Isirelibɑ bɑ koo wurɑmɑ
ben temɔ
14
1 Yinni Gusunɔ u koo Isirelibɑ wɔnwɔndu kuɑ. U koo mɑɑ bu gɔsi bu ko wigibu, kpɑ u bu swĩi ben temɔ. Sɑɑ yerɑ sɔbɑ koo du ben suunu sɔɔ, kpɑ bu mɛnnɑ bɑ n wɑ̃ɑ kɑ be sɑnnu.
2 Bwese dɑbinu nu koo kɑ Isirelibɑ wurɑmɑ ben temɔ, kpɑ bu bwese ni ko yobu tem mɛ Yinni Gusunɔ u bu wɛ̃ sɔɔ. Be bɑ rɑɑ Isirelibɑ yoru mwɛɛrɑ bɑ koo mɑɑ ben tii yoru mwɛɛri. Mɛyɑ be bɑ rɑɑ bu dɑm dɔre, bɑ koo mɑɑ ben tii dɑm dɔre.
Bɑbilonin sinɑ bokon gɔɔ
3 Bɛɛ Isirelibɑ, Yinni Gusunɔ u koo de i yoru yɑri, kpɑ i wɛ̃rɑ bɛɛn wɑsirɑru kɑ nɔni swɑ̃ɑrun sɔ̃. 4 Ù n kuɑ mɛ, womu geniwɑ i ko i kɑ Bɑbilonin sinɑ boko yɛ̃ɛ i nɛɛ,
wi u rɑɑ sun dɑm dɔremɔ, u ǹ mɑɑ wɑ̃ɑ.
Dɑm dɔrebu kpɑ.
5 Yinni Gusunɔ u nuku kɔ̃surugii
be bɑ sun dɑm dɔremɔn dɑm buɑ,
mɛ mu sɑ̃ɑ nge bokuru.
6 Wi u rɑ n dɑɑ tɔmbu soomɔ kɑ mɔru wɔnwɔndu sɑri,
kpɑ u n tɔmbu dɑm dɔremɔ,
bɑ nùn nɔni sɔ̃ɔwɑ sere kɑ nɔrɔ.
7 Wee tɛ̃ tɔmbɑ wɛ̃re hɑnduniɑ kpuro sɔɔ,
mɑ bɑ nuku dobun kuuki mɔ̀.
8 Bɑɑ kɑ dɑ̃ɑ ni bɑ mɔ̀ sipɛrɛbɑ kɑ sɛdurubɑ
ni nu wɑ̃ɑ Libɑniɔ
nu nuku dobu mɔ̀, nu mɔ̀,
sɑɑ dɔmɑ tèn di ɑ wɔrumɑ,
goo ku rɑ mɑɑ nɛ u sun bɔɔri.
9 Be bɑ wɑ̃ɑ gɔribun wɑ̃ɑ yerɔ
bɑ seewɑ bu kɑ nun dɑm koosiɑ,
be kɑ ben wirugibu kpuro.
Mɛyɑ sinɑm be bɑ gu bɑ seewɑ ben sinɑ gɔnin di.
10 Mɑ be kpuro bɑ nùn nɔɔgiru sue bɑ nɛɛ,
wee wunɛn tii ɑ kuɑ dɑm sɑrirugii nge bɛsɛ.
Sɑ kuɑ tiɑ.
11 Wunɛn bɛɛrɛ ye bɑ rɑ rɑɑ nun wɛ̃,
bɑ n mɔrɔkunu soomɔ,
wee ye kpuro yɑ wɔri gɔribun wɑ̃ɑ yerɔ.
Kɔkɔnu nu kuɑ wunɛn kpin yeru kɑ wunɛn bekuru.
12 Wunɛ wi ɑ sɑ̃ɑ nge buruku kperɑ ye yɑ bɑllimɔ,
wee ɑ wɔrumɑ wɔllun di.
Wunɛ wi ɑ bwesenu kpuro tɑbu di,
wunɛ wee bɑ surɑ temɔ, ɑ kpĩ.
13 Wunɛ wi ɑ rɑ n gerumɔ wunɛn gɔ̃ruɔ ɑ n mɔ̀,
kɑɑ yɔ wɔllɔ, ɑ wunɛn sinɑ gɔnɑ tɛriɑ kperin wɔllɔ,
kpɑ ɑ sinɑ guuru wɔllɔ sɔ̃ɔ yɛ̃sɑn nɔm geu giɑ,
bũnun suunu sɔɔ.
14 Kɑɑ yɔ guru winu wɔllɔ,
kpɑ ɑ kɑ Wɔrukoo weenɑ.
15 Adɑmɑ wunɛ wee, bɑ sure gɔribun wɑ̃ɑ yerɔ
sere wɔrun sɔɔ sɔɔwɔ.
16 Be bɑ nun wɑ kpɑ bɑ n nun mɛɛrɑ tii kɑ lɑɑkɑri bɑ n mɔ̀,
n ǹ durɔ wiyɑ mi, wi u rɑ rɑɑ de tɔmbu bu burisinɑ?
Kpɑ u bɑndu suriri?
17 U yinɑ u pirisɔmbɑ kɑrɑ.
U wusu kɔsukɑ.
Mɑ hɑnduniɑ yɑ gɔsiɑ bɑnsu.
18 Bwesenu kpuron sinɑ boko bɑɑwure
u wɑ̃ɑ u wɛ̃re kɑ bɛɛrɛ win sikirɔ.
19 Adɑmɑ wunɛ, bɑ nun kɑsɑ kuɑ
ɑ kɑ wunɛn sikiru tondɑ
nge dɑ̃ɑ kɑ̃ɑsɑ ye bɑ ǹ kĩ,
ǹ kun mɛ nge wi bɑ tɑkobi sɔkurɑ
bɑ go bɑ sure wɔru sɔɔ ge gɑ kpenu mɔ,
ǹ kun mɛ nge goo te bɑ tɑɑkɑ.
20 Bɑ ǹ nun sikɑ nge sinɑm be,
domi ɑ wunɛn tem go,
mɑ ɑ wunɛn tɔmbu kpeerɑsiɑ.
Bɑ ǹ mɑɑ wunɛn bwese kɔ̃surun gɑri mɔ̀.
21 I sɔɔru koowo i win bibu go
kɔ̃sɑ ye ben sikɑdobɑ bɑ kuɑn sɔ̃,
kpɑ bu ku rɑɑ se bu mɑɑ hɑnduniɑ tɑbu di,
kpɑ bu mɑɑ wusu seeyɑ bu yibu si sɔɔ.
22 Nɛ Gusunɔ, wɔllu kɑ tem Yinni, nɑ nɛɛ, kon Bɑbilonigibu seesi n ben bweseru kɑ ben wuun yĩsiru go. Bɑ ǹ mɑɑ ben yirɑ wɑsi. 23 Kon de wuu ge, gu ko nge dɑru bwɑ̃ɑrɑ mi gunɔ sɑrenu nu rɑ n wɑ̃ɑ, kpɑ n gu kurɑ kɑ yii te tɑ ǹ bu gɑ̃ɑnu gɑnu deriɑmmɛ. Nɛ Gusunɔ, wɔllu kɑ tem Yinniwɑ nɑ yeni geruɑ.
Yinni Gusunɔ
u koo Asirigibu kpeerɑsiɑ
24 Nɛ, Yinni Gusunɔ Dɑm kpurogii
nɑ bɔ̃ruɑ nɑ nɛɛ,
ye nɑ yi, yɑ koo mɑɑ nɑ.
Ye nɑ mɑɑ gɔ̃ru doke yɑ koo koorɑ.
25 Kon Asirigibu kɔsuku nɛn tɔmbu Isirelibɑn temɔ.
Kon bu tɑɑku nɛn guunu wɔllɔ,
kpɑ n nɛn tɔmbu yɑrɑ ben yorun di,
bɑ kun ben sugu kɑ ben sɔmunu sɔɔwɑ.
26 Yeniwɑ nɛn himbɑ tɔmbu kpuron sɔ̃.
Wee nɑ nɔmu dɛmiɛ n kɑ bwesenu kpuro sɛɛyɑsiɑ.
27 Nɛ Gusunɔ, wɔllu kɑ tem Yinni,
nɑ̀ n gɑ̃ɑnu yi wɑrɑ koo ye yinɑ.
Nɑ̀ n nɔmɑ dɛmiɛ wɑrɑ u koo ye kure.
Yinni Gusunɔ
u koo Filisitibɑ kpeerɑsiɑ
28 Wɔ̃ɔ gè sɔɔ sinɑ boko Akɑsi u gu, wɔ̃ɔ ge sɔɔrɑ Yinni Gusunɔ u Filisitibɑ gɑri yini sɔ̃ɔwɑ sɑɑ Esɑin nɔɔn di u nɛɛ,
29 bɛɛ Filisitibɑ kpuro i ku nuku dobu ko
yèn sɔ̃ boku te tɑ rɑɑ bɛɛ soomɔ tɑ bɔɔrɑ.
I n yɛ̃ mɑ ì n wɑɑ gɔsɔbu sɑrɑri,
i ko i surɔkɔru girɑri.
30 Sɑɑ gɑɑ sisi yè sɔɔ be bɑ sɑ̃ɑru bo bɑ koo wɑ bu di,
kpɑ wɔnwɔndobu bɑ n wɑ̃ɑ bɔri yɛndu sɔɔ.
Adɑmɑ bɛɛ Filisitibɑ kon de bɛɛn nuuru tu gbi gɔ̃ɔrun sɔ̃.
Be bɑ koo mɑɑ tiɑrɑ, bɑ koo bu gowɑ.
31 Bɛɛ be i wɑ̃ɑ wuun gbɑ̃rɑ kɔnnɔwɔ
i weeweenu koowo bɛrum sɔ̃.
Bɛɛ Filisitibɑ kpuro gesi i diirio,
domi yibɛrɛbɑ bɑ tuɑ seeye nge dɔ̃ɔ wiiru.
Bɑ wee sɔ̃ɔ yɛ̃sɑn nɔm geu giɑn di,
mɑ ben tɑbu sĩi yi bɑɑsinɛ.
32 Esɑi u nɛɛ, mbɑ sɑ ko Filisitibɑn gɔrobu wisi.
Sɑ ko nɛɛ, Yinni Gusunɔwɑ u Siɔni swĩi.
Miyɑ win tɔn be bɑ sɑ̃ɑ wɔnwɔndobu bɑ koo kuke kɑ bɔri yɛndu.