Yinni Gusunɔ
u koo win tɔmbu nɑsɑrɑ wɛ̃
26
1 Sɑɑ gɑɑ sisi yè sɔɔ bɑ koo womu geni ko Yudɑn tem sɔɔ bu nɛɛ,
sɑ wuu dɑmguu mɔ.
Yinni Gusunɔwɑ u gen gbɑ̃rɑru swĩi
u kɑ gu kɔ̃su.
2 I gɑmbobɑ kɛniɔ
kpɑ bwese te tɑ gem swĩi tɑ nùn mɛm nɔɔwɑmmɛ
tu du min di.
3 Yinni Gusunɔ u rɑ sikɑ sɑrirugii bɔri yɛndu wɛ̃,
yèn sɔ̃ yɛ̃ro u nùn nɑɑnɛ sɑ̃ɑ.
4 I Yinni Gusunɔ nɑɑnɛ koowo
sɑɑ kpuro sɔɔ.
Domi wiyɑ u sɑ̃ɑ kuku yee dɑmgiru
sere kɑ bɑɑdommɑɔ.
5 U koo wuu ge gɑ wɑ̃ɑ
wɔllɔn tɔmbu kpeerɑsiɑ,
kpɑ u gen tii kɔsuku u surɑ sere temɔ,
6 kpɑ sɑ̃ɑrobu kɑ wɔnwɔndobu
bu gu tɑɑku.
Sɑɑ dɑ̃ɑkɑn kɑnɑru
7 Gemgiin swɑɑ yɑ rɑ n dɛndewɑ.
Yinni Gusunɔ, wunɛ wi ɑ sɑ̃ɑ gemgii
wunɑ ɑ rɑ ye nɔɔ nɛrɑsie.
8 Yinni Gusunɔ, swɛɛ yi kɑɑ sun sure kpuro,
wunɑ sɑ ko n nɑɑnɛ sɑ̃ɑ,
su kɑ sĩ yi sɔɔ.
Ye bɛsɛn gɔ̃ru gɑ kĩ,
yerɑ su nun yɑɑyɑ kpɑ su nun sɑ̃.
9 Wɔ̃kuru, nɛn bwɛ̃rɑ yɑ rɑ n wunɛn bɛkɛ bɑrɔwɑ,
kpɑ nɛn gɔ̃ru gɑ n nun kɑsu.
À n tɔmbu siri hɑnduniɑ sɔɔ,
bɑ rɑ giewɑ nge mɛ bɑ koo kɑ sĩ.
10 Adɑmɑ bɑɑ bɑ̀ n tɔn kɔ̃so durom kuɑ,
u ǹ gem giɑmɔ.
U ko n win kom kɔ̃sum mɔ̀wɑ
tem mi gem mu wɑ̃ɑ,
kpɑ u n Gusunɔn yiiko gɛmɑ.
11 Yinni Gusunɔ, ɑ dɑm mɔ,
ɑdɑmɑ wunɛn yibɛrɛbɑ bɑ ǹ mu wɑɑmɔ.
A de bu wunɛn hɑniɑ wɑ
ye ɑ kɑ wunɛn tɔmbu wɔrɑmɔ,
kpɑ bu sekuru wɑ bu dɔ̃ɔ mwɑɑrɑ.
12 Yinni Gusunɔ, wunɑ ɑ rɑ sun bɔri yɛndu wɛ̃.
Domi wunɑ ɑ rɑ de ye sɑ mɔ̀ kpuro yu koorɑ.
13 Gusunɔ bɛsɛn Yinni sɑ rɑɑ yinnibu gɑbu sɑ̃wɑ.
Adɑmɑ tɛ̃, wunɛ turon yĩsirɑ sɑ soku.
14 Yinni, be bɑ gu,
bɑ ǹ mɑɑ seemɔ bu wɑ̃ɑru di.
Domi ɑ bu wɔri ɑ kpeerɑsiɑ.
Bɑ ǹ mɑɑ bu yɑɑyɑmɔ.
15 Yinni, ɑ wunɛn yiiko sɔ̃ɔsi.
A derɑ bɛsɛ wunɛn tɔmbu sɑ dɑbiɑ.
Mɑ ɑ bɛsɛn tem yɑsiɑsiɑ.
16 Sɑ nun sokɑ sɑnɑm mɛ sɑ wɑ̃ɑ nɔni swɑ̃ɑru sɔɔ.
Sɑ kɑnɑru kuɑ sɑnɑm mɛ ɑ sun sɛɛyɑsiɑ.
17 Yinni Gusunɔ, sɑnɑm mɛ ɑ sun biru kisi
sɑ kuɑ nge tɔn kurɔ wi u yiire u kĩ u mɑ,
u tii bɔɔkumɔ u wuri mɔ̀ wuriribun sɔ̃.
18 Sɑ wɑhɑlɑ kuɑ sɑ nɔni sɔ̃ɔrɑ kɑ wuriribu.
Adɑmɑ wom dirumɑ sɑ mɑrɑ.
N ǹ kɑ tem mɛ ɑrufɑɑni gɑɑ nɑɑwɛ.
Sɑ ǹ mɑɑ goo mɑrɑ wi u koo sinɑ mɛ sɔɔ.
Yinni Gusunɔ
u koo Isirelibɑ sɛɛyɑsiɑ
kpɑ bu wurɑmɑ ngɛ yellu
19 Nɛgibu, bɛɛn tɔn be bɑ rɑɑ gu
bɑ koo se gɔrin di bu wɑ̃ɑru di.
Bɛɛ be i kpĩ tem sɔɔwɔ, i dom yɑndo,
kpɑ i nuku dobun kuuki ko.
Domi tem mu koo bɛɛ seeyɑ gɔrin di
nge mɛ bururun kɑkoru tɑ rɑ yɑkɑsu seeye.
20 Nɛn tɔmbu, i doo i kuke bɛɛn diɑɔ
i tii gɑmbobɑ kɛnusio,
kpɑ i n wɑ̃ɑ mi ginɑ
sere Gusunɔn mɔru yu kɑ sure.
21 Wee Yinni Gusunɔ u yɑrimɑ
win wɑ̃ɑ yerun di
u kɑ hɑnduniɑn tɔmbu siri
kɔ̃sɑ ye bɑ kuɑn sɔ̃.
Tem mu koo tɔn be bɑ gon yɛm terɑsiɑ,
kpɑ ben gonu nu sɔ̃ɔsirɑ.