TIRE TE PƆLU
U KOLOSEGIBU KUA
1
Tɔbiribu
1-2 Bɛɛ nɑɑnɛ dokeobu Koloseɔ, bɛɛ be i sɑ̃ɑ bɛsɛn kĩnɑsi bɔrɔkinibɑ Kirisi sɔɔ, nɛ Pɔlu, Kirisi Yesun gɔro Gusunɔn kĩrun sɔ̃ kɑ bɛsɛgii Timɔte, sɑ bɛɛ tɔburɑ. Gusunɔ bɛsɛn Bɑɑbɑ u bɛɛ durom kuɑ kpɑ u bɛɛ ɑlɑfiɑ kɛ̃.
Siɑrɑbu kɑnɑru sɔɔ
3 Sɑ rɑ Gusunɔ bɛsɛn Yinni Yesu Kirisin Bɑɑbɑ siɑre bɛɛn sɔ̃ bɑɑdommɑ bɛsɛn kɑnɑru sɔɔ, 4 yèn sɔ̃ sɑ nuɑ nge mɛ i Yesu Kirisi nɑɑnɛ doke kɑ nge mɛ i nɑɑnɛ dokeobu kpuron kĩru mɔ. 5 Sɑnɑm mɛ Lɑbɑɑri geɑ ye yɑ sɑ̃ɑ gem gɑri yɑ gbiɑ yɑ turɑ bɛɛn mi, i nuɑ mɑ i yĩiyɔbu mɔ mɑ bɑ bɛɛ gɑ̃ɑnu yiiye wɔllɔ. Yĩiyɔ bin sɔ̃nɑ i nɑɑnɛ dokebu kɑ kĩru mɔ. 6 Lɑbɑɑri geɑ ye, yɑ tɛriɑmɔ yɑ kɑ domɑru nɑɑmɔ hɑnduniɑ kpuro sɔɔ nge mɛ yɑ kuɑ bɛɛn mi sɑɑ mìn di i Gusunɔn durom gɑri nuɑ mɑ i tubɑ mɑ yi sɑ̃ɑwɑ gem. 7 Epɑfɑsi bɛsɛn kĩnɑsi sɔm kowosi, wi u sɑ̃ɑ Kirisin sɔm kowo nɑɑnɛgii mɑ u kuɑ bɛsɛn kɔsire bɛɛn mi, wiyɑ u bɛɛ ye giɑsiɑ. 8 U mɑɑ sun kĩi te Hunde Dɛɛro bɛɛ kɑ̃n bɑɑru sɔ̃ɔwɑ.
9 Yen sɔ̃nɑ sɑ rɑ n kɑnɑru mɔ̀ bɛɛn sɔ̃ kpeetim sɑri sɑɑ mìn di sɑ bɛɛn gɑri nuɑ. Sɑ Gusunɔ kɑnɑmɔ u de i giɑ mɑm mɑm ye u kĩ, kpɑ u de win Hunde u bɛɛ bwisi kɑ lɑɑkɑri kɛ̃. 10 Sɑɑ yerɑ bɛɛn sɑnu sɑnusu su ko n kɑ Yinnigiigisu weenɛ, kpɑ i n dɑ ko ye n koo nùn wɛ̃re. Bɛɛn wɑ̃ɑrɑ koo mɑɑ kookoo geesu bwese bwesekɑ sɔ̃ɔsi nge dɑ̃ɑ te tɑ bii geenu mɑrumɔ, kpɑ i Gusunɔ giɑm sosi. 11 Sɑ Gusunɔ kɑnɑmɔ u bɛɛ tɑ̃sisiɑ kpuro sɔɔ kɑ win dɑm yiikogim, kpɑ i kpĩ i n kɑ yɑbu bɑɑyere tɛmɑnɛ kɑ suuru nuku dobu sɔɔ. 12 I n Bɑɑbɑ siɑrɑmɔ wi u derɑ i bɔnu mɔ tubi sɔɔ ye Gusunɔ u nɑɑnɛ dokeobu yiiye yɑm bururɑm sɔɔ. 13 Geemɑ u sun wɔrɑ sɑɑ yɑm wɔ̃kurun dɑm di mɑ u sun sinɑsiɑ mi win Bii kĩnɑsi u bɑndu dii. 14 Domi win sɑɑbuwɑ sɑ yɑkiɑrɑ mɑ bɑ bɛsɛn durum suuru kuɑ.
Kirisin tiin ɑsɑnsi
kɑ win sɔmburu
15 Gusunɔ u ǹ wɑɑrɔ ɑdɑmɑ Kirisi u sun nùn sɔ̃ɔsi mɑm mɑm win wɑsi sɔɔ. U sɑ̃ɑ win Bii yerumɑ wi u wɑ̃ɑ bɑ sere gɑ̃ɑnu kpuro tɑkɑ kuɑ. 16 Domi win min diyɑ Gusunɔ u bɑɑyere tɑkɑ kuɑ ye yɑ wɑ̃ɑ wɔllɔ kɑ temɔ, ye sɑ kɑ nɔni wɑɑmɔ kɑ ye sɑ ǹ wɑɑmɔ, nge wɔllun sinɑmbu kɑ wirugibu kɑ yiikogibu kɑ sere dɑmgibu. Gusunɔ u kpuro tɑkɑ kuɑ sɑɑ win min di, u mɑɑ ye kuɑ win sɔ̃. 17 U wɑ̃ɑ bɑ sere gɑ̃ɑnu kpuro tɑkɑ kuɑ. Win dɑm sɑɑbuwɑ gɑ̃ɑnu kpuro nu kɑ wɑ̃ɑ nin ɑyerɔ. 18 Win yigbɛru tɑ sɑ̃ɑwɑ nge wɑsi, wiyɑ mɑɑ sɑ̃ɑ nge yin wiru. Wiyɑ wɑ̃ɑrun nuuru, wiyɑ mɑɑ gbiɑ u seewɑ gɔrin di, u kɑ ko kpuron gbiikoo. 19 Domi Gusunɔn gɔ̃ru kĩrɑ win dɑɑ kpuro yɑ n kɑ wɑ̃ɑ win Bii sɔɔ. 20 Mɑ n nùn wɛ̃re u wi kɑ tɔmbun sɑnnɔ kpeesiɑ kɑ win Biin yɛm dɑ̃ɑ bunɑnɑru wɔllɔ kpɑ u kɑ tii gɑ̃ɑnu kpuro dorɑsiɑ sɑɑ win min di ni nu wɑ̃ɑ temɔ kɑ ni nu wɑ̃ɑ wɔllɔ.
21 Bɛɛ mɑɑ, i rɑɑ gɑsɔ kɑ Gusunɔ tomɑ, i rɑɑ sɑ̃ɑ win yibɛrɛbɑ bɛɛn bwisikunu sɔɔ bɛɛn kookoo kɔ̃susun sɔ̃. 22 Adɑmɑ tɛ̃, Gusunɔ u kɑ tii bɛɛ dorɑsiɑ sɑnɑm mɛ win Bii u gu nge tɔnu, kpɑ i kɑ yɔ̃rɑ win wuswɑɑɔ i n dɛɛre, i n wɑ̃ɑ disinu kɑ tɑɑrɛ sɑriru sɔɔ 23 i n tɛmɑnɛ i n tɑ̃sɑ nɑɑnɛ dokebu sɔɔ dim dim, kpɑ i ku rɑ bɛɛn yĩiyɔbu deri bi i mɔ sɑɑ mìn di i Lɑbɑɑri geɑ nuɑ, ye bɑ tɔnu bɑɑwure nɔɔsiɑ wi u wɑ̃ɑ hɑnduniɑ sɔɔ. Nɛ Pɔlu nɑ mɑɑ kuɑ yen sɔmɔ.
Sɔmbu te bɑ Pɔlu
nɔmu sɔndiɑ Yesun yigbɛrun sɔ̃
24 Tɛ̃ nɛn nukurɑ do yèn sɔ̃ nɑ nɔni swɑ̃ɑru wɑɑmɔ bɛɛn sɔ̃. Mɑ nɑ nɔni swɑ̃ɑ te yibiɑmɔ te Kirisi u koo rɑ wɑ win yigbɛrun sɔ̃ te tɑ sɑ̃ɑ win wɑsi. 25 Mɑ Gusunɔ u mɑn kuɑ yigbɛ ten sɔm kowo nge mɛ u mɑn yiire bɛɛn sɔ̃, kpɑ n kɑ win gɑri kpuro nɔɔsiɑ. 26 Gɑri yi, yi sɑ̃ɑ ɑsiri ye u rɑɑ tɔmbu kpuro berue sɑɑ yellun di, ɑdɑmɑ tɛ̃ u wigibu ye sɔ̃ɔsi. 27 Domi u kĩ u bu giɑsiɑ mɑ win ɑsiri yɑ bɛɛrɛ kɑ yiiko mɔ bwese tukunun suunu sɔɔ. Asiri ye wee, Kirisi wɑ̃ɑ bɛɛ sɔɔ, yeyɑ yɑ gerumɔ mɑ i ko Gusunɔn yiiko bɔnu ko. 28 Kirisi win gɑriyɑ sɑ kpɑrɑmɔ, mɑ sɑ tɔnu bɑɑwure kirɔ mɔ̀, sɑ mɑɑ bu keu sɔ̃ɔsimɔ kɑ bwisi gee, kpɑ bu ko tɔn girobu be kɑ Kirisin gbinnɑɑ sɔɔ su sere bu tusiɑ Gusunɔn wuswɑɑɔ. 29 Yen sɔ̃nɑ nɑ sɔmburu mɔ̀ nɑ sunɑmɔ kɑ win dɑm mɛ mu sɔmburu mɔ̀ nɛ sɔɔ gem kɑ tiɑ.