57
1 Gemgibu bɑ̀ n gu,
goo ku rɑ bu weeweenu kue.
Tɔn geobu bɑ̀ n wɔrukɑ,
goo ku rɑ bwisiku mɑ tɔn kɔ̃sobɑ bɑ bu sɛ̃re bɑ go.
2 Adɑmɑ tɔn geo be,
bɑ ko n wɛ̃rewɑ gɔriɔ kɑ bɔri yɛndu.
Gusunɔ u bũu sɑ̃ɔbu gerusimɔ
3 I susimɑ bɛɛ,
bwese te i ǹ kɑ nɛ, Gusunɔ turo yɔ̃,
bɛɛ be i sɑ̃ɑ nge sɔron bibu.
4 Wɑrɑ i yɛ̃ɛmɔ,
wɑrɑ i nɔɔ swiikinu koosimɔ.
I ǹ yɛ̃ mɑ i sɑ̃ɑwɑ bwese te tɑ ku rɑ mɛm nɔ,
te tɑ rɑ weesu ko?
5 Mɑ i bũu sɑ̃ɑrun gɑri wɔrɑ
dɑ̃ɑ koo bɑkɑru bɑɑteren nuurɔ.
Mɑ i kɑ bɛɛn bibu yɑ̃kunu mɔ̀
dɑɑnun goonɔ kpee bɑɑbɑ sɔɔ.
6 Bɛɛ Isirelibɑ,
dɑɑ torin kpee goriyɑ yi sɑ̃ɑ bɛɛn bũnu.
I rɑ yi yɑ̃kunu koosi kpɑ i yi tɑm wisi.
I tɑmɑɑ nɛ, Yinni Gusunɔ, kon ye tii mɑrisiwɑ?
7 Guunu wɔllɔwɑ i rɑ bɛɛn sɑ̃ɑnu ko.
Miyɑ i rɑ mɑɑ yɔ i yɑ̃kunu ko.
8 I bwɑ̃ɑrokunu mɑni bɛɛn gɑmbobɑn biruɔ,
mɑ i kɑ bũnu ɑrukɑwɑni bɔkuɑ.
Nu sɑ̃ɑ nge durɔ tɑnɔ
be i kĩ i kɑ kpunɑ.
Mɑ i mɑn biru kisi
i bɛɛn yɑ̃nu potirɑ,
i bɛɛn kpin yenu yɑsum sosi.
Wee i ben terenu mɛɛrɑ.
9 I tii gum sɑwɑ i dɑ
i bɛɛn bũu wi bɑ mɔ̀ Mɔlɔku deemɑ.
I tii turɑre yɛ̃kɑ mɑm mɑm
mɑ i sɔmɔbu gɔrɑ mi n tomɑ.
Wee, i wɔrumɑ sere temɔ.
10 I kɑ bɛɛn sirenɑbu wɑsire.
Adɑmɑ i ǹ bwisikɑ i nɛɛ, bu ǹ ɑrufɑɑni gɑɑ mɔ.
Mɑ i mɔ̀, i dɑm tie, i ǹ wɑsire.
11 Ǹ n mɛn nɑ, wɑrɑn bɛrumɑ i mɔ,
i kɑ mɑn nɔni wɔ̃kumɔ.
Wɑrɑn bɛrumɑ i mɔ,
i ǹ kɑ mɑn yɑɑye,
i ǹ mɑɑ mɑn gɑrisi.
Yèn sɔ̃ nɑ nɔɔ mɑɑri sɑɑ tɛɛbun di,
yen sɔ̃nɑ i ǹ mɑn nɑsie.
12 Adɑmɑ kon bɛɛ sɔ̃ɔsi
mɑ bɛɛn kookoo si i rɑɑ tɑmɑɑ su dee dee sɑ̃ɑ mi,
su ǹ bɛɛ ɑrufɑɑni gɑɑ mɔ̀.
13 Yen sɔ̃, ì n kuuki mɔ̀,
ì n somiru kɑnɑmɔ,
bɛɛn bũu dɑbi te, tɑ ǹ bɛɛ wɔrɑmɔ.
Kon dewɑ woo gu kɑ nu doonɑ mɑm mɑm.
Adɑmɑ be bɑ mɑn nɑɑnɛ sɑ̃ɑ
bɑ koo tem mɛ tubi di,
kpɑ bɑ n wɑ̃ɑ Siɔniɔ, guu te nɑ gɔsɑn mi.
Yinni Gusunɔ
u koo win tɔmbu bɛkiɑ
14 Nɛ, Yinni Gusunɔ, nɑ nɛɛ,
i tii suo i swɑɑ sɔmɛ.
I gɑ̃ɑ kɔ̃sunu kpuro wunɔ
ni nu wɑ̃ɑ nɛn tɔmbun swɑɑ sɔɔ.
15 Nɛ, Gusunɔ Wɔrukoo, nɛ wi nɑ dɛɛre,
nɑ wɑ̃ɑ wɔllɔ sere kɑ bɑɑdommɑɔ,
ɑdɑmɑ nɑ mɑɑ wɑ̃ɑ kɑ tɔnu
wi bɑ tɑɑre mɑ win nuki sɑnkire,
kpɑ n kɑ nùn dɑm kɛ̃.
16 Nɑ ǹ kĩ nɑ n bɛɛ tɑɑrɛ wɛ̃ɛmɔ bɑɑdommɑ,
kpɑ nɑ n kɑ bɛɛ mɔru nɛni sɑɑ kpuro.
Nɑ̀ n mɔ̀ mɛ,
nɛn tɑkɑ koorɑ kpuro yɑ koo kɑm kowɑ.
17 Nɛn mɔru yɑ seewɑ Isirelibɑn
tɑɑrɛ bɑkɑn sɔ̃,
mɑ nɑ bu sɛɛyɑsiɑ sere nɑ ǹ mɑɑ kĩ n bu mɛɛri.
Adɑmɑ kɑ mɛ, bɑ yɔ̃rɑriwɑ ben mɛm nɔɔ sɑri te sɔɔ,
mɑ bɑ ben tiin gɔ̃ru kĩru swĩi.
18 Nɑ ben dɑɑ yɛ̃.
Kɑ mɛ, kon bu bɛkiɑ,
n bu kpɑrɑ kpɑ n bu nukuru yɛmiɑsiɑ.
Be bɑ gɔɔ wooru sɔ̃ bɑ sumɔ,
19 kon de bu nuku dobun kuuki ko.
Be bɑ wɑ̃ɑ n tomɑ kɑ be bɑ wɑ̃ɑ turuku,
bɑ koo bɔri yɛndu wɑ.
Nɛ, Yinni Gusunɔ, kon bu bɛkiɑ.
Nɛnɑ nɑ ye geruɑ.
20 Adɑmɑ nuku kɔ̃surugibu
bɑ sɑ̃ɑwɑ nge nim wɔ̃kun nim kurenu,
ni nu ǹ kpɛ̃ nu yɔ̃rɑ sɛ̃ɛ,
ni nu rɑ n pɔtɔkɔ kɑ disinu sɔɔwɑ.
21 Nuku kɔ̃surugii kun bɔri yɛndu wɑsi.
Nɛ, Yinni Gusunɔwɑ nɑ yeni geruɑ.