Pɔlu kɑ gɔro weesugibu
11
1 Nɑ kĩ i kɑ mɑn tɛmɑnɑ nɛn wiirɑru sɔɔ fiiko. Geemɑ, i kɑ mɑn tɛmɑnɛ. 2 Nɑ nisinu mɔ bɛɛn sɔ̃ ni nu wee Gusunɔn min di, domi i sɑ̃ɑ nge wɔndiɑ wi u kun durɔ yɛ̃, wi nɑ durɔ turo kɑ̃. Durɔ wiyɑ Kirisi. 3 Adɑmɑ nge mɛ wɑɑ yɑ Efɑ torɑsiɑ kɑ yen bwisi weesugii, nɑ wurure bɛɛn bwisikunu nu ku rɑɑ ko kɔ̃sunu kpɑ nu gɔsirɑ nu doonɑ sɑɑ nɑɑnɛn di ye i mɔ bɛɛ kɑ Kirisin gbinnɑɑ sɔɔ. 4 Domi i ku rɑ yinɛ goo ù n nɑ u bɛɛ Yesu tukon gɑri sɔ̃ɔmɔ. I mɑɑ sɔɔru sɑ̃ɑ i kɑ hunde tukɑ mwɑ ye i ǹ dɑɑ mwɛ. I kpɑm kĩ i lɑbɑɑri tukɑ wurɑ ye i ǹ dɑɑ wure.
5 Nɑ tɑmɑɑ gɑ̃ɑnu sɑri nì sɔɔ bɛɛn gɔro gisonko be, bɑ mɑn kere. 6 Bɑɑ mɛ gɑri geru gerusu kɑ mɑn sɛ̃, n ǹ mɔ nɑ yɛ̃ru bie nge mɛ sɑ bɛɛ sɔ̃ɔsi kpɑsɑsɑ kpuro sɔɔ.
7 Ye nɑ bɛɛ Gusunɔn Lɑbɑɑri geɑ nɔɔsiɑ nɑ ǹ kɔsiɑru gɑru mwɛ. Nɑ tii kɑwɑ n kɑ bɛɛ suɑ wɔllɔ. Ye nɑ kuɑ mɛ nɑ torɑwɑ? 8 Nɑ derɑ Yesun yigbɛnu gɑnu mɑn gobi kɔsiɑ. Nɑ sibu begiɑ mwɑɑri n kɑ bɛɛ somi. 9 Sɑnɑm mɛ nɑ wɑ̃ɑ bɛɛn mi, nɑ̀ n gɑ̃ɑnun bukɑtɑ mɔ, n ku rɑ kɑ ko bɛɛn goon sɔmunu, domi bɛsɛgii be bɑ nɑ Mɑsedɔnin di bɑ kɑ mɑn ye kpuro nɑɑwɑ yèn bukɑtɑ nɑ mɔ. Nɑ tii nɛnuɑ kpuro sɔɔ kpɑ nɑ kun sɑ̃ɑ bɛɛn sɔmunu. Mɛyɑ ko nɑ n mɑɑ tii nɛni. 10 Kɑ Kirisin gem mɛ mu wɑ̃ɑ nɛ sɔɔ, nɑ bɛɛ sɔ̃ɔmɔ mɑ goo sɑri wi u koo mɑn yinɑri n woo kɑnɑ gɑri yinin sɔ̃ Gɛrɛkibɑn tem kpuro sɔɔ. 11 Mbɑn sɔ̃nɑ. I tɑmɑɑ nɑ ǹ bɛɛ kĩ? Gusunɔwɑ yɛ̃.
12 Nge mɛ nɑ mɔ̀ tɛ̃, mɛyɑ ko nɑ n mɔ̀ kpɑ n bu swɑɑ gɑnɛ be bɑ kɑsu bu woo kɑnɑ bu nɛɛ, bɛsɛ kɑ be, sɑ sɑ̃ɑwɑ tiɑ. 13 Domi tɔn be, bɑ sɑ̃ɑ gɔro weesugibu, be bɑ rɑ gɑbu nɔni wɔ̃ke, mɑ bɑ tii sokumɔ Kirisin gɔrobu. 14 Gɑ̃ɑnu sɑri mi, ni nu biti mɔ domi Setɑm tii koo kpĩ u tii ko nge yɑm bururɑm gɔrɑdo. 15 Ǹ n mɛn nɑ, biti gɑɑ sɑri win sɔm kowobu bɑ̀ n tii kuɑ nge gem sɔm kowobu. Adɑmɑ bɑ koo ben ɑre wɑ nge mɛ ben kookoosu sɑ̃ɑ.
Nɔni swɑ̃ɑ te Pɔlu wɑ
win gɔrɑ sɔɔ
16 Nɑ kpɑm gerumɔ goo u ku mɑn mɛɛri nge wiiro. Adɑmɑ ì n mɑn mɛɛrɑ wiiro, i mɑn wuro nge mɛ, kpɑ nɛ mɑɑ n woo kɑnɑ fiiko. 17 Ye kon gere tɛ̃, yɑ ǹ wee Yinnin min di. Adɑmɑ nɑ ye gerumɔwɑ kɑ toro sindu domi nɑ yɛ̃ mɑ kon kpĩ n woo kɑnɑ. Nɑ gɑri gerumɔ nge wiiro. 18 Yèn sɔ̃ gɑbu dɑbinu bɑ wɑsin sɔ̃ woo kɑnɑmɔ, nɛn tii kon mɑɑ woo kɑnɑ. 19 Bɛɛ be i bwisi mɔ, i rɑ kɑ wiirobu tɛmɑnɛ. 20 I mɑɑri bɑ bɛɛ kuɑmmɛ nge yobu, mɑ bɑ bɛɛ gbɛnimɔ mɑ bɑ bɛɛ tɑki dimɔ mɑ bɑ bɛɛ gɛmmɔ mɑ bɑ bɛɛ bɑɑri soomɔ. 21 Sekurɑ mɑn mɔ̀ n kɑ bɛɛ sɔ̃ mɑ dɑmɑ nɛ nɑ kun mɔ n kɑ bɛɛ kuɑ mɛ.
Kɑ mɛ, goo ù n toro sindu mɔ nɑ mɑɑ mɔ nɛn tii. Nɑ gɑri sɑɑrimɔ nge wiiro. 22 Bɑ sɑ̃ɑ Yuubɑ? Mɛyɑ mɑɑ nɛn tii. Bɑ sɑ̃ɑ Isirelibɑ? Mɛyɑ mɑɑ nɛn tii. Bɑ sɑ̃ɑ Aburɑhɑmun bweseru? Mɛyɑ mɑɑ nɛn tii. 23 Bɑ sɑ̃ɑ Kirisin sɔm kowobu? Nɑ bu kere te sɔɔ. Nɛn gɑri yi, wiirɑ gɑriyɑ. Nɑ sɔmburu kuɑ nɑ bu kere, bɑ mɑn pirisɔm doke n bu kere, bɑ mɑn sɛni so nɑ ǹ yen geeru yɛ̃. Nɔn dɑbinu nɑ gɔɔ turuku kuɑ. 24 Nɔn nɔɔbuwɑ Yuubɑ bɑ mɑn sɛni nɔɔ weeru tiɑ sɑri so. 25 Bɑ mɑn dɑ̃ɑ so tiɑ tiɑn nɔn itɑ. Bɑ mɑn kpenu kɑsukure nɔn teeru. Nɔn itɑwɑ bɛsɛn goo gɑ nim diirɑ, mɑ nɔn teeru nɑ wɔri nim sɔɔ nɑ wɑ̃ɑ mi bururun di sere sisiru bururu. 26 Nɛn sɑnum dɑbinu sɔɔ nɑ rɑ n wɑ̃ɑ kɑri sɔɔ dɑɑ bɑkɑnun sɔ̃ kɑ swɑɑ diobun sɔ̃, gɑsɔ nɛn tiin bweseru sɔɔ, gɑsɔ tɔn tukobun mi, gɑsɔ wuu sɔɔ, gɑsɔ gbɑburɔ, gɑsɔ nim wɔ̃ku sɔɔ, gɑsɔ mɑɑ be bɑ sɑ̃ɑre nɑɑnɛ dokeobun mi. 27 Nɑ sɔm dɑmginu kuɑ, nɑ mɑɑ wɑhɑlɑ wɑ. Nɑ dom serɑ nɔn dɑbinu. Nɑ gɔ̃ɔru kɑ nim nɔru wɑ. Nɑ dĩɑnu biɑ nɔn dɑbinu. Wooru kɑ tererɑ mɑn deemɑ. 28 Ye yɑ tie nɑ ǹ yen gɑri mɔ̀ mɑ n kun mɔ gɑri yi nɑ sɔɔwɑ bɑɑdommɑ, yiyɑ Yesun yigbɛnu kpuron bwisikunu. 29 Goo ù n dɑm bie nɑ rɑ n mɑɑ dɑm biewɑ. Bɑ̀ n goo sokurɑsiɑ, n dɑ mɑn mɛniwɑ.
30 Yɑ̀ n kuɑ tilɑsi n kɑ woo kɑnɑ, nɛn dɑm sɑrirun sɔ̃nɑ kon woo kɑnɑ. 31 Gusunɔ, Yinni Yesun Bɑɑbɑ, wi n weenɛ bu siɑrɑ kɑ bɑɑdommɑɔ, u yɛ̃ mɑ nɑ ǹ weesu mɔ̀. 32 Sɑnɑm mɛ nɑ wɑ̃ɑ Dɑmɑsiɔ, wuu yɛ̃ro wi sinɑ boko Aretɑsi u yi, u derɑ bɑ wuun kɔnnɔsu kɛnuɑ bu kɑ mɑn mwɑ. 33 Adɑmɑ bɑ mɑn yɑrɑ sɑɑ gbɑ̃rɑrun fɛnɛntin di kɑ bireru. Nge mɛyɑ nɑ kɑ nùn kisirɑri.