Fɑɑbɑ ye yɑ ǹ kpeemɔ
51
1 I mɑn swɑɑ dɑkio bɛɛ be i gem nɑɑ gire,
mɑ i nɛ, Yinni Gusunɔ kɑsu.
I kpee te mɛɛrio tèn min di bɑ bɛɛ dɑ̃kɑ.
I wɔru ge yɑɑyo mìn di bɑ bɛɛ yɑrɑ.
2 I bɛɛn lɑɑkɑri wesio Aburɑhɑmu bɛɛn tundon mi,
kɑ Sɑɑrɑɑn mi, wi u bɛɛ mɑrɑ.
Sɑnɑm mɛ nɑ nùn sokɑ u sɑ̃ɑwɑ wi turo.
Mɑ nɑ nùn domɑru kuɑ, nɑ win bweseru dɑbiɑsiɑ.
3 Nɑ Siɔnin bɑnsun wɔnwɔndu wɑ.
Kon bɑn si seeyɑ,
kpɑ n yen tem gbebum gɔsiɑ nge nɛn kɑrɑ Edɛni.
Nuku dobu kɑ yɛ̃ɛribu ko n wɑ̃ɑ mi,
kpɑ bu siɑrɑbun womusu ko.
4 Bɛɛ nɛn tɔmbu, i lɑɑkɑri koowo,
kpɑ i swɑɑ tem kpĩ i mɑn swɑɑ dɑki.
Domi nɛn min diyɑ woodɑ yɑ koo yɑri,
kpɑ yɑ n sɑ̃ɑ bwesenu kpuron yɑm bururɑm.
5 Nɑ kɑ fɑɑbɑ wee,
kpɑ n siri dee dee bwesenu kpuro sɔɔ,
kɑ nɛn nɔm dɑmguu.
Sɑɑ yerɑ be bɑ wɑ̃ɑ n tomɑ
bɑ ko n yĩiyɔbu mɔ nɛ sɔɔ,
kpɑ bɑ n nɛn dɑm nɑɑnɛ sɑ̃ɑ.
6 I nɔni seeyo wɔllɔ, kpɑ i mɑɑ mɛɛri temɔ.
Domi wɔllɑ koo doonɑ nge wiisu,
kpɑ tem mu munkirɑ mu ko yɑki yɑki nge yɑbe tɔkɔru.
Mɛn tɔmbu bɑ koo gbi nge sɔnsu.
Adɑmɑ nɛn fɑɑbɑ yɑ ǹ kpeemɔ.
Nɛn gem mu ko n wɑ̃ɑwɑ sere kɑ bɑɑdommɑɔ.
7 I mɑn swɑɑ dɑkio bɛɛ bwese te i gem yɛ̃,
mɑ i nɛn woodɑbɑ nɛni bɛɛn gɔ̃ruɔ.
I ku nɑndɑ tɔmbu bɑ̀ n bɛɛ funɛ wunɑmɔ.
I ku mɑɑ diiri bɛrum sɔ̃ bɑ̀ n bɛɛ wɔmmɔ.
8 Domi bɑ ko n sɑ̃ɑwɑ nge yɑ̃ɑ ni gɛmi yi di.
Adɑmɑ nɛn gem mu ko n wɑ̃ɑwɑ sere kɑ bɑɑdommɑɔ.
Nɛn fɑɑbɑ yɑ ǹ mɑɑ nɔru mɔ.
A dom yɑndo, Yinni
9 A dom yɑndo kpɑ ɑ wunɛn nɔmun dɑm sɔ̃ɔsi,
nge yellu sɑnɑm mɛ ɑ Egibitigibu tɑbu di,
mɑ ɑ ben sunɔ wi u sɑ̃ɑ nge yɑɑ gɔbɑ go.
10 Mɑ ɑ derɑ nim wɔ̃kun nim mu gberɑ,
mɑ ɑ swɑɑ yɑrɑ.
Be ɑ yɑkiɑ, bɑ kɑ tɔburɑ.
11 Nge mɛyɑ tɛ̃,
be ɑ yɑkiɑ bɑ koo kpɑm gɔsirɑmɑ,
bu wurɑmɑ Siɔniɔ kɑ nɑsɑrɑn womusu,
kpɑ nuku doo bi bu ku rɑ kpe bu n sɔ̃ɔsire ben wuswɑɑɔ.
Yɛ̃ɛribu kɑ nuku dobu ko n bu wɑ̃ɑsi,
kpɑ nɔni swɑ̃ɑru kɑ weeweenu nu doonɑ.
I ku bɛrum ko, nɛn tɔmbu
12 Gusunɔ u nɛɛ, nɛnɑ mi,
nɛ wi nɑ bɛɛ nukuru yɛmiɑsiɑmɔ.
Tɔnu u sɑ̃ɑwɑ nge yɑkɑsu.
Mbɑn sɔ̃nɑ i ko i win bɛrum ko, wi, wi u rɑ gbi.
13 Kpɑ i nɛ, Yinni Gusunɔ duɑri,
nɛ wi nɑ bɛɛ tɑkɑ kuɑ.
Nɑ wɔllu tɛriɑ, mɑ nɑ tem kuɑ.
I diirumɔ kpeetim sɑri tɔ̃ru bɑɑtere,
be bɑ bɛɛ dɑm dɔremɔn wuswɑɑɔ,
be, be bɑ kɑsu bu bɛɛ kpeerɑsiɑ.
Adɑmɑ ben mɔru kun mɑɑ gɑ̃ɑnu mɔ̀.
14 Domi n ǹ tɛɛmɔ
bu kɑ be bɑ yoru mwɛɛrɑ bɑ bɔkuɑn yɔni kusiɑ.
Bɑ ǹ gbimɔ wɔru sɔɔ.
Bɑ ǹ mɑɑ dĩɑnu biɑmɔ.
15 Nɛnɑ Gusunɔ bɛɛn Yinni,
nɛ wi nɑ rɑ de nim wɔ̃kun nim mu se
kpɑ mu kukiri.
Nɛn yĩsirɑ Gusunɔ, wɔllu kɑ tem Yinni.
16 Nɑ kon wɔn kpɑɑru tɛriɑ
kpɑ n tem kpɑm swĩi,
kpɑ n bɛɛ Siɔnigibu sɔ̃ n nɛɛ,
i sɑ̃ɑwɑ nɛn tɔmbu.
Nɑ nɛn gɑri doke bɛɛn nɔɔwɔ,
mɑ nɑ bɛɛ nɛn nɔmɑn sɑɑru wukiri.
Yerusɑlɛmun nɔni swɑ̃ɑrɑ
koo kpe
17 Wunɛ Yerusɑlɛmu, ɑ dom yɑndo, ɑ seewo,
wunɛ wi ɑ nɔrɑ suɑ Yinni Gusunɔn nɔmun di
ye yɑ win mɔru yibɑ,
mɑ ɑ ye nɔrɑ sere kɑ yen kɔrɔnɔ.
Wee, yɑ nun goomɔ.
18 Wunɛn bibu kpuro sɔɔ, be ɑ mɑrɑ ɑ seeyɑ,
goo sɑri wi u koo nun swɑɑ gbiiyɑ.
Goo mɑɑ sɑri wi u koo nun nɔmɑ nɛnɛ.
19 Wee, gɑ̃ɑnu yiru yɑ nun deemɑ,
tɑbu kɑ gɔ̃ɔru kɑ kpeerɑbu kɑ bɑnsu.
Wɑrɑ koo nun duurɑ.
Wɑrɑ koo nun nukuru yɛmiɑsiɑ.
20 Wunɛn bibu bɑ dɑm biɑ
nɛ Gusunɔ, wunɛn Yinnin mɔrun sɔ̃.
Mɑ bɑ kpĩ kpĩ swɛɛ sɔɔ
nge nɛm ni bɑ tɑɑ mwɑ.
21 Yen sɔ̃, ɑ yeni swɑɑ dɑkio ɑ nɔ,
wunɛ wi ɑ wɔnwɔndu soore,
mɑ ɑ sɑ̃ɑ nge ɑ tɑm goore
ɑdɑmɑ ɑ ǹ tɑm nɔrɑ.
22 Amɛniwɑ nɛ Gusunɔ, wunɛn Yinni,
nɛ wi nɑ nɛn tɔmbu fɑɑbɑ mɔ̀, nɑ geruɑ.
Nɑ nɛɛ, kon nɔrɑ ye mwɑ wunɛn nɔmun di,
ye yɑ nɛn mɔru yibɑ mɑ yɑ derɑ ɑ bɑ̃ɑrimɔ.
A ǹ mɑɑ ye nɔrumɔ.
23 Kon ye dokewɑ be bɑ nun dɑm dɔremɔn nɔmɑɔ,
be, be bɑ nun sɔ̃ɔmɔ bɑ mɔ̀,
ɑ kpunɔ, kpɑ bu sĩ wunɛn wɔllɔ.
Mɑ ɑ kpunɑ ɑ kɑ tem nɛrɑ.
A kuɑ nge swɑɑ yè sɔɔ bɑ sĩimɔ.