9
1 Tɔn be bɑ rɑɑ sĩimɔ yɑm wɔ̃kuru sɔɔ,
bɑ koo yɑm bururɑm bɑkɑm wɑ.
Be gɔɔn bɛrum mu wukiri nge yɑm wɔ̃kuru,
yɑm bururɑm mu koo bu kuremɑ.
2 Yinni Gusunɔ, kɑɑ bu nuku doo bɑkɑbu wɛ̃,
kpɑ bɑ n nuku doo bi mɔ̀ wunɛn wuswɑɑɔ
nge mɛ bɑ rɑ nuku dobu ko gɛ̃ɛbun sɑɑ sɔɔ,
ǹ kun mɛ sɑnɑm mɛ bɑ ɑrumɑni gurɑmɑ bɑ bɔnu mɔ̀ kɑ kuuki.
3 Nge mɛ ɑ wunɛn tɔmbu wɔrɑ sɑɑ
Mɑdiɑnin tɑbu kowobun nɔmɑn di,
nge mɛyɑ kɑɑ bu yɑrɑ yorun di
kpɑ ɑ dɛkɑ ye bɑ rɑ kɑ bu so biruɔ
kɑ sere sɛnɑ ye bɑ rɑ kɑ bu dɑm dɔre bɔɔku.
4 Bɑ ǹ mɑɑ tɑbu kowobun bɑrɑ nɑɑsun dɑmu nɔɔmɔ.
Ben tɑbu yɑ̃nu nu rɑ n yɛm yibɑ.
Bɑ ǹ mɑɑ nu dokemɔ.
Bɑ koo yɑ̃ɑ ni kɑ bɑrɑ ni dɔ̃ɔ kɑrewɑ.
5 Domi bɑ koo sun bii tɔn durɔ mɑruɑ.
Wiyɑ u koo ko bɛsɛn wirugii.
Win tɔmɑrɑ, Bwisi kɛ̃ɔ bɛɛrɛgii,
kɑ Gusunɔ Dɑm kpurogii,
kɑ Bɑɑbɑ wi u rɑ n wɑ̃ɑ,
kɑ Bɔri yɛndun nuuru.
6 U sɑ̃ɑwɑ Dɑfidin sikɑdobu.
Yen sɔ̃, u koo win bɑndu di kpɑ u tu dɑm sire
kpɑ tɑ n bɔri yɛndu mɔ sere kɑ bɑɑdommɑɔ.
U koo win tɔmbu siri gem sɔɔ,
sɑɑ tɛ̃n di sere kɑ bɑɑdommɑɔ.
Yeniwɑ Gusunɔ, wɔllu kɑ tem Yinni, u yɔ̃rɑri u ko.
Yinni Gusunɔ
u koo Isirelibɑ sɛɛyɑsiɑ
7 Yinni Gusunɔ u Isireli be bɑ sɑ̃ɑ Yɑkɔbun bweseru siri.
Mɑ siri bi, bu bu di.
8 Tɔmbu kpuro, Efɑrɑimubɑ kɑ Sɑmɑrigibu,
bɑ koo ye giɑ,
be, be bɑ gerumɔ kɑ tii suɑbu bɑ mɔ̀,
9 wee diɑn birikibɑ bɑ wɔrukumɔ,
ɑdɑmɑ sɑ ko mɑɑ yi seeyɑ kɑ kpee ni bɑ dɑ̃kɑ.
Wee sikɑmɔren dɑ̃ɑ gberebɑ bɑ bɔɔkirɑ.
Sɑ ko bu kɔsi kɑ dɑ̃ɑ geɑ ye bɑ mɔ̀ sɛdurun gberebɑ.
10 Yinni Gusunɔ u koo Resini Asirin sinɑ bokon wɛrɔbu tɑbu yɑ̃nu wɛ̃,
kpɑ bu Isirelibɑ wɔri.
11 U koo de Sirigibu bɑ n wɑ̃ɑ sɔ̃ɔ yɑri yeru giɑ,
kpɑ Filisitibɑ bɑ n mɑɑ wɑ̃ɑ sɔ̃ɔ duu yeru giɑ,
kpɑ bu nɔɔ wukiɑ bu Isirelibɑ mwɛ.
Kɑ mɛ kpuro, win mɔru kun suremɔ.
U koo mɑɑ bu nɔmɑ doke u sɛɛyɑsiɑ.
12 Adɑmɑ bɑ ǹ wurɑmɑmɔ win mi,
wi, wi u bu sɛɛyɑsiɑmɔ,
wi, wi u sɑ̃ɑ wɔllu kɑ tem Yinni.
Bɑ ǹ mɑɑ nùn kɑsumɔ.
13 Yen sɔ̃nɑ u koo Isirelibɑn wiru
kɑ ben siru burɑ sɔ̃ɔ teerun sɔ̃ɔ.
14 Ben bukuro berɑ, bɑ sɑ̃ɑ ben wiru,
mɑ sɔmɔ weesugibu bɑ sɑ̃ɑ ben siru.
15 Be bɑ sɑ̃ɑ tɔn ben kpɑrobu, bɑ derɑ bɑ kɔ̃ɔrɑ.
Be, be bɑ mɑɑ kpɑre, bɑ swɑɑ kɔ̃sɑ mwɑ.
16 Yen sɔ̃nɑ Yinni Gusunɔ u ǹ nuku dobu mɔ,
ben ɑluwɑɑsibɑn sɔ̃.
U ǹ mɑɑ ben gobekubɑ kɑ gɔminibu wɔnwɔndu kuɑmmɛ.
Domi be kpuro bɑ sɑ̃ɑwɑ nuku kɔ̃surugibu.
Bɑ ǹ Gusunɔn bɛɛrɛ yɛ̃.
Sekuru sɑri gɑriyɑ yi rɑ yɑri sɑɑ ben nɔsun di.
Yen sɔ̃, Yinni Gusunɔn mɔru kun suremɔ.
U koo bu nɔmu dokewɑ u sɛɛyɑsiɑ.
17 Domi nuku kɔ̃suru tɑ rɑ mɛniwɑ nge dɔ̃ɔ
wi u rɑ yɑkɑsu kɑ sɑ̃ki mwɛ.
Dɔ̃ɔ wi, u rɑ du u dɑ̃ɑ sɔ̃ɔ bɔkɔ mwɑ,
kpɑ wiisu su se ge sɔɔn di.
18 Gusunɔ, wɔllu kɑ tem Yinnin mɔrun sɔ̃,
tem mɛ, mu dɔ̃ɔ mwɑɑrɑ,
mɑ mɛn tɔmbɑ dɔ̃ɔ diirɑ.
Goo kun win winsim lɑɑkɑri mɔ̀ u sere nùn somi.
19 Bɑ dĩɑnu gurɑmɔ nɔm geuɔ kɑ nɔm dwɑrɔ.
Adɑmɑ kɑ mɛ, goo kun debɑ.
Mɑ ben bɑɑwure u win winsim wɑsin yɑɑ temmɔ.
20 Mɑnɑsebɑ kɑ Efɑrɑimubɑ bɑ tɑbu wɔrinɑmɔ.
Yen biru be kpuro bɑ mɛnnɑ bɑ Yudɑbɑ wɔri.
Kɑ mɛ, Yinni Gusunɔn mɔru kun sure.
U mɑɑ bu nɔmu doke, u sɛɛyɑsiɑmɔ.