Yinni Gusunɔ
u koo Egibitigibu sɛɛyɑsiɑ
19
1 Gɑri yiniwɑ bɑ geruɑ Egibitin sɔ̃. Bɑ nɛɛ,
wee Yinni Gusunɔ u sisi fuuku Egibitiɔ,
u guru wiru sɔni nge dumɑ.
Mɑ Egibitigibun bũnu nu diirumɔ win wuswɑɑɔ,
mɑ ben wɔrugɔru tɑ kpɑ.
2 U koo de bu tɑbu ko ben tii tiinɛ.
Mɔɔ kɑ wɔnɔ bɑ koo tɑbu wɔrinɑ.
Bɔrɔ kɑ bɔrɔ bɑ koo tɑbu wɔrinɑ.
Wusu su koo tɑbu wɔrinɑ.
Sinɑmbu bɑ koo tɑbu wɔrinɑ.
3 U koo de Egibitigibu bu mwiɑ kpɑnɑ,
kpɑ u ben nɔɔ tiɑ kɑm koosiɑ.
Kpɑ bu bikiɑru dɑ bũnun mi kɑ dobo dobogibun mi
kɑ gɔri sokobun mi, kɑ sɔrobun mi.
4 U koo bu yinni gɔbo nɔmu sɔndiɑ,
kpɑ sunɔ nuku kɔ̃surugii u n bu dɑm dɔremɔ.
Gusunɔ, wɔllu kɑ tem Yinniwɑ u yeni geruɑ.
5 U koo ben dɑɑ bɑkɑ ten nim kpeerɑsiɑ
kpɑ tu gberɑ.
6 Ten yɛrusun nim mu koo numiɑ,
kpɑ ten kɛrin winun nim mu gberɑ,
kpɑ nɑɑ yɑri kɑ gbĩi yi yi wɑ̃ɑ ten goorɔ yi gberɑ.
7 Gɑ̃ɑnu kun ko n mɑɑ wɑ̃ɑ dɑɑ ten goorɔ
kɑ ten sure yerɔ.
Bɑ̀ n gɑ̃ɑnu duurɑ mi, nu koo gberɑwɑ nu gbi.
8 Be bɑ susure mɔ̀ mi kpuro
kɑ kɔkɔnu ǹ kun mɛ kɑ yɑ̃ɑkoronu,
bɑ koo nuki sɑnkirɑwɑ kpɑ bu swĩ.
9 Be bɑ beku wɛ̃ɛ dɑmgii tɑrimɔ
kɑ be bɑ beku kpikinu wesimɔ bɑ koo sekuru wɑ.
10 Be bɑ sɑ̃ɑ tem mɛn dɑm bɑ koo kɔsikirɑ.
Kpɑ ben sɔm kowobu bu nuki sɑnkirɑ.
11 Soɑnin wirugibu bɑ sɑ̃ɑwɑ gɑri bɑkɑsu.
Egibitin sunɔn bwisi kɛ̃ɔbu bɑ̀ n mɛnnɑ,
gɑri bɑkɑ gɑriyɑ bɑ rɑ gere.
Bwisi kɛ̃ɔbu bɛɛ, ɑmɔnɑ i ko i kɑ̃ku i gere i nɛɛ,
i sɑ̃ɑwɑ bwisigibu kɑ sinɑ bibu.
12 Wunɛ mɑɑ Egibitin sunɔ,
mɑnɑ wunɛn bwisi kɛ̃ɔ be, bɑ wɑ̃ɑ.
Kpɑ bu gere su nɔ yèn himbɑ Gusunɔ wɔllu kɑ tem Yinni
u wunɛn temgibu kuɑ.
13 Soɑnin wirugibɑ kuɑ wiirobu,
mɑ Nɔfun wirugibɑ kun mɑɑ yɛ̃ ye bɑ mɔ̀.
Wirugii be, bɑ derɑ Egibitigibɑ kɔ̃ɔrɑmɔ.
14 Yinni Gusunɔ u ben bwisi burisinɑ
kpɑ bu de Egibitigibu bu kɔ̃ɔrɑ,
bɑ n mɔ̀ nge tɑm nɔro wi u bindimɔ win siɑnu sɔɔ.
15 Wirugii kɑ bwɛ̃ɛbwɛ̃ɛ, gobigii kɑ sɑ̃ɑro, ben goo kun mɑɑ kpɛ̃ u gɑ̃ɑnu ko Egibitiɔ.
Egibitigibu
bɑ koo Yinni Gusunɔ sɑ̃
16 Sɑnɑm mɛ Egibitigibɑ koo wɑ mɑ Yinni Gusunɔ u bu win nɔmu dɛmiɛ u kɑ bu sɛɛyɑsiɑ bɑ koo bɛrum soorɑ nge tɔn kurɔbu. 17 Sɑɑ ye sɔɔ, bɑɑ bɑ̀ n nuɑ bɑ Yudɑn gɑri mɔ̀, bɑ koo nɑndɑ Yinni Gusunɔn himbɑn sɔ̃ ye u yi ben sɔ̃.
18 Sɑɑ ye sɔɔ, wusu nɔɔbuwɑ su ko n wɑ̃ɑ Egibitin temɔ sì sɔɔ bɑ ko n dɑ Yudɑbɑn bɑrum gere. Kpɑ bɑ n dɑ bɔ̃re mɑ bɑ sɑ̃ɑ Gusunɔ, wɔllu kɑ tem Yinnin tɔmbu. Bɑ koo wuu sin teu sokuwɑ Sɔ̃ɔn wuu.
19 Bɑ koo Yinni Gusunɔ yɑ̃ku yeru kuɑ Egibitin tem suunu sɔɔ, kpɑ bu kperu gɑru girɑ mɛn nɔɔ burɑ yerɔ bu kɑ nùn bɛɛrɛ wɛ̃. 20 Yerɑ yɑ koo sɔ̃ɔsi mɑ Yinni Gusunɔ u wɑ̃ɑ Egibitin temɔ. Bɑ̀ n nùn nɔɔgiru sue be bɑ bu dɑm dɔremɔn sɔ̃, u koo bu fɑɑbɑ kowo wɛ̃ wi u koo bu wɔrɑ ben nɔmɑn di. 21 Sɑɑ ye sɔɔ, u koo bu tii sɔ̃ɔsi kpɑ bu nùn giɑ. Bɑ koo nùn yɑ̃kunu kuɑ kpɑ bu kɑ nùn kɛ̃nu nɑɑwɑ. Bɑ̀ n nùn nɔɔ mwɛɛnu kuɑ, kpɑ bu nu yibiɑ. 22 U bu mɛɛrɑ kuɑ, ɑdɑmɑ u koo bu bɛkiɑ. Bɑ koo gɔsirɑ win mi, kpɑ u ben kɑnɑru nɔ u bu fɑɑbɑ ko.
23 Sɑɑ ye sɔɔ, swɑɑ yɑ koo yɑri Egibitin di yu dɑ Asiriɔ, kpɑ Egibitigibu bu dɑ Asiriɔ. Asirigibu bɑ koo mɑ dɑ Egibitiɔ, kpɑ be kpuro bu mɛnnɑ bu Yinni Gusunɔ sɑ̃.
24 Sɑɑ ye sɔɔ, Isirelibɑ bɑ koo kɑ Egibitigibu kɑ Asirigibu nɔɔ tiɑ ko, kpɑ hɑnduniɑgibu kpuro bu domɑru wɑ. 25 Gusunɔ, wɔllu kɑ tem Yinni, u koo bu domɑru kuɑ u nɛɛ, domɑrugibɑ bɛɛ, nɛn tɔmbu Egibitigibu. Domɑrugibɑ bɛɛ, Asirigibu, bɛɛ be nɑ mɔmɑ. Domɑrugibɑ bɛɛ Isirelibɑ, bɛɛ be nɑ gɔsɑ nɑ tii yiiyɑ.