Bɑ wɑɑ kɔ̃sɑ kɑmiɑ
27
1 Tɔ̃ɔ te sɔɔ, Yinni Gusunɔ u koo wɑɑ kɔ̃sɑ ye yɑ dukɑ mɔ sɛɛyɑsiɑ kɑ win tɑkobi dɑmgiɑ ye yɑ kpɑ̃, kpɑ u yɑɑ kɔ̃sɑ ye go, ye yɑ wɑ̃ɑ nim wɔ̃ku sɔɔ.
Yinni Gusunɔ
kɑ win resɛm gbɑɑru
2 Yen tɔ̃ɔ te, Yinni Gusunɔ u koo womu ko
win resɛm gbɑɑrun sɔ̃, te tɑ bii geenu mɑrumɔ, u nɛɛ,
3 nɛ, Yinni Gusunɔwɑ nɑ tu nɔɔrimɔ.
Nɛnɑ nɑ tu nim yɛ̃kɑmɔ sɑɑ kpuro.
Nɑ tu kɔ̃su sɔ̃ɔ sɔɔ kɑ wɔ̃kuru,
goo u ku rɑɑ kɑ tu wɔri u mwɑ.
4 Nɑ ǹ mɑɑ kɑ nɛn resɛm gbɑɑ te mɔru sɑ̃ɑ.
Adɑmɑ nɑ̀ n sɑ̃ki kɑ ɑwĩi wɑ mi,
kon yi wɔriwɑ n dɔ̃ɔ mɛni,
5 mɑ n kun mɔ yi mɑn kuɑ yin kuku yeru,
mɑ yi kɑ mɑn nɔɔ tiɑ kuɑ.
Yì n kuɑ mɛ, kon yi deri.
Yinni Gusunɔ
u koo Isirelibɑ suuru kuɑ
6 Sɑɑ gɑɑ sisi yè sɔɔ
Isirelibɑ bɑ koo gbini girɑ
bu kɛri ko nge dɑ̃ɑ,
bu wɛ̃su ko bu mɑ
kpɑ ben binu nu hɑnduniɑ yibu.
7 Yinni Gusunɔ u ǹ bu sɛɛyɑsie
nge mɛ u ben yibɛrɛbɑ sɛɛyɑsiɑ.
U ǹ mɑɑ bu go nge mɛ u ben yibɛrɛbɑ go.
8 U bu sɛɛyɑsiɑwɑ sɑkɑ sɔɔ.
U derɑ yibɛrɛbɑ bɑ nɑ
nge sɔ̃ɔ yɑri yerun woo dɑmguu,
bɑ bu gurɑ bɑ kɑ doonɑ.
9 Nge mɛyɑ u kɑ Isirelibɑn durum wɔkɑ.
Wee ye n koorɑ yen biru.
U ben bũu turɑnu gɔsiɑ torom.
Bɑ ǹ mɑɑ Asitɑɑten bwɑ̃ɑrokunu kɑ sɔ̃ɔginu seeyɑmɔ.
10 Ben wuu dɑmguu ge,
gɑ kuɑ bɑnsu, bɑ gu deri.
Miyɑ n kuɑ yɑɑ sɑbenun kpɑrɑ yeru
kɑ nin kpin yeru.
Mɑ nu kiku si su tiɑrɑ dimɔ.
11 Dɑ̃ɑ yɑ̀ n gberɑ bɑ rɑ ye bɔɔriwɑ
kpɑ tɔn kurɔbu bu kɑ doo ko.
Wee nɛn tɔn be, bɑ ǹ bwisi mɔ.
Yen sɔ̃nɑ Yinni Gusunɔ wi u bu tɑkɑ kuɑ
u ǹ bu wɔnwɔndu kue,
u ǹ mɑɑ bu durom kue.
Be bɑ rɑɑ yoru mwɛɛrɑ
bɑ koo wurɑmɑ
12 Sɑɑ gɑɑ sisi yè sɔɔ Yinni Gusunɔ u koo bɛɛ Isirelibɑ sirɑ nge dɑ̃ru,
kpɑ bu bɛɛ dɔbiri tiɑ tiɑ
sɑɑ Efɑrɑtin dɑɑrun di n kɑ girɑri Egibitin dɑɑrɔ.
13 Yen tɔ̃ɔ te, bɑ koo kɔbi bɑkɑ so
kpɑ be bɑ rɑɑ yoru mwɛɛrɑ bɑ woo Asiriɔ
kɑ be bɑ kpikiru dɑ Egibitiɔ bu wurɑmɑ.
Kpɑ bu yiirɑ bu Yinni Gusunɔ sɑ̃
guu dɛɛrɑ ten mi, Yerusɑlɛmuɔ.