Yinni Gusunɔ u Isirelibɑ kĩ
54
1 Wunɛ Yerusɑlɛmu,
wunɛ wi ɑ sɑ̃ɑ nge kurɔ wi u kun bii mɔ,
ɑ nuku dobu koowo kɑ kuuki,
domi wunɛ wi bɑ rɑɑ yinɑ,
kɑɑ bibu mɑ bɑ n dɑbi,
n kere wi u rɑ n mɑrumɔn bibu.
2 A wunɛn kuu bekurugirun bɑtumɑ sosio,
kpɑ bu ten bekɑ dɛmiɑ.
A ten wɛ̃ɛ dɛnyɑsio,
kpɑ ɑ ten dɑ̃nu girɑ nu n dɑm mɔ.
A tii kusio, ɑ ku tii bɔke.
3 Domi kɑɑ kɔwɑrɑ bɑɑmɑ.
Wunɛn bibun bweseru
tɑ koo bwese ni nu tien tem mwɛɛri,
kpɑ tu dɑ tu sinɑ
wuu sìn mi goo kun mɑɑ wɑ̃ɑ.
4 A ku nɑndɑ, domi ɑ ǹ sekuru wɑsi.
A ku tukɑ, domi ɑ ǹ mɑɑ bɛɛrɛ biɑmɔ.
Kɑɑ wunɛn yellun sekuru duɑri.
A ǹ mɑɑ yɑɑyɑmɔ
nge mɛ ɑ nɔni sɔ̃ɔrɑ wunɛn turorun sɑɑ sɔɔ.
5 Domi nɛ, wunɛn tɑkɑ kowo nɑ
sɑ̃ɑwɑ nge wunɛn durɔ.
Nɛn yĩsirɑ Gusunɔ, wɔllu kɑ tem Yinni,
kɑ Isirelibɑn Yinni Dɛɛro, kɑ hɑnduniɑ kpuron Yinni.
Nɛnɑ nɑ nun yɑkiɑ.
6 A sɑ̃ɑwɑ nge tɔnun kurɔ gbiikoo
wi durɔ u yinɑ mɑ kurɔ wi, u nuki sɑnkire.
Adɑmɑ tɛ̃, nɑ nun sɔ̃ɔmɔ nɑ mɔ̀,
7 nɑ rɑɑ nun deri sɑɑ fiiko,
ɑdɑmɑ tɛ̃, kon nun mwɑ kɑ kĩi bɑkɑru.
8 Nɑ rɑɑ kɑ nun mɔru kuɑ too sɑɑ fiiko,
nɑ nun nɛn wuswɑɑ sĩiyɑri,
ɑdɑmɑ tɛ̃, nɑ wunɛn wɔnwɔndu mɔ
nɛn kĩi te tɑ ku rɑ kpen sɔ̃.
Nɛ wi nɑ nun yɑkiɑmɔ, nɛnɑ nɑ yeni geruɑ.
9 Nge mɛ nɑ bɔ̃ruɑ Nɔwɛn sɑɑ sɔɔ,
nɑ nɛɛ, nim yibu bɑkɑru tɑ ǹ mɑɑ tem kpuro wukirimɔ,
nge mɛyɑ nɑ mɑɑ bɔ̃ruɑ gisɔ
nɑ nɛɛ, nɑ ǹ mɑɑ nun gerusimɔ kɑ mɔru.
10 Bɑɑ guunu nù n swɛnyɑ,
mɑ gungunu nu kɔsikirɑ,
nɛn kĩru tɑ ǹ nun dɛsirɑrimɔ.
Mɛyɑ mɑɑ bɔri yɛn tèn nɔɔ mwɛɛru nɑ nun kuɑ,
tɑ ko n wɑ̃ɑwɑ sere kɑ bɑɑdommɑɔ.
Nɛ, Yinni Gusunɔwɑ nɑ yeni geruɑ,
nɛ wi nɑ wunɛn wɔnwɔndu mɔ.
Yerusɑlɛmu kpɑɑ
11 Yinni Gusunɔ u nɛɛ,
Yerusɑlɛmu, wunɛ wi wɑhɑlɑ yɑ so nge woo bɔkɔ,
mɑ goo kun nun nukuru yɛmiɑsie,
wee, kon wure n wunɛn kpɛɛkpɛɛku swĩi
kpɑ n nun bɑni kɑ kpee gobiginu.
12 Kon wunɛn gbɑ̃rɑru bɑni
kɑ kpee swɑ̃ɑnu kɑ kpee booguginu,
kpɑ ten gɑmbobɑ bɑ n sɑ̃ɑ kpee
ni nu bɑllimɔ nge digi,
ten kɔ̃sobun wɑ̃ɑ yenu nu n sɑ̃ɑ kpee swɑ̃ɑnu.
13 Nɛnɑ kon wunɛn bibu kpuro keu sɔ̃ɔsi,
kpɑ ben dukiɑ yɑ n kpɑ̃.
14 Kon de ɑ n dɑm mɔ.
A ku wururɑ, ɑ ku bɛrum ko,
domi gɑ̃ɑnu kun nun bɛsumɔ.
15 Be bɑ wesiɑnɑmɔ bu kɑ nun seesi,
nɑ ǹ wɑ̃ɑ kɑ be.
Be bɑ nɔɔ tiɑ kuɑ bu kɑ nun wɔri,
kɑɑ bu kɑmiɑwɑ.
16 A seko mɛɛrio ɑ wɑ.
Nɛnɑ nɑ nùn kuɑ u dɔ̃ɔ bɔɔnu wuremɔ,
mɑ u tɑbu yɑ̃nu sekumɔ.
Nɛ turo wiyɑ nɑ rɑ mɑɑ goo seesie u nu bɔɔku.
17 Yen sɔ̃nɑ tɑbu yɑ̃ɑ ni bɑ sekumɔ wunɛn sɔ̃,
nu ǹ gɑ̃ɑnu mɔ̀.
Wi u kɑ mɑɑ nun dɑ siri gbɑburɔ,
siribu koo yɛ̃ro di.
Yeniwɑ kon nɛn sɔm kowobu kuɑ.
Nge mɛyɑ kon mɑɑ bu fɑɑbɑ ko.
Nɛ, Yinni Gusunɔwɑ nɑ geruɑ mɛ.