Somiru nɑɑnɛ dokeobun sɔ̃
9
1 N ǹ mɑɑ sɑ̃ɑ tilɑsi n kɑ bɛɛ tireru yoruɑ somirun sɔ̃ te bɑ nɑɑnɛ dokeobu mɔrisiɑmmɛ. 2 Domi nɑ bɛɛn kĩru yɛ̃, nɑ mɑɑ Mɑsedɔnigibu woo kɑnɛ bɛɛn sɔ̃ nɑ nɛɛ, nɑɑnɛ dokeo be bɑ wɑ̃ɑ Gɛrɛkibɑn temɔ bɑ somirun sɔɔru kpɑ sɑɑ ginɑkun di. Bɛɛn hɑniɑ yɑ ben dɑbiru kookɑri koosiɑ. 3 Kɑ mɛ, nɑ bɛɛ bɛsɛgii beni gɔriɑmmɛ kpɑ bɛsɛn woo kɑnɑbu bɛɛn sɔ̃ gɑri yini sɔɔ bu ku ko kɑm. Nɑ kĩ i n sɔɔru sɑ̃ɑ nge mɛ nɑ geruɑ. 4 Ǹ kun mɛ, Mɑsedɔnigibu gɑbu bɑ̀ n mɑn yɔ̃sirimɑ, mɑ bɑ deemɑ i ǹ sɔɔru sɑ̃ɑ, sekurɑ koo sun mwɑ bɛsɛn toro sin ten sɔ̃. Kɑɑ mɑɑ sere gere bɛɛ? 5 Yen sɔ̃nɑ n mɑn wɛ̃re n bɛsɛgii beni kɑnɑ bu mɑn gbiiyɑ bɛɛn mi bu kɑ kɛ̃ɛ geeru sɔɔru ko tèn nɔɔ mwɛɛru i kuɑ kɔ. Nge mɛyɑ tɑ ko tɑ n yii kpɑ tu sɔ̃ɔsi mɑ i wɛ̃ɛmɔ kɑ kĩru, n ǹ mɔ kɑ gɔ̃ru swiini.
6 I n yɛ̃ mɑ wi u duurɑ fiiko, fiikowɑ u koo gɛ̃. Wi u mɑɑ duurɑ n kpɑ̃, u koo gɛ̃ mu n kpɑ̃. 7 Ǹ n mɛn nɑ, n weenɛ bɑɑwure u wɛ̃ nge mɛ u gɔ̃ru doke, n ǹ mɔ kɑ gɔ̃ru swiini, ǹ kun mɛ, kɑ tilɑsi. Domi wi u wɛ̃ɛmɔ kɑ nuku tiɑ, Gusunɔ u yɛ̃ro kĩ. 8 U koo mɑɑ kpĩ u bɛɛ durom bwese bwesekɑ kpuro wɛ̃ n bɑndɑ kpɑ i n kɑ bɑɑyere kpuro mɔ bɑɑdommɑ yèn bukɑtɑ i mɔ, kpɑ n mɑɑ bɛɛ tiɑ n kpɑ̃ i kɑ sɔm geenu kpuro ko. 9 Nge mɛ Gusunɔn gɑri yi gerumɔ,
<<U win dukiɑ tɔmbu yɑbuɑ.
U sɑ̃ɑrobu kɛ̃nu wɛ̃ kɑ nuku tiɑ.
Win gem mu ko n wɑ̃ɑwɑ kɑ bɑɑdommɑɔ.>>
10 Gusunɔ wi u wuko bweseru wɛ̃ɛmɔ u duure, kɑ dĩɑnu u kɑ di, wiyɑ u koo bɛɛ bweseru kpuro wɛ̃ tèn bukɑtɑ i mɔ, kpɑ u tu kpiisiɑ, kpɑ bɛɛn gem mu bii dɑbinu mɑ. 11 U ko n dɑ bɛɛ dukiɑ wɛ̃ ye yɑ koo turi i kɑ kɛ̃ru wɛ̃ bɑɑdommɑ kɑ nuku tiɑ. Tɔn dɑbinu koo mɑɑ Gusunɔ siɑrɑ bɛɛn kɛ̃nun sɔ̃. 12 Domi sɔmbu te i mɔ̀ tɑ nɑɑnɛ dokeobun bukɑtɑ yibiɑmɔ. N ǹ ye tɔnɑ, tɑ mɑɑ derimɔ tɔn dɑbinu nu Gusunɔ siɑrɑmɔ. 13 Sɔmbu terɑ tɑ koo sɔ̃ɔsi nge mɛ i sɑ̃ɑ kpɑ dɑbiru bu kɑ Gusunɔ bɛɛrɛ wɛ̃ bɛɛn mɛm nɔɔbun sɔ̃ bi i kɑ Kirisin Lɑbɑɑri geɑ nɑɑnɛ doke. Bɑ koo mɑɑ nùn bɛɛrɛ wɛ̃ yèn sɔ̃ i bɛɛn mɔru bɔnu kuɑ kɑ nuku tiɑ kɑ be, kɑ mɑɑ tɔmbu kpuro. 14 Bɑ koo bɛɛ kɑnɑru kuɑ kɑ kĩi bɑkɑru durom bɑkɑm mɛn sɔ̃ mɛ Gusunɔ u bɛɛ kuɑ. 15 Su Gusunɔ siɑrɑ win kɛ̃run sɔ̃ te tɑ ǹ kɑ nɔɔ gerurɔ.