53
1 Mɑ Esɑi u wisɑ u nɛɛ,
wɑrɑ u nɑɑnɛ doke ye sɑ nɔɔsiɑ.
Wɑrɑ Yinni Gusunɔ u win dɑm sɔ̃ɔsi.
Sɑri.
2 Wee, win sɔm kowo u seewɑ win wuswɑɑɔ
nge dɑ̃ɑ kpii pɔturɑ ye yɑ kpiɑ tem gbebum sɔɔ,
yɑ ǹ dɑm mɔ.
Mɛyɑ u ǹ durɔ burɔ sɑ̃ɑ,
u ǹ nɑnum gɑm mɔ su sere nùn mɛɛri.
Win wɑsi kun mɑɑ gɑ̃ɑnu sɑ̃ɑ yi sere sun wɛ̃re.
3 Tɔmbɑ nùn gɛmɑ mɑ bɑ nùn biru kisi.
U nɔni sɔ̃ɔre, u wɑhɑlɑn dɔɔnɛ mɔ,
u ǹ wɑɑbu wɑ̃.
Sɑ nùn ɑtɑfiiru kuɑ,
sɑ ǹ nùn gɑrisi gɑ̃ɑnu.
4 Adɑmɑ bɛsɛn nɔni swɑ̃ɑru
kɑ bɛsɛn wɑhɑlɑwɑ u sɔɔwɑ.
Mɑ sɑ nùn gɑrisi
wi Gusunɔ u sɛɛyɑsiɑ u sekuru doke.
5 Bɛsɛn durum sɔ̃nɑ bɑ nùn sɔkɑ bɑ yɑbɑ.
Bɛsɛn torɑnun sɔ̃nɑ bɑ win wɑsi kɔsiki.
Wɑhɑlɑ ye yɑ nùn wɔri mi,
yɑ kɑ sun ɑlɑfiɑ nɑɑwɑ.
Sɑ bɛkurɑwɑ win mɛɛrɑ yen sɑɑbu.
6 Sɑ rɑɑ yɑrinɛwɑ bɛsɛ kpuro
nge yɑ̃ɑ ni nu kɔ̃ɔre.
Bɑɑwure u win swɑɑ swĩi ye u kĩ.
Mɑ Gusunɔ u nùn sɛɛyɑsiɑ bɛsɛn torɑnun sɔ̃.
7 Bɑ nùn nɔni sɔ̃ɔwɑ, ɑdɑmɑ u tii kɑwɑ.
U ǹ nɔɔ wukie u gɑ̃ɑnu gere
nge yɑ̃ɑ kpɛn te bɑ koo sɑkɑ,
ǹ kun mɛ, yɑ̃ɑ te tɑ mɑɑri sɛ̃ɛ
bɑ ten sɑnsu bɔɔrimɔ.
8 Kɑ dɑmɑ bɑ nùn mwɑ bɑ siri.
Bɑ nùn go nɛn tɔmbun durum sɔ̃.
Be bɑ wɑ̃ɑ win wɑɑti ye sɔɔ,
ben wɑrɑ u yen bwisikunu kuɑ.
9 Bɑ nùn kpĩ kɑ dukiɑgibu sɑnnu,
bɑ nùn sikuɑ tɔn kɔ̃sobun suunu sɔɔ
bɑɑ mɛ u ǹ kɔ̃sɑ gɑɑ kue,
bɑ ǹ mɑɑ weesu gɑsu nɔɔre win nɔɔn di.
10 Adɑmɑ Gusunɔn kĩrɑ
wɑhɑlɑ ye, yɑ kɑ nùn wɔri.
Mɑ u duɑ nuku sɑnkirɑru sɔɔ.
U tii kuɑ yɑ̃kuru tɔmbun durum sɔ̃.
Yen sɔ̃, u koo bii dɑbinu wɑ,
kpɑ win wɑ̃ɑrun tɔ̃ru tu dɛnyɑ.
Kpɑ Yinni Gusunɔn himbɑ yu koorɑ sɑɑ win min di.
11 Win nɔni swɑ̃ɑrun biru, u koo wɑ̃ɑru di,
kpɑ u ten dobu nɔ.
U koo tii sɔ̃ɔsi gemgii tɔn dɑbinun suunu sɔɔ,
wi, wi u ben durum sɔɔwɑ.
12 Yen sɔ̃nɑ kon de u sinɑ kɑ tɔn bokobu,
kpɑ u n bɑɑ mɔ dɑmgibun ɑrumɑni sɔɔ.
Domi u tii wɛ̃ sere u dɑ u kɑ gu.
Mɑ bɑ nùn gɑrisi tɔn kɔ̃so,
yèn sɔ̃ u tɔn dɑbirun durum sɔɔwɑ.
U mɑɑ be bɑ tɑɑrɛ mɔ suuru kɑnɑ.