Kɑ̃sinu kɑ sɔ̃ɔsi ni Pɔlu wɑ
12
1 Nɑ ǹ kon ko nɑ kun woo kɑnɛ bɑɑ mɛ n ǹ wɑ̃. Tɛ̃ kon kɑ̃sinu kɑ sɔ̃ɔsinun gɑri ko ni Yinni u mɑn sɔ̃ɔsi. 2 Nɑ Kirisigii goo yɛ̃ wi bɑ suɑre sere Gusunɔ wɔllɔ n wɔ̃ɔ wɔkurɑ nnɛ turɑ gisɔ. Bɑ tɛ̃ wi suɑwɑ kɑ gem? Nge u kɑ̃sɑwɑ. Gusunɔ turowɑ yɛ̃. 3 Mɛyɑ nɑ yɛ̃ mɑ bɑ durɔ wi suɑ sere Gusunɔn mi. Nɑ mɑɑ wure nɑ gerumɔ, bɑ nùn suɑwɑ kɑ gem? Nge u kɑ̃sɑwɑ. Gusunɔ turowɑ yɛ̃. 4 Miyɑ u gɑri nuɑ yi yi ǹ weenɛ tɔnu u gere, yi u ǹ mɑm kpɛ̃ u gere. 5 Kon durɔ win sɔ̃ woo kɑnɑ. Adɑmɑ nɑ ǹ nɛn tiin sɔ̃ woo kɑnɑmɔ, mɑ n kun mɔ nɛn dɑm sɑrirun sɔ̃. 6 Bɑɑ nɑ̀ n woo kɑnɑbu kĩ, nɑ ǹ kon ko wiiro domi geeyɑ kon gere. Adɑmɑ nɑ ǹ wurɑmɔ n woo kɑnɑ kpɑ goo u ku rɑɑ mɑn mɛɛri n kere nge mɛ u mɑn wɑɑmɔ, ǹ kun mɛ, nge mɛ u nɔɔmɔ nɛn nɔɔn di.
7 Adɑmɑ n ku kɑ tii suɑ sɔ̃ɔsi nin kpɑ̃ɑrun sɔ̃, bɑrɑru gɑrɑ mɑn wɔri nge sɑ̃kɑ nɛn wɑsi sɔɔ. Tɑ nɑ nge Setɑm sɔmɔ tu kɑ mɑn so kpɑ tu mɑn yinɑri n tii suɑ. 8 Nɑ Yinni kɑnɑ tiɑ tiɑn nɔn itɑ bɑrɑ ten sɔ̃ u kɑ mɑn tu wunɑri. 9 U mɑn wisɑ u nɛɛ, win durom mu mɑn turɑ domi win dɑm mu rɑ sɔ̃ɔsire sɑnɑm mɛ nɑ ǹ dɑm mɔ. Ǹ n mɛn nɑ, nɑ kĩru bo n kɑ nɛn dɑm sɑriru woo kɑnɑ kpɑ Kirisin dɑm mu n mɑn wɑ̃ɑsi. 10 Yen sɔ̃nɑ nɑ nuku dobu mɔ dɑm sɑriru sɔɔ kɑ wɔmɑ kɑ nuku sɑnkirɑnu kɑ nɔni swɑ̃ɑru, kɑ mɑɑ wururɑbu ye nɑ sɔɔwɑ Kirisin sɔ̃. Domi sɑnɑm mɛ nɑ ǹ dɑm mɔ, sɑnɑm mɛyɑ nɑ sɑ̃ɑ dɑmgii.
Pɔlu u kɑ Korintigibu wurure
11 Nɑ gɑri mɔ̀ nge wiiro, ɑdɑmɑ tilɑsiwɑ i mɑn kuɑ. Bɛɛyɑ n weenɛ i nɛn geɑ gere. Domi bɑɑ nɑ̀ kun sɑ̃ɑ gɑ̃ɑnu, bɛɛn gɔro gisonko be, bɑ ǹ mɑn kere. 12 Kookoo si su sɔ̃ɔsimɔ mɑ nɑ sɑ̃ɑ gɔro, su koorɑ bɛɛn suunu sɔɔ kɑ suuru bɑkɑ. Siyɑ yĩrenu kɑ sɔm mɑɑmɑɑkigiɑ kɑ sɔm dɑmginu. 13 Mbɑ sɔɔrɑ i ǹ somiru wɑ tɑ turɑ nge Yesun yigbɛnu gɑnu mɑ n kun mɔ ye nɑ kun kue bɛɛn sɔmunu bɑɑsi. I mɑn torɑ te suuru kuo.
14 Wee nɑ sɔɔru kpɑ n kɑ kpɑm nɑ bɛɛn mi nɔn itɑse, nɑ ǹ kon mɑɑ ko bɛɛn sɔmunu. Bɛɛyɑ nɑ kĩ, n ǹ mɔ bɛɛn gobi. Domi n ǹ bibun bɑɑ bu kɑ gobi kɑsu yi bɑ koo kɑ ben mɔwɔbu nɔɔri, mɔwɔbun bɑɑwɑ bu kɑ ben bibu nɔɔri. 15 Nɛn nuku dobɑ n kɑ nɛn mɔru kpuro di kpɑ n kɑ nɛn tii tii dendi bɛɛn hunden sɔ̃. Nɑ̀ n bɛɛ kĩɑ n kpɛ̃ɑ, kĩi te i mɑn kĩ tɑ koo kɑɑrɑwɑ?
16 I wurɑ kɑ gem mɑ nɑ ǹ kue bɛɛn sɔmunu ɑdɑmɑ gɑbɑ nɛɛ nɑ bwisi mɔ, nɑ bɛɛ tɑki di. 17 Nge nɑ bɛɛ diwɑ sɑɑ be nɑ bɛɛ gɔriɑn turon min di? 18 Nɛnɑ nɑ Titu kɑnɑ u dɑ bɛɛn mi. Kɑ bɛsɛgii wi sɑnnɑ, nɑ bu gɔrɑ. Titu u bɛɛ tɑki di? N ǹ gɑ̃ɑ teenɑ sɑ nɑɑ gire nɛ kɑ wi? Sɑ ǹ kookoo teesu kue?
19 I tɑmɑɑ tɛɛbun di sɑ kɑ tii yinɑmɔwɑ bɛɛn wuswɑɑɔ? Aɑwo, n ǹ mɛ, nɛn kĩnɑsibu. Gusunɔn wuswɑɑɔwɑ sɑ gɑri gerumɔ nge mɛ Kirisi u kĩ kpɑ i kɑ tɑ̃si. 20 Nɑ wurure sɑnɑm mɛ kon turi bɛɛn mi, kpɑ nɑ kun bɛɛ deemɛ nge mɛ nɑ kĩ, bɛɛ mɑɑ, kpɑ i kun mɑn wɑ nge mɛ i kĩ. Nɑ wurure sɑnnɔsun sɔ̃ kɑ nisinu kɑ mɔru kɑ kinɛnu kɑ wɔnnɑɑ kɑ tɔn wĩinu kɑ tii suɑbu kɑ nɔɔ nɛɛ sɑriru. 21 Nɑ wurure Gusunɔ u ku rɑɑ mɑn kɑwe bɛɛn wuswɑɑɔ sɑnɑm mɛ kon kpɑm nɑ bɛɛn mi, kpɑ n ku rɑ swĩ tɔn dɑbirun sɔ̃ be bɑ rɑɑ torɑ mɑ bɑ ǹ gɔ̃ru gɔsie sɑɑ ben dɑɑ disinugiɑn di, kɑ kɔ̃ɔ mɛnnɑbu tɑntɑnɑru sɔɔ, kɑ dɑɑ bɛrɛtɛkɛ ye bɑ rɑ rɑɑ ko.