Mɔɑbubɑ bɑ Yerusɑlɛmugibu
somiru kɑnɑmɔ
16
1 I Yudɑbɑn sinɑ boko yɑ̃ɑ
kpɛmminu mɔrisio Selɑn di,
kpɑ bu kɑ nu dɑ Siɔnin guurɔ
kɑ swɑɑ ye yɑ kpɑ mi gɑ̃ɑnu ku rɑ kpi.
2 Domi Mɔɑbun tɔn kurɔbu bɑ koo Aɑnɔɔn dɑɑru tɔburɑ,
kpɑ bɑ n sɛnde nge gunɔ si bɑ girɑ sokurun di su duki mɔ̀.
3 Bɑ koo Yudɑbɑ sɔ̃ bu nɛɛ,
i sun bwisi kɛ̃ɔ i sun sɔ̃ɔwɔ ye sɑ ko ko.
I de bɛɛn sɑɑru tɑ n sun wukiri sɔ̃ɔ sɔɔ nge yɑm wɔ̃kuru.
I sun beruo bɛsɛ be bɑ nɑɑ gire.
I ku sun yibɛrɛbɑ nɔmu bɛriɑ.
4 I sun mɔɔ bɛsɛ be sɑ kpikiru suumɑ Mɔɑbun di.
Kpɑ i n sɑ̃ɑ bɛsɛn kuku yeru
be bɑ sun kpeerɑsiɑmɔn sɔ̃.
Domi dɑm dɔrebu bu koo kpe.
Be bɑ mɑɑ sun kpeerɑsiɑmɔ bɑ koo doonɑ.
5 Sɑɑ ye sɔɔ, goo u koo yɑri
Dɑfidin bweseru sɔɔ Gusunɔn durom sɑɑbu
kpɑ u bɑndu di te tɑ ko n sirere
kpɑ tu dɑkɑɑ dɑ.
U koo tɔmbu kpɑrɑ gem sɔɔ,
kpɑ u n kpeere u kɑ bu siriɑ dee dee.
Yerusɑlɛmugibu
bɑ ǹ Mɔɑbubɑ somimɔ
6 Yudɑbɑ bɑ nɛɛ,
sɑ Mɔɑbubɑn yɛ̃kɔ kɑ ben tii suɑbun lɑbɑɑri nɔɔmɔ,
kɑ ben woo bɔbunu kɑ ben gɑri kɑm gerubu.
7 Tɛ̃ bɑ weeweenu mɔ̀ ben tiin sɔ̃,
bɑ sumɔ Kiri Hɑresɛtin sɔ̃
ye yɑ bɑnsu kuɑ.
8 Wee bɑ Hɛsibonin gberu kpɑɑnɛbɑ sɑnkɑ.
Bwese tukunun sinɑmbu bɑ Sibimɑn resɛmbɑn konu bɔɔrɑ.
Resɛm gbɑɑ ni, nu tɛrie sere Yɑsɛɛɔ sɔ̃ɔ yɛ̃sɑn nɔm geu giɑ
n kɑ dɑ mi gɑ̃ɑnu ku rɑ kpin sɔ̃ɔ yɑri yerɔ,
kɑ sere nim wɔ̃kun guruɔ sɔ̃ɔ duu yerɔ.
9 Tɛ̃ wee, nɑ sumɔ Sibimɑn resɛm gbɑɑnu kɑ Yɑsɛɛn sɔ̃.
Nɑ Hɛsiboni kɑ Eleɑle nɔni yĩresu wisimɔ,
domi tɑbu kowobɑ ben gbeɑ wɔri bɑ yen dĩɑnu gurɑ.
10 Nuku dobu kun mɑɑ wɑ̃ɑ resɛm gbɑɑnɔ.
Bɑ ǹ mɑɑ womusu mɔ̀ mi.
Mɛyɑ bɑ ǹ mɑɑ resɛmbɑ gɑmɑmɔ.
Nuku dobun kuuki yi kpɑ.
11 Nɛn wɑsi yi diirumɔ Mɔɑbun sɔ̃ nge mɔrɔku sɛrum.
Mɛyɑ nɛn gɔ̃ru gɑ mɑɑ diirumɔ Kiri Hɑrɛsin sɔ̃.
12 Mɔɑbubɑ bɑ dɑɑmɔ gungunu wɔllɔ kɑm sɔɔ.
Bɑ dumɔ ben bũu sɑ̃ɑ yerɔ bu kɑ domɑru ko.
Adɑmɑ bɑ ǹ somiru wɑsi.