13
Bɛsɛn wii kpĩibu
tem yɛ̃robun mi
1 Kpɑ bɑɑwure u n tem yɛ̃robu wiru kpĩiyɛ domi tem yɛ̃ro sɑri wi u kun wɑ̃ɑ kɑ Gusunɔn yɛ̃ru. Tem yɛ̃ro be bɑ mɑɑ wɑ̃ɑ, Gusunɔwɑ u bu kuɑ. 2 Yen sɔ̃nɑ, wi u tem yɛ̃ron gɑri yinɑ, u yinɑwɑ ye Gusunɔ u yiire. Be bɑ mɑɑ yinɑmɔ, bɑ ben tii tɑɑrɛ kɑsuɑmmɛwɑ. 3 Domi tɔnu ù n geɑ mɔ̀, u ǹ ko n tem yɛ̃ron bɛrum mɔ, mɑ n kun mɔ ù n kɔ̃sɑ mɔ̀. À kun kĩ ɑ n tem yɛ̃ron bɛrum mɔ, ɑ geɑ koowo, kɑɑ win nɔnu geu wɑ. 4 Tem yɛ̃ro u Gusunɔn sɔmburu mɔ̀wɑ wunɛn geɑn sɔ̃. Adɑmɑ ɑ̀ n kɔ̃sɑ mɔ̀, ɑ bɛrum koowo yèn sɔ̃ u ǹ tɑkobi nɛni kɑm. U sɑ̃ɑwɑ Gusunɔn sɔm kowo u kɑ be bɑ kɔ̃sɑ mɔ̀ mɔru kɔsie. 5 Yen sɔ̃nɑ tilɑsi tɔnu u wiru kpĩ, n ǹ mɔ sɛɛyɑsiɑbu tɔnɑn sɔ̃, ɑdɑmɑ yèn sɔ̃ win gɔ̃ru gɑ koo nùn tɑɑrɛ wɛ̃.
6 Yen sɔ̃nɑ i mɑɑ wɔ̃ɔ gobi kɔsiɑmɔ. Domi be bɑ tem nɛni, Gusunɔn sɔm kowobɑ bɑ sɑ̃ɑ bɑ mɑɑ tu tii wɛ̃ mɑm mɑm. 7 I bɑɑwure kɔsio ye n kɑ nùn weenɛ. I bu wɔ̃ɔ gobi kɔsio be n weenɛ i kɔsiɑ. I bu gbererun gobi kɔsio be n weenɛ i kɔsiɑ. I bu nɑsio be n weenɛ i nɑsiɑ. I bu bɛɛrɛ wɛ̃ɛyɔ be n weenɛ i bɛɛrɛ wɛ̃.
A wunɛn tɔnusi kĩɔ
8 I kun goon dibu nɛni mɑ n kun mɔ i n kĩɑnɛ, domi wi u win tɔnusi kĩ u woodɑ yibiɑwɑ. 9 Domi woodɑ yenibɑ be bɑ nɛɛ, <<I ku rɑ sɑkɑrɑru ko, i ku rɑ tɔnu go, i ku rɑ gbɛni, i ku rɑ binɛ ko,>> kɑ woodɑ kpuro ye yɑ tie, yɑ wɑ̃ɑ gɑri yini sɔɔ mi bɑ nɛɛ, <<A wunɛn tɔnusi kĩɔ nge wunɛn tii tii.>> 10 Kĩru tɑ ku rɑ de goo u win tɔnusi kɔ̃sɑ kue. Yen sɔ̃nɑ kĩru tɑ woodɑ yibiɑmɔ.
Sɑ n Kirisin nɑɑru mɑrɑ
11 N weenɛ i ko mɛ yèn sɔ̃ i yɛ̃ sɑɑ yè sɔɔ sɑ wɑ̃ɑ mini. N den turɑ i yɑndɑ, domi bɛsɛn fɑɑbɑ yɑ turuku sɑ̃ɑ tɛ̃, n kere dɔmɑ te sɑ gbiɑ sɑ nɑɑnɛ doke. 12 Wɔ̃kurɑ tondɑ, yɑm sɑ̃rerɑ turuku kuɑ. Yen sɔ̃, su wɔ̃kurun kookoosu deri kpɑ su yɑm bururɑm tɑbu yɑ̃nu sebe. 13 Su sĩ dee dee nge mɛ bɑ rɑ sĩ sɔ̃ɔ sɔɔ, sɑ kun ɑkɑnu mɔ dibu kɑ nɔrubu sɔɔ, sɑ kun kurɔ dɑmɑru kɑ binɛ bɑkɑ mɔ, kpɑ su ku nɔɔ gɔmunu kɑ nisinu ko. 14 Adɑmɑ i Yinni Yesu Kirisin dɑɑ sebuo, kpɑ i ku bɛɛn tiin dɑɑn bwisikunu ko i kɑ yen binɛ wunɑ.