ Kirisi sɑnnu sɑnɑm mɛ u sun bɛsɛn torɑnu kpuro suuru kuɑ. 14 Kirisi u yorɑ ye wɔkɑ ye yɑ sun tɑɑrɛ wɛ̃ bɛsɛn woodɑ sɑrɑbun sɔ̃, u mɑɑ ye kpɑre dɑ̃ɑ bunɑnɑru wɔllɔ u kɑ ye kpeesiɑ. 15 Sɑnɑm mɛ u gu dɑ̃ɑ bunɑnɑru wɔllɔ u wɔllun wirugibu kɑ yiikogibu kɑmiɑ u bu sekuru doke bɑtumɑ sɔɔ u mɑɑ ben dɑm kpeesiɑ.
16 Ǹ n mɛn nɑ, i ku de goo u bɛɛ tɑɑrɛ wɛ̃ dim kɑ nɔrubu sɔɔ, ǹ kun mɛ tɔ̃ɔ bɑkɑnu gɑnun dibu sɔɔ, ǹ kun mɛ suru kpɑon yɑribu kɑ tɔ̃ɔ wɛ̃rɑruginun kookoosu sɔɔ. 17 Yeni kpuro yɑ sɑ̃ɑwɑ gɑ̃ɑ ni nu sisin yɑɑyɑɑsu. Kirisin tiiwɑ gɑ̃ɑ ni. 18 Goo wi u sɑ̃ɑre u tii kɑwɑmɔ, mɑ u wɔllun gɔrɑdobɑ sɑ̃ɑmɔ, i ku de u bɛɛ bɛɛn siɑn ɑre wɔrɑri. Domi tɔnu win bweseru u tii suɑmɔ kɑ̃sinun sɔ̃, u mɑɑ tii gɑ̃ɑmɔ kɑm win bwisiku tɔnuginun sɔ̃. 19 U ǹ Kirisi nɛni kem kem wi u sɑ̃ɑ wiru, tèn min di wɑsi kpuro yi mɛnnɛ kɑ yin gbin gbinkɑ kɑ sĩinu, yi kɑ dɑm wɑɑmɔ yi kpɛ̃ɑmɔ nge mɛ Gusunɔ u yi sosimɔ.
Gɔɔ kɑ wɑ̃ɑru Kirisi sɔɔ
20 Mɑ̀ i gu kɑ Kirisi sɑnnu i kisirɑ hɑnduniɑn komɑnun di, mbɑn sɔ̃nɑ i wɑ̃ɑru dimɔ nge hɑnduniɑ yenigibu. Mbɑn sɔ̃nɑ i derimɔ bɑ bɛɛ woodɑbɑ sɔbimɔ be bɑ nɛɛ, 21 ɑ ku yeni bɛsu, ɑ ku yeni dendɑ, ɑ ku yeɔnɔ bɑbɑ. 22 Yeni kpuro yɑ koo kɑm kowɑ bɑ̀ n ye dendimɔ. Tɔmbun woodɑ kɑ ben sɔ̃ɔsinu tɔnɑwɑ i swĩi. 23 Geemɑ, woodɑ be, bɑ kɑ bwisin gɑ̃ɑnu weenɛ ɑ̀ n bu mɛɛrɑ, kɑ ben sɑ̃ɑru te tɑ wee sɑɑ tɔnun gɔ̃ru kĩrun di, kɑ ben tii kɑwɑ weesugibu, kɑ mɑɑ ben wɑsin seserun serusiɑbu. Adɑmɑ bɑɑ woodɑ ben tiɑ kun dɑm gɑm mɔ yu kɑ wɑsin kĩru kɑnkɑm tɑɑre.