Romu 14

A ku wunɛn nɑɑnɛ dokeosi siri

¹ I de u du bɛɛ sɔɔ wi u kun dɑm mɔ nɑɑnɛ dokebu sɔɔ. I ku win bwisikunu sikirinɛ. ² Wini yĩiyɔ mɑ u koo kpĩ u kpuro di. Wiɔnɔ wi u kun dɑm mɔ nɑɑnɛ dokebu sɔɔ, u ku rɑ yɑɑ tem. ³ Wi u dimɔ u ku wi u kun dimɔ gɛm, kpɑ wi u kun dimɔ u ku wi u dimɔ tɑɑrɛ wɛ̃, domi Gusunɔ u yɛ̃ro wurɑ. ⁴ Wɑrɑ wunɛ ɑ kɑ goon sɔm kowo tɑɑrɛ wɛ̃ɛmɔ. Ù n yɔ̃ nge ù n wɔrumɑ, win yinnin gɑriyɑ. Adɑmɑ u koo yɔ̃rɑ domi Yinni u dɑm mɔ u kɑ nùn yɔ̃rɑsiɑ.

⁵ Wini u tɔ̃ɔ teeru gɑrisi n kere ni nu tie, wiɔnɔ u ni kpuro gɑrisi nu nɛ. I de bɑɑwure u n yɛ̃ kɑm kɑm ye u mɔ̀. ⁶ Wi u tɔ̃ru lɑsɑbu mɔ̀ u tu lɑsɑbu mɔ̀ Yinnin sɔ̃. Wi u dimɔ, Yinnin sɔ̃nɑ u dimɔ, yèn sɔ̃ u Gusunɔ siɑrɑmɔ. Wi u kun mɑɑ dimɔ, Yinnin sɔ̃nɑ u ǹ dimɔ, u mɑɑ Gusunɔ siɑrɑmɔ. ⁷ Geemɑ, sɑri bɛsɛ sɔɔ wi u wɑ̃ɑ win tiin sɔ̃, goo mɑɑ sɑri wi u gbimɔ win tiin sɔ̃. Domi sɑ̀ n wɑ̃ɑ sɑ wɑ̃ɑwɑ Yinnin sɔ̃. ⁸ Sɑ̀ n mɑɑ gu, sɑ guwɑ Yinnin sɔ̃. Ǹ n mɛn nɑ, sɑ̀ n wɑsi, ǹ kun mɛ sɑ̀ n gu, sɑ sɑ̃ɑwɑ Yinnigibu. ⁹ Domi Kirisi u gu mɑ u seewɑ gɔrin di u kɑ ko gɔribu kɑ wɑsobun Yinni. ¹⁰ Ǹ n mɛn nɑ wunɛ, mbɑn sɔ̃nɑ ɑ wunɛn wɔnɔ tɑɑrɛ wɛ̃ɛmɔ. Wunɛ mɑɑ, mbɑn sɔ̃nɑ ɑ wunɛn mɔɔ gɛmmɔ. Bɛsɛ kpurowɑ sɑ ko yɔ̃rɑ Gusunɔn siri yerɔ. ¹¹ Domi bɑ yoruɑ,

<<Yinni Gusunɔ u nɛɛ, sere kɑ nɛn wɑ̃ɑru,

dũuru bɑɑtere tɑ koo yiirɑ nɛn wuswɑɑɔ.

Nɔɔ bɑɑgere gɑ koo mɑɑ mɑn bɛɛrɛ wɛ̃.>>

¹² Nge mɛyɑ bɛsɛn bɑɑwure u koo wigiɑ gere Gusunɔn wuswɑɑɔ.

A ku wunɛn nɑɑnɛ dokeosi

torɑsiɑ

¹³ Yen sɔ̃, su ku mɑɑ sirinɑ, ɑdɑmɑ i bwisikuo nge mɛ i ko ko, kpɑ i ku gɑ̃ɑnu ko ni nu koo bɛɛgii torɑsiɑ, ǹ kun mɛ ni nu koo nùn surɑ. ¹⁴ Nɑ yɛ̃ kɑm kɑm sɑɑ Yinni Yesun min di mɑ gɑ̃ɑnu sɑri ni nu kun dɛɛre nin tii, ɑdɑmɑ goo ù n gɑ̃ɑnu gɑrisi nge ni nu kun dɛɛre, yɛ̃ro sɔɔrɑ nu ǹ dɛɛre. ¹⁵ À n gɑ̃ɑnu di, mɑ yɑ wunɛgii bwisikunu kpɛ̃ɛ, ɑ ǹ mɑɑ sĩimɔ kĩru sɔɔ. A ku de dĩɑ ni ɑ dimɔ nu tɔnu kɑm koosiɑ wìn sɔ̃ Kirisi u gu. ¹⁶ Ye yɑ sɑ̃ɑ burɑ bɛɛ sɔɔ, i ku de bu yen kɔ̃sɑ gere. ¹⁷ Domi Gusunɔn bɑndu tɑ ǹ sɑ̃ɑ dim kɑ nɔrubu mɑ n kun mɔ gem kɑ bɔri yɛndu kɑ nuku dobu sɑɑ Hunde Dɛɛron min di. ¹⁸ Wi u Kirisin wɑ̃ɑru wɑ̃ɑ nge mɛ, u koo Gusunɔ wɛ̃re, tɔmbɑ koo mɑɑ nùn siɑrɑ.

¹⁹ Yen sɔ̃, su kɑsu ye n kɑ ɑlɑfiɑ nɑɑmɔ kɑ ye sɑ ko kɑ tɑ̃sisiɑnɑ. ²⁰ A ku Gusunɔn sɔmburu kpeerɑsiɑ dĩɑnun sɔ̃. Geemɑ, kpuro n dɛɛre, ɑdɑmɑ n ǹ wɑ̃ tɔnu u gɑ̃ɑnu di ni nu koo de goo u torɑ. ²¹ N wɑ̃ ɑ ku yɑɑ tem kpɑ ɑ ku tɑm nɔ, kpɑ ɑ ku gɑ̃ɑnu ko ni nu koo kpĩ nu wunɛgii torɑsiɑ. ²² Ye ɑ nɑɑnɛ doke, ɑ ye nɛnuɔ wunɛn tiin sɔ̃ Gusunɔn wuswɑɑɔ. Doo nɔɔrugiiwɑ wi u ǹ tii tɑɑrɛ wɛ̃ɛmɔ ye u bwisikɑ u ko sɔɔ. ²³ Adɑmɑ wi u sikɑ mɔ̀ ye u dimɔn sɔ̃, u tɑɑrɛ mɔ, yèn sɔ̃ u ǹ dimɔ kɑ nɑɑnɛ. Kpuro ye tɔnu mɑɑ mɔ̀ nɑɑnɛ sɑriru sɔɔ, torɑrɑ.