Ye n Yerusɑlɛmu mɑrɑ
29
1 Ariɛli, Ariɛli, wunɛ wi bɑ mɔ̀ Yerusɑlɛmu,
mi Dɑfidi u win wɑ̃ɑ yeru kuɑ,
ɑ sɑ̃ɑwɑ bɔ̃rurɑ.
A n wunɛn wɔ̃ɔ kɑ wɔ̃ɔ tɔ̃ɔ bɑkɑ ni mɔ̀ ɑ n dɔɔ.
2 Adɑmɑ kon nun wɔri,
kpɑ wuri kɑ weeweenu nu nɔɔrɑ wunɛ sɔɔ,
kpɑ ɑ ko nge nɛn yɑ̃ku yeru.
3 Kon de tɑbu kowobu bu nun tɑrusi,
kpɑ bu ben tɑbu sĩɑ yi yi
bu kɑ nun sikerenɑ.
4 Bɑ koo nun surɑ.
Kɑɑ gɑri gerumɑ tem di,
ɑdɑmɑ tuɑ kun derimɔ yi yɑri.
Wunɛn nɔɔ gɑ koo nɔɔrɑ nge siinin nɔɔ.
Tuɑn diyɑ bɑ ko n gu nɔɔmɔ kutu kutu.
5 Wunɛn yibɛrɛbɑ bɑ ko n dɑbiwɑ nge tuɑ,
kpɑ bɑ n pusɑ nge doo dirisu.
6 Adɑmɑ subɑru sɔɔ Gusunɔ, wɔllu kɑ tem Yinni
u koo nɑ u bu sɛɛyɑsiɑ
kɑ guru gbɑ̃sukubu kɑ tem yĩirubu,
kɑ wɔki bɑkɑnu kɑ woo gunɑ
kɑ guru woo bɔkɔ, kɑ sere mɑɑ dɔ̃ɔ boko,
7 kpɑ tɑbu kowo dɑbi te,
te tɑ nun wɔri mi,
tɑ wunɛn gbɑ̃rɑru tɑrusi,
tu doonɑ nge dosu.
8 Nge mɛ wi gɔ̃ɔrɑ mɔ̀ u rɑ dosi u nɛɛ, u dimɔ,
ɑdɑmɑ ù n dom yɑndɑ
kpɑ u deemɑ nukurɔ gɑ̃ɑnu sɑri.
Ǹ kun mɛ nge mɛ wi nim nɔru gɑ mɔ̀
u rɑ dosi u nɛɛ, u nim nɔrumɔ,
ɑdɑmɑ ù n dom yɑndɑ
kpɑ win gɔ̃ru gɑ n gbere, u n wɑsire,
nge mɛyɑ tɑbu kowo be,
bɑ ko n sɑ̃ɑ be bɑ koo nɑ bu Siɔnin guu te wɔri.
Isirelibɑ bɑ Yinni Gusunɔn
kirɔ ɑtɑfiiru kuɑ
9 I biti sooro,
kpɑ i nɔni yimɛ i ko nge wɔ̃kobu.
Wee i sɑ̃ɑre i tɑm goore,
ɑdɑmɑ i ǹ tɑm nɔrɑ.
I bɑ̃ɑrimɔ, ɑdɑmɑ n ǹ tɑm bɔɔbɔm sɔ̃.
10 Domi Yinni Gusunɔ u bɛɛn lɑɑkɑri sikɑrisiɑ,
u win sɔmɔbu kɑ bɛɛn sɔrobun nɔni wɔ̃kuɑ.
11 Gɑri yini kpuro yi ko n bɛɛ sɑ̃ɑwɛwɑ nge tire te bɑ wukiri bɑ yĩreru koosi. Mɑ bɑ tu goo wɛ̃ wi u gɑribu yɛ̃ bɑ nɛɛ, u tu gɑrio. Mɑ u wisɑ u nɛɛ, u ǹ kɑ̃kɔ u tu gɑri, domi bɑ tu yĩreru koosiwɑ. 12 Ǹ kun mɛ nge tire te bɑ goo wɛ̃ wi u kun gɑribu yɛ̃, bɑ nɛɛ, u tu gɑrio. Mɑ u wisɑ u nɛɛ, u ǹ gɑribu yɛ̃.
Bwisigibun bwisi koo kɑm ko
13 Yinni Gusunɔ u nɛɛ,
bwese teni tɑ̀ n nùn sɑ̃ɑmɔ,
nɔɔwɑ tɑ rɑ kɑ nùn bɛɛrɛ wɛ̃.
Ben gɔ̃ru gɑ kɑ nùn tomɑ.
Tɔmbun woodɑ kɑ ben sɔ̃ɔsinɑ bɑ swĩi, bɑ kɑ nùn sɑ̃ɑmɔ.
14 Yen sɔ̃nɑ u koo de bu biti soorɑ
kɑ sɔm mɑɑmɑɑkiginu.
U koo de ben lɑɑkɑrigibun lɑɑkɑri yu kɑm ko.
Kpɑ ben bwisigibun bwisi yi kpe.
Ye yɑ koo koorɑ ɑmɛn biru
15 Bɔ̃rurobɑ bɛɛ be i rɑ bɛɛn himbɑ Yinni Gusunɔ berue,
kpɑ i n bɛɛn kookoosu mɔ̀ yɑm wɔ̃kuru sɔɔ,
kpɑ i n gerumɔ i n mɔ̀
wɑrɑ u bɛɛ wɑɑmɔ,
nge wɑrɑ u bɛɛ yɛ̃.
16 Dɑɑ kɔ̃sɑgibu bɛɛ!
Bɑ ku rɑ mɔmɔ gɑrisi nge sɔndu.
Tem mɔndu tɑ ǹ kpɛ̃ tu mɔmɔ sɔ̃ tu nɛɛ,
n ǹ wi, u tu kuɑ,
ǹ kun mɛ tu nùn sɔ̃ tu nɛɛ,
u ǹ bwisi mɔ.
17 Sɑɑ fiiko sɔɔ,
Libɑni yɑ koo gɔsiɑ dɑ̃ɑ gbɑɑru
kpɑ tɑ n sɑ̃ɑ nge dɑ̃ɑ sɔ̃ɔ.
18 Sɑɑ ye sɔɔ,
sosobu bɑ koo tire ten gɑri nɔ.
Wɔ̃kobu bɑ koo yɑm wɑ,
kpɑ bu yɑri yɑm wɔ̃kurun di.
19 Nɛ, Yinni Gusunɔ,
kon de wɔnwɔndobu bɑ n yɛ̃ɛrimɔ bɑ n dɔɔ,
kpɑ sɑ̃ɑrobu bu nuku dobu ko,
nɛ, Isirelibɑn Yinni dɛɛron sɔ̃.
20 Domi be bɑ rɑ tɔmbu dɑm dɔre
kɑ tɔn yɑɑko kowobu bɑ koo kpe,
kpɑ kɔ̃sɑn kowobu bɑ kun mɑɑ wɑ̃ɑ.
21 Kon mɑɑ be bɑ rɑ tɔmbu tɑɑrɛ wɛ̃ siri yerɔ kpeerɑsiɑ,
kɑ be bɑ rɑ tɔmbu yinɑ bɛrie be bɑ kɑ tii yinɑmɔ,
kɑ be bɑ rɑ gemgii win gem bire siri yerɔ.
22 Yen sɔ̃nɑ nɛ, Yinni Gusunɔ,
nɛ wi nɑ Aburɑhɑmu yɑkiɑ,
nɑ win debubu Isirelin yɛnugibu sɔ̃ɔwɑ nɑ nɛɛ,
tɛ̃, bɑ ǹ mɑɑ sekuru wɑsi.
Mɛyɑ ben wuswɑɑ kun mɑɑ burisinɑmɔ.
23 Domi sɑnɑm mɛ ben bibu bɑ koo nɛn nɔmɑn sɔmɑ wɑ,
ye nɑ kuɑ ben suunu sɔɔ,
bɑ koo nɛn yĩsiru bɛɛrɛ wɛ̃,
kpɑ bu mɑn nɑsiɑ, nɛ, Gusunɔ ben Yinni dɛɛro.
24 Bèn bwisikunu nu rɑɑ tondɔ,
bɑ koo bwisi wɑ.
Be bɑ ku rɑ rɑɑ mɑɑ gɑri wure,
bɑ koo gɑri wurɑ.