Yinni Gusunɔ
u koo bwesenu kpuro soku
56
1 Amɛniwɑ nɛ, Yinni Gusunɔ nɑ geruɑ.
Nɑ nɛɛ, i de i gem swĩi dee dee
kpɑ i n sɑ̃ɑ nɑɑnɛgibu.
Domi nɑ kɑ fɑɑbɑ wee, nɑ ǹ tɛɛmɔ.
Kon sɔ̃ɔsi mɑ nɑ sɑ̃ɑ gemgii.
2 Doo nɔɔrugiiwɑ wi u mɔ̀ ye nɑ geruɑ,
mɑ u yɔ̃ dim dim u nɛn tɔ̃ɔ wɛ̃rɑrugiru mɛm nɔɔwɑmmɛ,
mɑ u ku rɑ tu disi doke,
mɑ u tii nɛni u ku kɑ kɔ̃sɑ ko.
3 Tɔn tuko wi u nɛ, Yinni Gusunɔ sɑ̃ɑmɔ,
u ku gere u nɛɛ,
nɑ ǹ wurɑmɔ u du nɛn tɔmbun suunu sɔɔ.
Wi bɑ mɑɑ mɑtɑm kuɑ sinɑ kpɑɑrun sɔmburun sɔ̃,
u ku gere u nɛɛ,
wee, u kuɑ dɑ̃ɑ gbeburu.
4 Domi ɑmɛniwɑ nɛ, Yinni Gusunɔ nɑ geruɑ.
Nɑ nɛɛ, sinɑ kpɑɑrun sɔm kowo be,
bɑ̀ n nɛn tɔ̃ɔ wɛ̃rɑrugiru mɛm nɔɔwɑmmɛ,
mɑ bɑ mɔ̀ ye yɑ koo mɑn wɛ̃re,
mɑ bɑ nɛn ɑrukɑwɑni nɛni dim dim,
5 kon bu ɑyeru wɛ̃ nɛn yɛnuɔ,
kpɑ bu yĩsiru yɑri
n kere bɑ̀ n dɑɑ bibu mɑrɑ.
Kon bu yĩsiru kɛ̃
te tɑ ko n wɑ̃ɑ sere kɑ bɑɑdommɑɔ,
tɑ ǹ gbimɔ.
6 Tɔn tuko be bɑ mɑn sɑ̃ɑmɔ,
mɑ bɑ nɛn yĩsiru kĩ,
mɑ bɑ sɑ̃ɑ nɛn sɔm kowobu,
be kpuro be bɑ tɔ̃ɔ wɛ̃rɑrugiru mɛm nɔɔwɑmmɛ,
mɑ bɑ ǹ tu disi dokemɔ,
mɑ bɑ nɛn ɑrukɑwɑni nɛni,
7 kon kɑ bu dɑ nɛn guu dɛɛrɑrɔ,
kpɑ n de bu nuku dobu ko nɛn sɑ̃ɑ yerɔ.
Kon ben yɑ̃ku dɔ̃ɔ mwɑɑrɑruginu
kɑ ben yɑ̃ku ni nu tie mwɑ nɛn yɑ̃ku yerɔ.
Domi bɑ koo nɛn dii te sokuwɑ
bwesenu kpuron kɑnɑ yeru.
8 Nɛ, Yinni Gusunɔ,
nɛ wi nɑ Isireli be bɑ rɑɑ yɑrinɛ mɛnnɑ,
kon mɑɑ bwese tukunu mɛnnɑ
kɑ be, nɛn tɔmbu sɑnnu.
Gusunɔ u Isirelibɑn wirugibu
gerusimɔ
9 Bɛɛ gbeeku yɛɛ kpuro, i nɑ i di.
10 Domi be bɑ sɑ̃ɑ Isirelibɑn kɔ̃sobu,
bɑ sɑ̃ɑwɑ wɔ̃kobu, bɑ ǹ bwisi mɔ.
Be kpuro bɑ sɑ̃ɑwɑ nge bɔ̃ɔ
ni nu kun kpɛ̃ nu wori.
Bɑ rɑ kɑ̃wɑ bɑ n kpĩ
bɑ n do kpɑ bɑ n dosimɔ.
11 Bɑ sɑ̃ɑwɑ nge bɔ̃ɔ
ni nù n di, nu ku rɑ debu.
Bɑ sɑ̃ɑwɑ nge kpɑro lɑɑkɑri sɑribɑ.
Swɑɑ ye ben bɑɑwure u kĩ,
yerɑ u rɑ swĩi win tiin ɑrufɑɑnin sɔ̃.
12 Bɑ sokunɑmɔ bɑ mɔ̀,
bu mɛnnɑmɑ
bu tɑm bɔɔbɔm nɔ,
siɑ kpɑ bu mɑɑ ko mɛ
domi tɑm mu yibɑ.