Kɛ̃ru kɑ nuku tiɑ
8
1 Nɛgibu sɑ kĩ i giɑ nge mɛ Gusunɔn durom mu sɔ̃ɔsirɑ Yesun yigbɛnu sɔɔ Mɑsedɔniɔ. 2 Bɑ lɑɑkɑri mɛɛribu wɑ nɔni swɑ̃ɑru sɔɔ. Adɑmɑ ben nuku doo bɑkɑbu derɑ bɑ kɛ̃ru wɛ̃ kɑ nuku tiɑ, bɑɑ mɛ ben sɑ̃ɑrɑ kpɑ̃. 3 Nɑ bu seedɑ diiyɑ mɑ bɑ wɛ̃ kɑ ben gɔ̃ru kĩru mɛ̀n nɔru bɑ koo kpĩ, bɑ mɑm wɛ̃ n kere mɛ. 4 Bɑ sun suuru kɑnɑ gem gem su kɑ de bɑ n bɔnu mɔ sɔmbu teni sɔɔ nɑɑnɛ dokeobun sɔ̃. 5 N koorɑ n kere ye sɑ rɑɑ yĩiyɔ. Bɑ ginɑ ben tii Yinni wɛ̃, bɑ sun wiru kpĩiyɑ kɑ Gusunɔn kĩru. 6 Yen sɔ̃nɑ sɑ Titu kɑnɑ u dɑ bɛɛn mi u durom mɛn sɔmburu dɑkurɑ nge mɛ u rɑɑ gbiɑ u tu toruɑ. 7 I dɑm mɔ kpuro sɔɔ, nɑɑnɛ dokebu kɑ gɑri gerubu kɑ yɛ̃ru kɑ hɑniɑ bɑkɑ kɑ bɛsɛn kĩru te i mɔ. Yen sɔ̃nɑ sɑ kĩ i n mɑɑ dɑm mɔ durom sɔmbu te sɔɔ.
8 Nɑ ǹ bɛɛ yiiremɔ, ɑdɑmɑ gɑbun hɑniɑwɑ nɑ bɛɛ sɔ̃ɔmɔ kpɑ i kɑ bɛɛn kĩrun gem mɛɛri nge mɛ mu nɛ. 9 Domi i bɛsɛn Yinni Yesu Kirisin durom yɛ̃, wi u sɑ̃ɑ dukiɑgii mɑ u tii kuɑ sɑ̃ɑro bɛɛn sɔ̃ kpɑ win sɑ̃ɑ te, tu kɑ bɛɛ ko dukiɑgibu.
10 Yen sɔ̃, nɑ bɛɛ nɛn bwisikunu sɔ̃ɔmɔ gɑri yi sɔɔ. N wɑ̃ i dɑ wuswɑɑɔ kɑ ye i ginɑkuu toruɑ, bɛɛ be i gɑbu gbiiyɑ sɔmbu te sɔɔ, n ǹ mɔ ten kobu tɔnɑ ɑdɑmɑ kɑ mɑɑ ten kĩrɔ. 11 Ǹ n mɛn nɑ, i sɔmbu te dɑkuro tɛ̃. Nge mɛ i gɔ̃ru doke i ko kɑ kĩru, i mɑɑ dɑkuro kɑ kĩru nge mɛ bɛɛn mɔrɑ nɛ. 12 Domi ɑ̀ n kɑ kĩru wɛ̃, wunɛn tiin mɔrɑ Gusunɔ rɑ mɛɛri u kɑ mwɑ, n ǹ mɔ goon mɔru.
13 Nɑ ǹ kĩ i wɔri yɑ̃ɑru sɔɔ gɑbun ɑlɑfiɑn sɔ̃, ɑdɑmɑ n weenɛwɑ mɔru tɑ n nɛ. 14 Sɑɑ yeni sɔɔ bɛɛn mɔrɑ kpɑ̃. Yen sɔ̃, i ko kpĩ i bu somi be bɑ yɑ̃ɑru mɔ, kpɑ bɛɛ ì n dɑ mɑɑ yɑ̃ɑru bɑrɔ, ben mɔru tɑ̀ n kpɑ̃, bu kɑ kpĩ bu bɛɛ somi. Nge mɛyɑ mɔru tɑ ko n kɑ nɛ. 15 Nge mɛ Gusunɔn gɑri geruɑ,
<<Wi u gurɑ n kpɑ̃ u ǹ sɑkɑ sɑre.
Wi u mɑɑ gurɑ fiiko u ǹ sɑkɑ kɔmiɛ.>>
Titu kɑ win kpɑɑsibu
16 Su Gusunɔ siɑrɑ wi u derɑ Titu u bɛɛn kĩru mɔ nge mɛ bɛsɛn tii sɑ mɔ. 17 Domi u bɛsɛn yiirebu wurɑ, win hɑniɑ yɑ mɑm kpɑ̃ sere u gɔ̃ru doke win tii u dɑ bɛɛn mi. 18 Sɑ mɑɑ bɛsɛgii goo gɔrimɔ kɑ wi sɑnnu wi Yesun yigbɛnu kpuro nu siɑrɑmɔ Lɑbɑɑri geɑn sɔmburun sɑɑbu. 19 Yen biru Yesun yigbɛnu nu mɑɑ nùn gɔsɑ u kɑ sun yɔ̃siri bɛsɛn sɑnum mɛ sɔɔ, su kɑ durom sɔmbu te ko kpɑ Yinnin tiin yiiko kɑ bɛsɛn kĩru tu sɔ̃ɔsirɑ.
20 Sɑ kookɑri mɔ̀ kpɑ goo u ku rɑɑ sun tɑɑrɛ wɛ̃ gobi bɛkɛ yin nɛnubun sɔ̃ yi bɑ sun nɔmu bɛrie. 21 Sɑ kĩ su gɑ̃ɑ geenu ko, n ǹ mɔ Yinnin nɔni sɔɔ tɔnɑ ɑdɑmɑ kɑ mɑɑ tɔmbun mi.
22 Sɑ bu gɔriɔ kɑ bɛsɛgii goo kpɑm wìn lɑɑkɑri sɑ mɛɛrɑ nɔn dɑbinu, sɑ mɑɑ wɑ u sɑ̃ɑ hɑniɑgii. Adɑmɑ tɛ̃ win hɑniɑ yɑ sosi yèn sɔ̃ u bɛɛ nɑɑnɛ sɑ̃ɑ gem gem. 23 Ǹ n Titun sɔ̃n nɑ, u sɑ̃ɑ nɛn beruse wi u kɑ mɑn sɔmburu mɔ̀ bɛɛn suunu sɔɔ. Ǹ n mɑɑ be bɑ nùn yɔ̃siriɔn sɔ̃n nɑ, bɑ sɑ̃ɑ Yesun yigbɛnun gɔrobu be bɑ Kirisi bɛɛrɛ wɛ̃ɛmɔ. 24 Yen sɔ̃, i bu sɔ̃ɔsio mɑ i bu kĩ kɑ gem, kpɑ Yesun yigbɛnu nu n yɛ̃ mɑ sɑ gem mɔ su kɑ woo kɑnɑ bɛɛn sɔ̃.