Gusunɔ u Esɑi gɔsɑ
u kɑ ko win sɔmɔ
6
1 Wɔ̃ɔ gè sɔɔ sinɑ boko Osiɑsi u gu, nɛ Esɑi, nɑ Yinni Gusunɔ wɑ kɑ̃siru sɔɔ, u sɔ̃ sinɑ kitɑ bɑkɑru gɑrun wɔllɔ win sɑ̃ɑ yerɔ. Mɑ win yɑberun kɑsɑ yɑ sure sɑ̃ɑ yee ten sɔɔwɔ kpuro. 2 Wɔllun kɔ̃sobu bɑ bɛllimɔ win wɔllɔ. Ben bɑɑwure, kɑsɑ nɔɔbɑ tiɑ u mɔ. U kɑ yen yiru win wuswɑɑ wukiri, yiru mɑɑ win nɑɑsu mɑ u kɑ yiru ye yɑ tie yɔ̃ɔwɑ. 3 Bɑ nɔɔgiru sue bɑ mɔ̀,
Dɛɛro Dɛɛro,
Gusunɔ wɔllu kɑ tem Yinni u sɑ̃ɑwɑ Dɛɛro.
Win yiiko yɑ hɑnduniɑ kpuro yibɑ.
4 Mɑ sɑ̃ɑ yee ten gɑmbobɑ bɑ diirɑ sɑɑ ben tem di, nɔɔ ge gɑ nɔɔrɑmɔ min sɔ̃, mɑ wiisu su yibɑ dii te sɔɔ. 5 Sɑɑ ye sɔɔrɑ nɑ nɔɔgiru suɑ nɑ nɛɛ, nɑ kɑm kuɑwɑ. Domi nɛn yɑrɑ yɑ durum sɔɔwɑ, nɑ mɑɑ wɑ̃ɑ tɔmbun suunu sɔɔ bèn yɑri durum sɔɔwɑ mɑ nɑ sere Gusunɔ, wɔllu kɑ tem Yinni wɑ kɑ nɔni wi u sɑ̃ɑ kpuron sunɔ.
6 Adɑmɑ wɔllun kɔ̃so ben turo u dɔ̃ɔ gɛ̃ɛ suɑ kɑ bɑku yɑ̃ku yerun di, u yɔ̃ɔmɑ u nɑ nɛn mi. 7 Mɑ u kɑ yi nɛn nɔɔ bɑbɑ mɑ u nɛɛ,
yeni yɑ wunɛn nɔɔ bɑbɑ
yɑ sɔ̃ɔsi mɑ Gusunɔ u wunɛn torɑru wunɑ.
Mɛyɑ u mɑɑ wunɛn durum wɔkɑ.
8 Yen biruwɑ nɑ Yinni Gusunɔn tiin nɔɔ nuɑ gɑ gerumɔ gɑ mɔ̀,
wɑrɑ kon wɑ n gɔri.
Wɑrɑ koo se u mɑn dɑɑwɑ.
Mɑ nɑ wisɑ nɑ nɛɛ,
nɛ wee, ɑ mɑn gɔrio.
9 Mɑ u mɑn sɔ̃ɔwɑ u nɛɛ,
ǹ n mɛn nɑ, n doo n Isirelibɑ gɑri yini sɔ̃ n nɛɛ,
wee bɑ ko n dɑ kɑsu bu win gɑri nɔ,
ɑdɑmɑ bɑ ǹ yi nɔɔmɔ.
Bɑ ko n dɑ kɑsu bu wɑ,
ɑdɑmɑ bɑ ǹ gɑ̃ɑnu wɑsi.
10 N de tɔn ben gɔ̃ru gu bɔbiɑ,
kpɑ bu swɑɑ tɑɑyɑ bu ku rɑɑ gɑri nɔ.
N ben nɔni wɔ̃kuo bu ku rɑɑ kɑ yɑm wɑ,
kpɑ bu ku rɑɑ gɔ̃ru gɔsiɑ bu fɑɑbɑ wɑ.
11 Mɑ nɑ nɛɛ,
Yinni, sere sɑɑ yerɑ̀ yɑ ko n sɑ̃ɑ mɛ.
Mɑ u mɑn wisɑ u nɛɛ,
sere wuu sinin tɔmbu bɑ̀ n gbisukɑ,
kpɑ su ko bɑnsu, kpɑ tem mɛ kpuro mu kɑm ko.
12 Domi u koo de bu kɑ mɛn tɔmbu dɑ sere mi n tomɑ
kpɑ bu mɛ deri mu n sɑ̃ɑ bɑnsu.
13 Bɑɑ bɑ̀ n tem mɛn tɔmbu bɔnu kuɑ subɑ wɔkuru,
mɑ ten teerɑ tie mi,
u koo tu surɑwɑ nge dɑ̃ɑ bɑkɑru.
Adɑmɑ nge mɛ dɑ̃ɑ kpiriru tɑ rɑ kpɑre,
nge mɛyɑ bwese kpɑɑrɑ koo se
tɑ n sɑ̃ɑ bwese geeru te u gɔsɑ.