Yudɑn bɑndɑ burisinɑ
3
1 Esɑi u nɛɛ,
Gusunɔ, wɔllu kɑ tem Yinni,
u koo Yerusɑlɛmugibu kɑ Yudɑbɑ kpuron ɑrumɑni kpeerɑsiɑ.
Bɑ ǹ mɑɑ dĩɑnu kɑ nim wɑsi.
Bɑ ǹ mɑɑ somiru gɑru wɑsi gɑm di.
2-3 Domi u koo ben tɑbu durɔ dɑmgibu
kɑ ben tɑbu kowobu wunɑ u go,
kɑ ben siri kowobu kɑ ben sɔrobu kɑ guro gurobu
kɑ be bɑ sɑ̃ɑ tɑbu kowobu weerɑɑkuukuubun wirugibu
kɑ ben sinɑ ɑsɑkpɔbu kɑ ben bwisi kɛ̃ɔbu
kɑ ben nɔmɑn sɔm kowo kpokobɑ kɑ ben timgii gisonkobɑ
kɑ mɑm wi, Gusunɔn sɔmɔbun tii.
4 U koo de ɑluwɑɑsibɑ bɑ n bu kpɑre
nge mɛ bɑ kɑ kĩ.
5 Tɔmbɑ koo dɑm dɔrenɑ.
Aluwɑɑsibɑ bɑ koo durɔ tɔkɔnu seesi,
kpɑ gɑru ko sɑribɑ bu dɑmgibu nɔni du.
6 Sɑɑ ye sɔɔ, tɔnu u koo win wɔnɔ sɛ̃re u nɛɛ,
wunɛ ɑ yɑ̃nu mɔ.
Yen sɔ̃, ɑ koowo bɛsɛn yɛnu yɛ̃ro,
kpɑ ɑ bɛsɛn yɛnu seeyɑ.
7 Adɑmɑ u koo nùn wisi u nɛɛ,
nɑ ǹ yen tim mɔ.
Dĩɑnu sɑri yɛnu ge sɔɔ,
yɑ̃nu mɑɑ sɑri mi.
A ku mɑn ko bɛɛn yɛnu yɛ̃ro.
8 Esɑi u mɑɑ nɛɛ,
Yerusɑlɛmu yɑ bɑ̃ɑrimɔ,
mɑ Yudɑ yɑ wɔrukumɔ
yèn sɔ̃ bɑ Yinni Gusunɔ seesi
kɑ ben gɑri kɑ ben kookoosu.
Bɑ ǹ win bɛrum mɔ.
9 Ben kookoosu su ben dɑɑn seedɑ dimɔ.
Ben dɑɑ kɔ̃sɑ kun beruɑ.
Bɑ ye mɔ̀ bɑtumɑ sɔɔ nge Sodomugibu.
Bɔ̃rurobɑ bɑ sɑ̃ɑ,
domi bɔ̃riyɑ bɑ tii sɔɔru kuɑmmɛ mi.
10 A gemgii sɔ̃ɔwɔ mɑ u koo kuurɑ.
U koo win sɔmburun ɑre wɑ.
11 Adɑmɑ bɔ̃rurowɑ wi u nuku kɔ̃suru mɔ.
U ko n wɑ̃ɑwɑ nuku sɑnkirɑnu sɔɔ,
domi win sɔmburun ɑreyɑ u koo wɑ.
12 Aluwɑɑsibɑ bɑ Yinni Gusunɔn tɔmbu dɑm dɔremɔ.
Mɑ tɔn kurɔbu bɑ sɑ̃ɑ ben yinnibu.
Be bɑ bu kpɑre bɑ bu torɑsiɑmɔ.
Bɑ ben swɑɑ go ye bɑ rɑɑ swĩi.
Yinni Gusunɔ
u win tɔmbun wirugibu sirimɔ
13 Yinni Gusunɔ u nɑ u yɔ̃ u kɑ win tɔmbu siri.
14 U win siribu toruɑ kɑ win tɔmbun guro gurobu,
kɑ ben wirugibu.
U nɛɛ, i tɔmbun dĩɑnu wɔrɑ
mɑ i ye i sɑ̃ɑrobu mwɑɑri yii bɛɛn yɛnusɔ.
15 Mbɑn sɔ̃nɑ i nɛn tɔmbu dɑm dɔremɔ,
mɑ i sɑ̃ɑrobu tɑki dimɔ.
Nɛ, Yinni Gusunɔ, wɔllu kɑ tem Yinniwɑ nɑ yeni bikiɑmɔ.
Bɑ koo Yerusɑlɛmun
tɔn kurɔbu sɛɛyɑsiɑ
16 Yinni Gusunɔ u mɑɑ nɛɛ,
wee Yerusɑlɛmun tɔn kurɔbu bɑ tii sue.
Mɑ bɑ sĩimɔ bɑ yɛ̃kɔ mɔ̀, bɑ wĩinu dɛmiɛ.
Bɑ ǹ sekuru mɔ, bɑ ben nɑɑsun sumi soonɑmɔ.
17 Yen sɔ̃nɑ kon de bu ko wii kpɑrɑnugibu,
kpɑ n bu terenu yɔ̃su.
18 Sɑɑ ye sɔɔ, kon ben burɑ yɑ̃nu kpuro wunɑ. Niyɑ ben nɑɑsun sumi kɑ ben serin burɑ yɑ̃nu kɑ ben sɑbɑbɑ yi yi kɑ suru kɛ̃kɑ weenɛ, 19 kɑ ben swɑɑ tonkunu, kɑ ben sumi kɑ ben sɔnditii, 20 kɑ yɑsi, kɑ yɔni yi bɑ doke nɑɑsɔ kɑ ben sɛ̃kɑtii, kɑ ben yɔrɔmɑnnin bɔki, 21 kɑ ben tɑɑbu nɔmɑginu kɑ wɛ̃ruginu, 22 kɑ ben yɑ̃ɑ gobiginu, kɑ yɑbe bɑkɑnu kɑ ben bɔɔnu, 23 kɑ digibɑ, kɑ yɑ̃ɑ ni nu ǹ sinum mɔ, kɑ yɑsi, kɑ sere sɔnditii.
24 Bɑ ǹ mɑɑ turɑren nuburu nɔɔmɔ
mɑ n kun mɔ nubu kɔ̃suru.
Bɑ ǹ mɑɑ sɛ̃kɑtii sɛ̃kemɔ mɑ n kun mɔ wɛ̃ɛ.
Bɑ ǹ mɑɑ seri wɑsi wirɔ bu tɑri.
Wii pɔnnɑ bɑ ko n mɔ.
Bɑ ǹ mɑɑ yɑbe bɑkɑnu sebumɔ
sere sɑɑkibɑ nuku sɑnkirɑnun sɔ̃.
Ben burɑm kun mɑɑ sɔ̃ɔsirɑmɔ.
Sekurɑ bɑ koo wɑ.
Yerusɑlɛmun gɔminibu
25 Bɑ koo Yerusɑlɛmun tɔmbu kɑ yen tɑbu durɔbu go tɑbu sɔɔ.
26 Tɔmbɑ koo wuri ko bu gɔɔ swĩ yen gbɑ̃rɑ kɔnnɔwɔ
nge tɔn kurɔ wi bɑ wɔri bɑ win yɑ̃nu gurɑ mɑ u sɔ̃ temɔ.