Yinni Gusunɔ u koo Sirigibu
kɑ Isirelibɑ sɛɛyɑsiɑ
17
1 Yinni Gusunɔ u nɛɛ,
wee Dɑmɑsi yɑ ǹ ko n mɑɑ wɑ̃ɑ,
yɑ koo kowɑ bɑnsu.
2 Bɑ koo Aroɛɛn wusu yɑɑ sɑbenu deriɑ.
Miyɑ nu ko n dɑ kpunɛ.
Goo mɑɑ sɑri wi u koo nu nɑndɑsiɑ.
3 Isirelibɑ bɑ ǹ ko n gbɑ̃rɑru mɔ.
Mɛyɑ Dɑmɑsi yɑ ǹ ko n mɑɑ sinɑ boko mɔ.
Sirigii be bɑ tie, bɑ ǹ Isirelibɑ bɛɛrɛ kerɑmɔ.
Gusunɔ, wɔllu kɑ tem Yinniwɑ u yeni geruɑ.
4 Sɑɑ ye sɔɔ, Isirelibɑn bɛɛrɛ yɑ koo kɑɑrɑ,
kpɑ ben dukiɑ yu doonɑ bu ko sɑ̃ɑrobu.
5 Ben tem mu ko n sɑ̃ɑ nge gbee
tèn dĩɑnu bɑ gɑ̃ bɑ gurɑ.
Nu ko n sɑ̃ɑwɑ pɑrɑ pɑrɑ
nge sɑnɑm mɛ bɑ dĩɑnu gurɑ Refɑn wɔwɑn di.
6 Isirelibɑn fiikowɑ yɑ koo tiɑrɑ
nge dɑ̃ɑ bii ni nu tiɑrɑ sɑnɑm mɛ bɑ dɑ̃ru sirɑ.
À n mɛɛrɑ kɑɑ wɑ
yiru ǹ kun mɛ itɑ tɔnɑ yɑ tie ten wii kpiirɔ,
mɑ nnɛ ǹ kun mɛ nɔɔbu yɑ tie ten kɑ̃ɑsi sɔɔ.
Gusunɔ Isirelibɑn Yinniwɑ u yeni geruɑ.
7 Tɔ̃ɔ te sɔɔ, tɔmbɑ koo ben lɑɑkɑri wesiɑ ben tɑkɑ kowon mi giɑ, kpɑ ben nɔni yi Gusunɔ Isirelibɑn Yinni Dɛɛro wɑ. 8 Bɑ ǹ mɑɑ ben lɑɑkɑri wesiɑmɔ bũu turɑnun berɑ giɑ, ni ben tii bɑ kuɑ. Bɑ ǹ mɑɑ Asitɑɑten bwɑ̃ɑroku sɑ̃ɑmɔ, kɑ bwɑ̃ɑroku ni bɑ kuɑ sɔ̃ɔn sɔ̃. Domi nu sɑ̃ɑwɑ ben tiin nɔmɑn koorɑ.
9 Sɑɑ ye sɔɔ, Isirelibɑ bɑ koo ben wuu dɑmgisu deri, kpɑ su ko bɑnsu nge mɛ Amɔrebɑ bɑ ben wusu deri be Isirelibɑn sɔ̃.
10 Wee bɛɛ Isirelibɑ, i Gusunɔ bɛɛn Yinni duɑri
wi u bɛɛ fɑɑbɑ kuɑ.
I ǹ nùn yɑɑye wi u sɑ̃ɑ bɛɛn kuku yee nɑɑnɛgiru.
Domi wee i dɑ̃ɑ binu duurɑ bũnun sɔ̃.
11 Sɑnɑm mɛ i nu duurɑ, i nu kɑrɑ koosi,
mɑ nu seewɑ nu kpɛ̃ɑ fuuku, nu wɛ̃su kuɑ.
Adɑmɑ sɑnɑm mɛ i ko i nuku dobu ko i nin mɑrum sɔri,
i deemɑ gɑ̃ɑnu sɑri.
Mɑ n kuɑ nɔni swɑ̃ɑ bɑkɑru te tɑ ǹ kpeemɔ.
Bɑ Isirelibɑn yibɛrɛbɑ kɑmiɑ
12 Annɑ ɑ kukiribu nɔ.
Bwese dɑbinu nu burisinɛ
mɑ nu kukirimɔ nge nim wɔ̃kun nim.
Nu wɔki nge dɑɑ tèn torɑ yɑ bɔɔbu.
13 Bɑ kukirimɔ nge dɑɑ bɑkɑrun nim.
Adɑmɑ Yinni Gusunɔ u bu gerusi,
mɑ bɑ duki yɑrinɑ n tomɑ,
nge yɑkɑ si woo gɑ suɑ gɑ kɑ doonɑ,
ǹ kun mɛ, nge tuɑ ye woo gunɑ yɑ seeyɑ.
14 Ye n kuɑ yokɑ mɑ bɑ bu kpeerɑsiɑ subɑru sɔɔ.
Yɑm mu sere sɑ̃rɑ bɑ ǹ mɑɑ wɑ̃ɑ.
Nge mɛyɑ be bɑ sun wɔrimɔ bu kɑ sun gurɑ
ben kɔkɔrɔ yɑ ko n sɑ̃ɑ.