Yinni Gusunɔ kɑ win tɔmbu
bɑ ǹ yinɑnɑmɔ
50
1 Yinni Gusunɔ u mɑɑ nɛɛ,
bɛɛ Yudɑbɑ, mɑnɑ tirerɑ wɑ̃ɑ
te tɑ sɔ̃ɔsimɔ mɑ nɑ bɛɛn mɛro Yerusɑlɛmu yinɑ.
Bèn dibu nɑ nɛni, ben wɑrɑ nɑ bɛɛ wɛ̃.
Sɑri. Bɛɛn durum sɔ̃nɑ nɑ bɛɛ dɔrɑ.
Bɛɛn torɑnun sɔ̃nɑ nɑ mɑɑ bɛɛn mɛro yinɑ.
2 Domi nɑ nɑ n bɛɛ fɑɑbɑ ko.
Mbɑn sɔ̃nɑ nɑ ǹ goo wɑ.
Nɑ sokɑ sokɑ,
mbɑn sɔ̃nɑ nɑ ǹ goon wurɑbu nuɑ.
I tɑmɑɑ nɛn nɔmu gɑ ǹ dɑm turɑ n kɑ bɛɛ wɔrɑ?
Nɑ ǹ dɑm mɔ n kɑ bɛɛ yɑkiɑ?
I ǹ yɛ̃ mɑ nɑ̀ n nim wɔ̃ku gerusi gɑ rɑ gberewɑ,
kpɑ dɑɑnu nu ko nge mi nim ku rɑ sinɛ,
kpɑ swɛ̃ɛ yi gbi yi kɔ̃si?
3 Nɑ rɑ de wɔllu tu yɑm tĩrɑ,
kpɑ tɑ n sɑ̃ɑ nge tɑ gɔɔ wooru sɔ̃.
Yinni Gusunɔn sɔm kowon mɛm nɔɔbu
4 Yinni Gusunɔ u mɑn keu kuɑ
kpɑ n kɑ kpĩ n wi u wɑsire dɑm kɛ̃.
U rɑ nɛn lɑɑkɑri yɑmiɛ bururu bɑɑtere
n kɑ kpĩ n nùn swɑɑ dɑki, nge keu bii.
5 U nɛn swɑsu kɔriɑ, nɑ ǹ nùn yinɑri.
Nɑ ǹ mɑɑ nùn biru kisi.
6 Nɑ be bɑ mɑn soomɔ nɛn biru deriɑ,
mɑ nɑ mɑɑ be bɑ nɛn bɑɑ sɑnsu wukɑmɔ nɛn bɑɑnu deriɑ.
Nɑ ǹ nɛn wuswɑɑ beruɑ
sɑnɑm mɛ bɑ mɑn wɔmmɔ bɑ yɑ̃ɑtɑm siemɔ.
7 Adɑmɑ Yinni Gusunɔwɑ u mɑn fɑɑbɑ kuɑ.
Yen sɔ̃nɑ nɑ ǹ bɛɛrɛ bie.
Mɑ nɑ yɔ̃rɑ nɑ tɑ̃sɑ.
Domi nɑ yɛ̃ mɑ nɑ ǹ sekuru wɑsi.
8 Gusunɔ u wɑ̃ɑ nɛn turuku,
u koo mɑn gem wɛ̃.
Wɑrɑ u sɑ̃ɑ nɛn yibɛrɛ.
Yɛ̃ro u susimɑ.
Wɑrɑ u koo nɛn tɑɑrɛ wɑ.
Yɛ̃ro u seewo bu sun siriɑ.
9 Nɛ, nɑ yɛ̃ mɑ Yinni Gusunɔwɑ u koo mɑn somi.
Wɑrɑ u koo mɑn tɑɑrɛ wɛ̃.
Nɛn yibɛrɛbɑ kpuro bɑ koo mundɑ
nge yɑbe kĩɑsu si gɛmi yi di.
I Yinni Gusunɔn sɔm kowo
swɑɑ dɑkio
10 Bɛɛ sɔɔ, wi u Yinni Gusunɔ nɑsie,
u win sɔm kowon nɔɔ nɔɔwɔ.
Wi u sĩimɔ yɑm wɔ̃kuru sɔɔ,
u Yinni Gusunɔ nɑɑnɛ koowo,
kpɑ u n tɑ̃sɑ wi sɔɔ.
11 Bɛɛ be i mɔru seewɑ nge dɔ̃ɔ,
mɑ i himbɑ sɑ̃ɑ i tɔmbu dɔ̃ɔ mɛni,
i duo bɛɛn dɔ̃ɔ wi sɔɔ, kpɑ i dɔ̃ɔ mwɑɑrɑ.
Yinni Gusunɔwɑ u koo de ye kpuro yu koorɑ.
Wɑhɑlɑ sɔɔrɑ i ko kpunɑ i gbi.