3
1 Bɑ bɛɛ seeyɑ kɑ Kirisi sɑnnu gɔrin di. Ǹ n mɛn nɑ, i wɔllun gɑ̃ɑnu kɑsuo mi Kirisi u sɔ̃ Gusunɔn nɔm geuɔ. 2 I wɔllun gɑ̃ɑnun bwisikunu koowo, n ǹ mɔ temginu. 3 Domi i gu, bɛɛn wɑ̃ɑ geerɑ mɑɑ beruɑ kɑ Kirisi sɑnnu Gusunɔn mi. 4 Kirisi wi, u sɑ̃ɑwɑ bɛɛn wɑ̃ɑru. Sɑnɑm mɛ u koo kurɑmɑ, bɛɛn tii mɑɑ i ko i terɑ kɑ wi sɑnnu win yiiko sɔɔ.
Wɑ̃ɑ gururu kɑ wɑ̃ɑ kpɑɑru
5 Ǹ n mɛn nɑ, i hɑnduniɑn kĩrun gɑ̃ɑnu kpuro goowo ni nu sɔmburu mɔ̀ bɛɛ sɔɔ, niyɑ kɔ̃ɔ mɛnnɑbu tɑntɑnɑru sɔɔ, kɑ dɑɑ disinugiɑ, kɑ wɑsin binɛ, kɑ kĩru kɑnkɑm, kɑ kɔdɛ, domi kɔdɛ yɑ sɑ̃ɑwɑ nge bũu sɑ̃ɑru. 6 Gɑ̃ɑ ni kpuron sɔ̃nɑ Gusunɔn mɔru wee ben mi, be bɑ ǹ nùn mɛm nɔɔwɑmmɛ. 7 Geemɑ, i rɑɑ gɑsɔ mɔ̀ nge be, sɑnɑm mɛ torɑ nin bweserɑ bɛɛ wɑ̃ɑsi.
8 Adɑmɑ tɛ̃, i ye kpuro kɔ̃ɔwɔ ye n sɑ̃ɑ mɔru kɑ nuku gbisibu kɑ mɑɑ nuku kɔ̃suru. I ku de wɔmburu ǹ kun mɛ gɑri swininu nu yɑri bɛɛn nɔɔ sɔɔn di pɑi. 9 I ku weesu kuɑnɑ domi i dɑɑ gurɑ kɑ yen kookoosu potɑ kɔ, 10 mɑ i dɑɑ kpɑɑ sebuɑ. Gusunɔwɑ u bɛɛ dɑɑ kpɑɑ ye wɛ̃ i n kɑ nùn giɑmɔ kpɑ i n kɑ nùn weenɑmɔ. 11 Nge mɛyɑ bɛɛ sɔɔ goo kun goo, tɔn tuko kɑ Yuu, wi u bɑngo kuɑ kɑ wi u ǹ bɑngo kue, bɑru kpɑɑrugii, nɔni wɔ̃kunugii, yoo kɑ tii mɔwɔ, ɑdɑmɑ Kirisi tɔnɑwɑ sɑ̃ɑ gɑ̃ɑnu, u mɑɑ wɑ̃ɑ tɔmbu kpuron suunu sɔɔ.
12 Ǹ n mɛn nɑ, yèn sɔ̃ Gusunɔ u bɛɛ kĩɑ mɑ u bɛɛ gɔsɑ i kɑ ko wigibu, wee ye n weenɛ i sebe, wɔnwɔndu kɑ tɔn geeru kɑ tii kɑwɑbu kɑ dɑɑ duudwiɑ kɑ suuru. 13 I n tɛmɑnɑsinɛ kpɑ i n suuru kuɑnɑmmɛ gɑri gɛɛ yì n duɑ bɛɛn suunu sɔɔ. Nge mɛ Yinni u bɛɛ suuru kuɑ, i n suuru kuɑnɑmmɛ nge mɛ. 14 Yeni kpuron wɔllɔ i kĩru sebuo te tɑ koo de i n nɔɔ nɛ mɑm mɑm. 15 Kpɑ i de Kirisin bɔri yɛndu tɑ n bɛɛn gɔ̃rusu kpɑre, kpɑ i n tɑkɑru mɔ̀. Bɑ bɛɛ sokɑwɑ i n kɑ sɑ̃ɑ wɑsi tee, kpɑ i n bɔri yɛndu mɔ. 16 I de Kirisin gɑri yi n yibɑ bɛɛn gɔ̃ruɔ nge dukiɑ. I gɑri biɑ kuɑnɔ kpɑ i dɑm kɛ̃ɛnɑ kɑ bwisi gee kpɑ i n womusu mɔ̀ i n Gusunɔ tɔmɑmɔ. I nùn tɑkɑrun womusu kuo bɛɛn gɔ̃rusɔ. 17 Bɛɛn kookoosu kɑ bɛɛn gere sɔɔ, i ye kpuro koowo i kɑ Yinni Yesun yĩsiru bɛɛrɛ wɛ̃ kpɑ i Gusunɔ Bɑɑbɑ tɑkɑru ko win min di.
Tɔmbun nɔɔsinɑɑ
wɑ̃ɑ kpɑɑru sɔɔ
18 Bɛɛ kurɔbu i bɛɛn durɔbu wiru kpĩiyɔ nge mɛ n weenɛ Yinnigii u ko.
19 Bɛɛ durɔbu i bɛɛn kurɔbu kĩɔ, i ku de i n sɛ̃ be sɔɔ.
20 Bɛɛ bibu i bɛɛn mɔwɔbu mɛm nɔɔwɔ gɑ̃ɑnu bɑɑnire sɔɔ, domi mɛyɑ Yinni u kĩ.
21 Bɛɛ mɑɑ tundobu i ku bɛɛn bibu mɔrun kookoosu kuɑ kpɑ ben nuki yi sɑnkirɑ.
22 Bɛɛ yobu i bɛɛn yinnibu mɛm nɔɔwɔ kpuro sɔɔ hɑnduniɑ mi, n ǹ mɔ sɑnɑm mɛ bɑ bɛɛ yɔ̃re tɔnɑ, i kɑ bu tɔn geeru sɔ̃ɔsi, ɑdɑmɑ i bu mɛm nɔɔwɔ n kun kɑ murɑfitiru yèn sɔ̃ i Yinni nɑsie. 23 Ye i mɔ̀ kpuro i ye koowo kɑ kĩru, kpɑ n sɑ̃ɑ nge Yinniwɑ i kuɑmmɛ, n ǹ mɔ tɔmbu. 24 I n yɛ̃ mɑ Yinniwɑ u koo bɛɛ ɑre kɔsiɑ yi yi sɑ̃ɑ tubi ye u win tɔmbu yiiye, domi Kirisiwɑ bɛɛn Yinni wìn wɑ̃ɑru i wɑ̃ɑ. 25 Adɑmɑ wi u torɑ, u koo win ɑre wɑ nge mɛ win torɑrɑ nɛ, domi Gusunɔn mi, goo kun goo.