Yinni Gusunɔ
u koo Etiopigibu sɛɛyɑsiɑ
18
1 Tem mu wɑ̃ɑ Etiopin dɑɑrun berɑ giɔ,
mi tɑbun wurenu nɔɔrɑmɔ.
2 Mɛn tɔmbu bɑ gunu mɑ ben wɑsi bɑllimɔ.
Bɑ bu nɑsie bɑɑmɑ kpuro,
yèn sɔ̃ bɑ rɑ kpuro kɔsuku.
Mɑ dɑɑnu ben tem burɑnɛ.
Beyɑ bɑ sɔmɔbu gɔrɑ kɑ goo nimkuu si bɑ kuɑ kɑ gbĩi.
Goo nimkuu si, su dukɑ mɔ.
Tɛ̃, sɔmɔbu bɛɛ, i wuro bɛɛgibun mi.
3 Bɛɛ hɑnduniɑgibu kpuro,
i gidi bɔrɑ mɛɛrio ye bɑ koo girɑ guuru wɔllɔ.
I kɔbɑn swĩi swɑɑ dɑkio ye bɑ koo so.
4 Domi ɑmɛniwɑ Yinni Gusunɔ u mɑn sɔ̃ɔwɑ. U nɛɛ,
u yɔ̃ sɛ̃ɛ u yɑm mɛɛrɑ kɑ lɑɑkɑri win wɑ̃ɑ yerun di
sɔ̃ɔ sɑ̃rerun sɑɑ kɑ wuburun sɑɑ.
5 Resɛm yɑ̀ n wɛ̃su kuɑ,
mɑ yɑ bɛm doke yɑ ye,
bu sere ye sɔri,
yibɛrɛ u koo nɑ u yen kɑ̃ɑsi bɔɔri kɑ woburu,
6 kpɑ u ye gunɔsu kɑ gbeeku yɛɛ deriɑ yi di.
Gunɔsu su ko n wɑ̃ɑ mi, yɑm susurun sɑɑ,
kpɑ gbeeku yɛɛ yi n wɑ̃ɑ mi purɑn sɑɑ.
Nge mɛyɑ bɑ koo Asirigibun tɑbu kowobun gonu kuɑ.
7 Sɑɑ ye sɔɔ, tɔn be bɑ gunu mi, mɑ ben wɑsi bɑllimɔ bɑ bu nɑsie bɑɑmɑ kpuro yèn sɔ̃ bɑ rɑ kpuro kɔsuku, mɑ dɑɑnu ben tem burɑnɛ, tɔn be, bɑ koo kɑ Gusunɔ wɔllu kɑ tem Yinni kɛ̃nu nɑɑwɑ Siɔnin guurɔ mi bɑ rɑ nùn sɑ̃.