Mɔɑbubɑn nɔni swɑ̃ɑru
(I mɑɑ mɛɛrio 15-16, Yeremi 48)
15
1 Gɑri yiniwɑ bɑ geruɑ Mɔɑbubɑn sɔ̃.
Mɔɑbun tem kpuro mu koo kɑm ko,
kpɑ bu Ari Mɔɑbu kɑ Kiri Mɔɑbu kɔsuku wɔ̃ku teeru.
2 Dibonigibu bɑ dɑ bũu sɑ̃ɑ yerɔ
kɑ guunu wɔllɔ bu kɑ swĩ.
Mɔɑbubɑ bɑ weeweenu mɔ̀ wuu si bɑ mɔ̀ Nɛbo kɑ Mɛdebɑn sɔ̃.
Mɑ bɑ ben winu kɑ ben tobunu kɔnɑ nuku sɑnkirɑnun sɔ̃.
3 Mɑ bɑ sɑɑkibɑ sebuɑ bɑ wɑ̃ɑ swɛɛ sɔɔ
kɑ dii tɛɛriɔ kɑ dii yɑɑriɔ nuku sɑnkirɑnun sɔ̃.
Mɑ bɑ weeweenu mɔ̀ bɑ sumɔ kɑ nɔni yĩresu.
4 Hɛsibonigibu kɑ Eleɑlegibu bɑ fɑɑbɑ kɑnɑmɔ
mɑ bɑ ben nɔɔ nɔɔmɔ sere Yɑhɑsiɔ.
Bɑɑ Mɔɑbun tɑbu kowobun tii bɑ wuri mɔ̀wɑ bɛrum sɔ̃.
5 Nɑ fɑɑbɑ kɑnɑmɔ Mɔɑbubɑn sɔ̃
be bɑ kpikiru suɔ bɑ dɔɔ Soɑriɔ kɑ Egɑlɑti Selisiyɑɔ.
Domi bɑ sumɔ bɑ kɑ Lusitin guunu yɔɔmɔ,
bɑ wuri mɔ̀ Koronɑimun swɑɑɔ nuku sɑnkirɑnun sɔ̃.
6 Dɑɑ te bɑ mɔ̀ Nimurimu ten nim mu gberɑ.
Yɑkɑ si su wɑ̃ɑ ten gɑ̃ɑrɔ su gberɑ.
Gɑ̃ɑnu kun mɑɑ kpiɑ mi.
7 Yen sɔ̃nɑ bɑ ben ɑrumɑni gurɑ
ye yɑ bu tie
bɑ kɑ tɔburɑmɔ nim torɑn guru giɔ mi dɑ̃nu wɑ̃ɑ.
8 Mɔɑbubɑn tem nɔɔ burɑ yenu
kpuro sɔɔ, wuri nɔɔrɑmɔ.
Ben weeweenu nu nɔɔrɑmɔ sere Egɑlɑimuɔ, kɑ mɑɑ Elimun dɔkɔwɔ.
9 Dɑɑ te tɑ wɑ̃ɑ Dimɔniɔ ten nim
mu yɛm yibɑ tɔn be bɑ gon sɔ̃.
Adɑmɑ Yinni Gusunɔ u koo kpɑm Dimɔni ye nɔni swɑ̃ɑru kpɛ̃ɛ.
U koo de yibɛrɛbɑ bu Mɔɑbun kpikobu,
kɑ be bɑ tie tem mɛ sɔɔ wɔri nge gbee sinɑnsu.