Bɑ Isirelibɑn bwese kɛri
wɔku te kirɔ mɔ̀
28
1 Bɔ̃rurɑ Sɑmɑri ye yɑ sɑ̃ɑ nge sinɑ furɔ
ge Efɑrɑimubɑ bɑ kɑ tii sue.
Yɑ wɔwɑ tuke ye yɑ tem gem mɔ.
Mɑ yɑ sɑ̃ɑ yen burɑru
nge dɑ̃ɑ wɛ̃ɛ si tɔmbɑ rɑ doke wirɔ
bɑ kɑ tɑm goore.
2 Wee tɛ̃, Yinni Gusunɔ u goo sɔɔru kuɑ
wi u dɑm mɔ u kɑ ye wɔri.
Win dɑm mu sɑ̃ɑwɑ nge guru kpenu,
ǹ kun mɛ nge woo bɔkɔ ge gɑ rɑ ɑsɔrɔ ko,
ǹ kun mɛ nge guru bɑkɑ.
U koo wuu ge surɑwɑ temɔ.
3 Wuu ge, ge Efɑrɑimubɑ bɑ kɑ tii sue mi,
gɑ wɔrɑ bɑ tɑɑkumɔ,
4 nge dɑ̃ɑ wɛ̃ɛ si su dɛllɑ.
Gɑ sɑ̃ɑwɑ nge dɑ̃ɑ mɑrum mɛ mu yellu ye,
mɑ bɑ yɑnde sɔrɑ bɑ di.
5 Sɔ̃ɔ teeru, Yinni Gusunɔ Dɑm kpurogiin tiiwɑ u koo bɑndu di kpɑ u n sɑ̃ɑ win tɔn be bɑ tiɑn sinɑ furɔ burɔ kɑ ben burɑru. 6 U koo siri kowobu kpɑrɑ bu kɑ siri dee dee. Mɛyɑ u ko n mɑɑ sɑ̃ɑ ben dɑm bu kɑ yibɛrɛbɑ nɑɑ girɑ sere ben wuun gbɑ̃rɑrun kɔnnɔwɔ.
Tɑm nɔrobɑ Esɑi yɑɑkoru mɔ̀
7 Adɑmɑ tɛ̃, bɑɑ kɑ Gusunɔn sɔmɔbu kɑ yɑ̃ku kowobu,
tɑm bɔɔbɔm mu bu tirekirɑmɔ
mɑ bɑ bɑ̃ɑrimɔ mɛn sɔ̃,
sere Gusunɔn sɔmɔbu bɑ ǹ mɑɑ win gɑri mɔ̀ dee dee.
Yɑ̃ku kowobun tii bɑ ǹ mɑɑ kpɛ̃ bu siri dee dee.
8 Ben dii yenɔ ɑye dɛɛrɑru sɑri.
Siɑnu kɑ kubɑnɑ nu yibɑ mi.
9 Bɑ gerumɔ bɑ mɔ̀,
wɑrɑ nɑ kĩ n keu sɔ̃ɔsi.
Wɑrɑ u koo kɑ nɛn gɑri sɔmburu ko,
mɑ n kun mɔ bii wi bɑ bɔm kɑrɑ.
10 Bɑ mɔ̀, nɑ bu keu mɔ̀ tɛɛru.
Nɑ bu woodɑ wɛ̃ɛmɔ tiɑ tiɑ.
Nɑ yen wiru kɑ nɑɑsu tubusiɑmɔ
nge wi u bii piiminu keu sɔ̃ɔsimɔ.
11 Yen sɔ̃ tɛ̃,
Gusunɔ u koo de goo u kɑ bu gɑri ko
kɑ bɑrum tukum mɛ bɑ ǹ nɔɔmɔ.
12 Domi u bu sɔ̃ɔwɑ bu de
wi u wɑsirɑ u wɛ̃rɑ.
Wɛ̃rɑ yerɑ mɑɑ wɑ̃ɑ mi,
ɑdɑmɑ bɑ ǹ kĩ bu win gɑri wurɑ.
13 Yen sɔ̃nɑ win woodɑ ko n bu sɑ̃ɑwɛ bii sɔ̃ɔsiru te bɑ sɔ̃ɔsimɔ tɛɛru tɛɛru, tiɑ tiɑ. Kɑ mɛ, bɑ koo sokurɑ bu wɔrumɑ bu bɔɔkirɑ, kpɑ bu yinɑ mwɑɑrɑ.
Kpee te tɑ sɑ̃ɑ
gɑni gɔmburun dɑm
14 Tɛ̃ bɛɛ yɑɑko kowobu,
bɛɛ be i Yerusɑlɛmugibu dɑm dɔremɔ,
i swɑɑ dɑkio i nɔ ye Yinni Gusunɔ u gerumɔ.
15 Bɛɛ be i gerumɔ i mɔ̀,
wee i kɑ gɔɔ kɑ gɔribun wɑ̃ɑ yeru ɑrukɑwɑni bɔkuɑ.
Bɑɑ wɑhɑlɑ yɑ̀ n tunumɑ yɑ bɑndɑ,
yɑ ǹ bɛɛ turi.
Adɑmɑ i n yɛ̃ mɑ weesɑ su kuɑ bɛɛn kuku yeru.
16 Yen sɔ̃nɑ Yinni Gusunɔ u nɛɛ,
wee u kperu swĩi Siɔniɔ,
tɑ kuɑ win kpɛɛkpɛɛku.
Kpee te, tɑ sɑ̃ɑwɑ kpee gobigiru
te u gɔsɑ, tɑ kuɑ gɑni gɔmburun dɑm.
Wi u tu kuɑ win tɑ̃si yeru u ǹ wɔrumɑmɔ.
17 Wee, u gem nɛni nge bɑnɔbun wɛ̃ɛ
yi bɑ rɑ kɑ diru yĩire,
ǹ kun mɛ ben nifo
ye bɑ rɑ kɑ gɑnɑn sikirɑbu mɛɛri.
Guru kpenu nu koo wee si kpuro kɔsuku
si su kuɑ bɛɛn kuku yeru mi.
Nim bɑkɑm mu koo su mwɛ.
18 Bɛɛn ɑrukɑwɑni ye i rɑɑ kɑ gɔɔ bɔkuɑ
yɑ koo kɑm ko.
Kpɑ ye i rɑɑ kɑ gɔribun wɑ̃ɑ yeru bɔkuɑ
yɑ kun mɑɑ wɑ̃ɑ.
Yibɛrɛbɑ bɑ̀ n bɛɛ wɔri bɑ ɑsɔrɔ kuɑ
bɑ koo bɛɛ tɑɑkuwɑ.
19 Bɑ ko n bɛɛ tɑɑkumɔwɑ sɑɑ kpuro nge mɛ̀n nɔɔ bɑ sɑrɑmɔ. Domi bɑ ko n dɑ sɑrewɑ bururu bɑɑtere kɑ mɑɑ sɔ̃ɔ sɔɔ kɑ wɔ̃kuru, kpɑ i bɛrum soorɑ ì n ben lɑbɑɑri nuɑ.
20 Nge mɛ bɑ rɑ gere, bu nɛɛ,
kpin yerɑ kun dɛ̃ɛbu turi ɑ kɑ tii dɛmiɑ.
Bekurɑ kun mɑɑ yɑsum turi ɑ kɑ wukiri.
21 Domi Yinni Gusunɔ u koo tɑbu ko
nge mɛ u rɑɑ kuɑ Perɑsimun guurɔ.
U koo mɔru bɑrɑ
nge mɛ u rɑɑ kuɑ Gɑbɑonin wɔwɑɔ,
u kɑ win sɔm mɑɑmɑɑkigiɑ sɔ̃ɔsi
ye bɑ ǹ wɑɑre.
22 Tɛ̃, i ku mɑɑ de i n wɑ̃ɑ yɑɑko kookoosu sɔɔ, kpɑ bu ku rɑɑ mɑɑ bɛɛ nɔni swɑ̃ɑru sosiɑ. Domi nɑ nuɑ mɑ Gusunɔ, wɔllu kɑ tem Yinni, u himbɑ yi u kɑ tem mɛ kpuro kpeerɑsiɑ.
Yinni Gusunɔn bwisi
23 I swɑɑ dɑkio i nɔ.
I swɑɑ tem kpĩiyɔ i nɛn gɑri nɔ.
24 Wi u gbɑɑru kɔrɑmɔ u kɑ dĩɑnu duure
u ku rɑ n kɔrɔ tɔnɑ mɔ̀ u n dɔɔ bɑɑdommɑ.
25 Ù n kɔrɑ u kpɑ,
u rɑ mi dĩɑ bwese bwesekɑ duurewɑ
bɛɛru kɑ bɛɛru.
Kpɑ u mɑɑ dĩɑnu gɑnu duure nɛnɛm
gbɑɑ ten goorɔ.
26 Gusunɔ wi u sɑ̃ɑ win Yinni
wiyɑ u nùn bwisi kɑ̃.
U nùn yen kpunɑɑ sɔ̃ɔsi.
27 U ku rɑ dobi so kɑ tebo,
u rɑ yi sowɑ kɑ bokuru.
U ku rɑ mɔri so kɑ dɑm,
u rɑ yi sowɑ kɑ boku piibu.
28 U rɑ ɑlikɑmɑ sure,
ɑdɑmɑ u yen sɑkɑ yɛ̃ yu ku kɑ munkirɑ.
29 Yenin tii yɑ weewɑ Gusunɔ, wɔllu kɑ tem Yinnin min di.
Win bwisi kɛ̃ru tɑ sɑ̃ɑwɑ mɑɑmɑɑki.
Win lɑɑkɑri yɑ mɑɑ kpɑ̃.