Yinni Gusunɔn sɔm kowo
42
1 Yinni Gusunɔ u nɛɛ,
nɛn sɔm kowo wee, wi nɑ gɔsɑ.
Wiyɑ nɑ kɑ wɑ̃ɑ, nɑ mɑɑ nùn kĩ.
Nɑ nɛn Hunde doke wi sɔɔ.
U koo gem gɑri kpɑrɑ tɔmbu sɔɔ.
2 U ǹ nɔɔgiru suɑmɔ u sere gbɑ̃rɑ kɑ dɑm,
kpɑ bu win nɔɔ nɔ swɛɛ sɔɔ.
3 U ǹ koo tɔn be bɑ sunkure nge kɑbɑ dɑkurɑ.
Mɛyɑ u ǹ mɑɑ bu goomɔ,
bɑɑ bɑ̀ n sɑ̃ɑ nge fitilɑ ge gɑ gɔɔ dɔɔ.
U koo gem kpɑrɑwɑ nge mɛ n sɑ̃ɑ.
4 U ǹ mwiɑ kpɑnɑmɔ.
U ǹ mɑɑ wɑsirɑmɔ sere u kɑ de
gem mu n wɑ̃ɑ hɑnduniɑ kpuro sɔɔ,
kpɑ tɔn be bɑ wɑ̃ɑ sere mi n tomɑ
bɑ n win woodɑbɑ nɑɑnɛ sɑ̃ɑ.
Bwesenu kpuron
yɑm bururɑm
5 Yinni Gusunɔ wi u wɔllu kuɑ u tɛriɑ,
mɑ u tem kuɑ kɑ ye yɑ kpiɑ mɛ sɔɔ,
mɑ u derɑ tɔmbu kɑ sere hunde koni
be bɑ wɑ̃ɑ tem sɔɔ bɑ wɛ̃siɑmɔ,
wiyɑ u win sɔm kowo sɔ̃ɔwɑ u nɛɛ,
6 nɛnɑ nɑ nun sokɑ n kɑ nun fɑɑbɑ ko.
Kon nun dɑm kɛ̃, nɑ n wunɛn nɔmɑ nɛni.
Kon nun kɔ̃su, kpɑ n kɑ tɔmbu ɑrukɑwɑni bɔke
sɑɑ wunɛn min di,
kpɑ bwesenu kpuro nu kɑ yɑm bururɑm wɑ.
7 Kɑɑ wɔ̃kobu nɔni wukiɑ,
kpɑ ɑ be bɑ sɔ̃ yɑm wɔ̃kuru sɔɔ pirisɔm dirɔ yɑrɑ.
8 Nɛnɑ Gusunɔ wi u rɑ n wɑ̃ɑ.
Nɛn yĩsirɑ mi.
Nɑ ǹ nɛn yiiko bũu goo wɛ̃ɛmɔ.
Mɛyɑ nɑ ǹ mɑɑ nɛn bɛɛrɛ bwɑ̃ɑrokunu wɛ̃ɛmɔ.
9 Wee, ye nɑ gbiɑ nɑ geruɑ, yɑ koorɑ.
Tɛ̃, nɑ bɛɛ gɑ̃ɑ kpɑɑnu nɔɔsiɑmɔ nu sere koorɑ.
Wom kpɔɔ
ge gɑ Yinni Gusunɔ siɑrɑmɔ
10 I Yinni Gusunɔ wom kpɔɔ kuo.
I nùn siɑro hɑnduniɑn goonu nnɛ ye sɔɔ.
Hunde koni be bɑ wɑ̃ɑ nim wɔ̃ku sɔɔ,
kɑ bɛɛ be i sĩimɔ gen wɔllɔ,
kɑ sere be bɑ wɑ̃ɑ n tomɑ,
i Yinni Gusunɔ siɑro.
11 Bɛɛ be i wɑ̃ɑ gbɑburu kɑ ten gberu kpɑɑnɛbɑ sɔɔ kpuro,
i nɔɔgiru suo i Gusunɔ siɑrɑ.
Bɛɛ Kedɑɑn bweseru, i ku nɔɔ mɑri,
i Gusunɔ siɑro.
Bɛɛ bèn wuu gɑ sɔ̃ kperu wɔllɔ,
i kuuki koowo guunu wɔllun di kɑ nuku dobu.
12 Bɛɛ be i wɑ̃ɑ n tomɑ,
i Gusunɔ bɛɛrɛ wɛ̃ɛyɔ,
kpɑ i nùn tɔmɑ.
13 Yinni Gusunɔ u susimɔ
u wee nge tɑbu kowo.
U tɑbun gɑri wɔrɑ nge tɑbu durɔ,
mɑ u nɔɔgiru sue u kuuki mɔ̀,
u win yibɛrɛbɑ dɑm sɔ̃ɔsimɔ.
Yinni Gusunɔ u win tɔmbu
nɔɔ mwɛɛru kuɑ
14 Yinni Gusunɔ u nɛɛ,
wee nɑ nɔɔ mɑri nɑ tii nɛnuɑ n kɑ tɛ.
Adɑmɑ tɛ̃, kon nɔɔgiru suɑ
nge tɔn kurɔ wi u yiire u kĩ u mɑ,
mɑ u wɑsire u wom gɑbɑmɔ.
15 Kon guunu kɑ gungunu kɔsuku,
kpɑ n ye yɑ kpiɑ gberɑsiɑ.
Kon dɑɑnun nim kpeerɑsiɑ
nu gberɑ woko woko,
kpɑ n de yɛrusun nim mu gberɑ mɑm mɑm.
16 Kon wɔ̃kobu sĩisiɑ swɑɑ ye bɑ ǹ yɛ̃ sɔɔ,
kpɑ n de yɑm wɔ̃kuru tu gɔsiɑ yɑm bururɑm ben wuswɑɑɔ.
Kon de swɛɛ yi yi ǹ dɑɑ nɔɔ nɛ
yi nɔɔ nɛrɑ yi ko mɑrɑ mɑrɑ.
Nɑ ǹ kon ko nɑ kun yenibɑ kpuro kue.
17 Adɑmɑ be bɑ bũnu nɑɑnɛ sɑ̃ɑ bɑ nu sɑ̃ɑmɔ,
bɑ koo biruku yirɑ wurɑ kɑ seku bɑkɑru.
Isirelibɑ bɑ ku rɑ gɑ̃ɑnu tubu
18 Yinni Gusunɔ u nɛɛ,
bɛɛ Isirelibɑ, bɛɛ be i sɑ̃ɑ nge sosobu,
i swɑɑ dɑkio.
Bɛɛ be i sɑ̃ɑ nge wɔ̃kobu,
i de i yɑm mɛɛri kpɑ i wɑ.
19 Wɑrɑ u sɑ̃ɑ wɔ̃ko nge nɛn sɔm kowo.
Wɑrɑ u sɑ̃ɑ soso mɑ n kun mɔ nɛn sɔmɔ wi nɑ gɔrɑ.
Wɑrɑ u sɑ̃ɑ wɔ̃ko nge nɛn bɔrɔ.
Wɑrɑ u sɑ̃ɑ wɔ̃ko nge nɛn sɔm kowo.
20 Wee, u gɑ̃ɑ dɑbinu wɑ,
ɑdɑmɑ u ǹ nu gɑrisi gɑ̃ɑnu.
U swɑsu wukie,
ɑdɑmɑ u ǹ gɑri nɔɔmɔ.
21 Yinni Gusunɔ u woodɑ bɑkɑ geɑ yɑrɑ
win tɔmbun ɑrufɑɑnin sɔ̃.
22 Adɑmɑ yibɛrɛbɑ bɑ ben yɑ̃nu gurɑ kpuro,
mɑ bɑ ben tii mwɛɛrɑ bɑ kpɛ̃ɛ kpee bɑɑbɑ sɔɔ.
Bɑ bu beruɑ sere pirisɔm dirɔ.
Bɑ bu wɔri bɑ yɑ̃nu gurɑ.
Goo sɑri wi u koo bu yɑkiɑ,
kpɑ bu yibɛrɛ be sɔ̃ bu yɑ̃ɑ ni wesio.
23 Mɑ Esɑi u nɛɛ,
wɑrɑ u koo yeni swɑɑ dɑki bɛɛ sɔɔ.
Wɑrɑ u koo yɔ̃rɑ u ye swɑɑ gɑ̃ri sɑɑ tɛ̃n di.
24 Wɑrɑ u derɑ bɑ Isireli be bɑ sɑ̃ɑ Yɑkɔbun bweseru wɔri
bɑ ben yɑ̃nu gurɑ.
N ǹ Yinni Gusunɔn tii ro?
Bɛsɛ Isirelibɑ sɑ durum kuɑ win wuswɑɑɔ.
Sɑ yinɑ su win woodɑbɑ swĩi, su ye mɛm nɔɔwɑ.
25 Yen sɔ̃nɑ u kɑ sun mɔru bɑrɑ too.
U derɑ bɑ sun tɑbu wɔri kɑ dɑm.
Tɑbu sun sikerenɛ nge dɔ̃ɔ.
Bu sun di, ɑdɑmɑ sɑ ǹ tubɑ.
Sɑ ǹ mɑm lɑɑkɑri kue.